ഭിന്നശേഷിക്കാർക്ക് 'ആപ്പുമായി' തിരഞ്ഞെടുപ്പ് കമ്മീഷൻ

ആലപ്പുഴ :ലോക്സഭാ തിരഞ്ഞെടുപ്പ് ഭിന്നശേഷി സൗഹൃദമാക്കാൻ ഇവർക്ക് പ്രത്യേക ആപ്ലിക്കേഷനുമായി തിരഞ്ഞെടുപ്പ് കമ്മീഷൻ. പി.ഡബ്ല്യു.ഡി. (പേഴ്സൺ വിത്ത് ഡിസെബിലിറ്റി) എന്ന പേരിൽ പുറത്തിറക്കിയിരിക്കുന്ന ആപ്ലിക്കേഷൻ ഗൂഗിൾ പ്ലേ സ്റ്റോറിൽനിന്ന് ഡൗൺലോഡ് ചെയ്ത് ഭിന്നശേഷിക്കാർക്ക് ഉപയോഗിക്കാം. ശാരീരിക വൈകല്യമുള്ളവർക്ക് പ്രശ്‌നങ്ങൾ തിരഞ്ഞെടുപ്പ് കമ്മിഷനെ അറിയിക്കുന്നതിനും സേവനങ്ങൾ ആവശ്യപ്പെടുന്നതിനുമുള്ള സൗകര്യം ഈ ആപ്പിലുണ്ട്. പി.ഡബ്ല്യു.ഡി. വോട്ടർ എന്ന നിലയിൽ പുതുതായി രജിസ്റ്റർ ചെയ്യുന്നതിനും നിലവിലെ വോട്ടർ ലിസ്റ്റിൽനിന്ന് പി.ഡബ്ല്യു.ഡി. വോട്ടർ ആകുന്നതിനുമുള്ള സൗകര്യവും ആപ്പ് വഴി ലഭ്യമാണ്. അനുയോജ്യമായ പോളിങ് സ്റ്റേഷൻ ലഭ്യമാക്കുന്നതിനും പ്രത്യേകമായ ക്യൂ ഒരുക്കുന്നതിനുമെല്ലാം രജിസ്റ്റർ ചെയ്യുന്നവർക്ക് കമ്മിഷൻ സൗകര്യമൊരുക്കും. വീൽച്ചെയർ ആവശ്യമുള്ളവർക്ക് ഇതിലൂടെ ആവശ്യപ്പെടാവുന്നതാണ്. പോളിങ് ബൂത്ത് എവിടെയാണെന്ന് കണ്ടെത്തുന്നതിനും നാവിഗേഷൻ സെറ്റ് ചെയ്യുന്നതിനുമുള്ള സൗകര്യവും ആപ്ലിക്കേഷൻ വഴി നൽകുന്നുണ്ട്. ജില്ലയിൽ 5419 ഭിന്നശേഷി വോട്ടർമാരാണ് നിലവിലുള്ളത്. ജില്ലയിൽ വോട്ടിങ് ശതമാനം നൂറിൽ നൂറ് ആക്കുക എന്ന ലക്ഷ്യത്തോടെയാണ് ജില്ലാ ഭരണകൂടം മുന്നോട്ട് പോകുന്നത്. ഭിന്നശേഷിക്കാരായ എല്ലാവരും തിരഞ്ഞെടുപ്പ് കമ്മീഷന്റെ ഈ ആപ്പ് സേവനം പൂർണമായി വിനിയോഗിക്കണമെന്ന് ജില്ലാ കളക്ടർ  അഭ്യർത്ഥിച്ചു.

തിരഞ്ഞെടുപ്പ്; ജീവനക്കാരുടെ പട്ടിക നൽകാത്ത

സ്ഥാപന മേധാവികൾക്കെതിരെ നടപടി-ജില്ലാകളക്ടർ

ആലപ്പുഴ:ലോക്‌സഭാ തിരഞ്ഞെടുപ്പ് 2019മായി ബന്ധപ്പെട്ട് തിരഞ്ഞെടുപ്പ് ജോലിക്ക് നിയോഗിക്കുന്നതിനായി ജീവനക്കാരുടെ പേരുവിവരം ആവശ്യപ്പെട്ടുകൊണ്ടുള്ള പട്ടിക ബുധനാഴ്ച (മാർച്ച് 20) വൈകുന്നേരം നാലുമണിക്ക് മുമ്പായി എല്ലാ ഓഫീസ് മേധാവികളും ബന്ധപ്പെട്ട താലൂക്കിലോ വില്ലേജ് ഓഫീസിലോ നൽകണം. തങ്ങളുടെ കീഴിലുള്ള എല്ലാ ഉപ ഓഫീസുകളിൽ നിന്നും സമയബന്ധിതമായി പട്ടിക നൽകിയിട്ടുണ്ട് എന്ന് എല്ലാ സ്ഥാപന മേധാവികളും ഉറപ്പാക്കണമെന്ന് ജില്ലാ കളക്ടർ അറിയിച്ചു. പട്ടിക സമർപ്പിക്കാത്ത ഓഫീസ് മേലധികാരികളുടെ പേരിൽ ഇന്ത്യൻ ജനപ്രാതിനിധ്യ നിയമപ്രകാരം നടപടി സ്വീകരിക്കുമെന്ന് ജില്ലാ കളക്ടർ അറിയിച്ചു.