തിരുവനന്തപുരത്തെ ട്രാൻസലേഷണൽ റിസർച്ച് ആന്റ് പ്രൊഫഷണൽ ലീഡർഷിപ്പ് സെന്റർ, ഗവൺമെന്റ് എൻജിനിയറിങ് കോളേജ് ബാർട്ടൺഹില്ലിൽ കരാർ അടിസ്ഥാനത്തിൽ പ്രോജക്ട് സ്റ്റാഫ് തസ്തികയിലേക്ക് അപേക്ഷ ക്ഷണിച്ചു. അപേക്ഷ സമർപ്പിക്കുന്നതിനുള്ള അവസാന തീയതി മെയ് 25.

ആലപ്പുഴ ജില്ലാ സാമൂഹ്യനീതി വകുപ്പിന് കീഴില്‍ വയോജനങ്ങള്‍ക്കായുള്ള ദ്രുത കര്‍മ്മ സേന (റാപ്പിഡ് റെസ്‌പോണ്‍സ് ടീം) പദ്ധതിയുടെ ഭാഗമായി നിയമിച്ചിട്ടുള്ള ഫീല്‍ഡ് റെസ്‌പോണ്‍സ് ഓഫീസര്‍ക്ക് ഔദ്യോഗിക ആവശ്യങ്ങള്‍ക്കായി 2026 ജൂലൈ ഒന്ന് മുതല്‍ 2027 മാര്‍ച്ച് 31 വരെ ഒമ്പത് മാസക്കാലയളവിലേക്ക് ടാക്‌സി പെര്‍മിറ്റുള്ള കാര്‍/ജീപ്പ് വാടകയ്ക്ക് നല്‍കുവാന്‍ സന്നദ്ധരായ വ്യക്തികള്‍ / സ്ഥാപനങ്ങളില്‍ നിന്നും മുദ്രവെച്ച ടെന്‍ഡറുകള്‍ ക്ഷണിച്ചു. ടെന്‍ഡറുകള്‍ സ്വീകരിക്കുന്ന അവസാന തീയതി മേയ്  28 ഉച്ചയ്ക്ക് 2.30 മണിവരെ.

ജില്ലാ മേരാ യുവ ഭാരത് (നെഹ്‌റു യുവകേന്ദ്ര) ഓഫീസിന്റെ ആഭിമുഖ്യത്തില്‍ പ്രകൃതി ദുരന്തങ്ങളിലും മറ്റ് അടിയന്തിര സാഹചര്യങ്ങളിലും പ്രവർത്തിക്കുന്നതിന് ടീമിനെ (യുവ ആപ്ദമിത്ര) തയ്യാറാക്കുന്നതിന് യുവതീ യുവാക്കളില്‍ നിന്ന് അപേക്ഷ ക്ഷണിച്ചു. തിരഞ്ഞെടുക്കപ്പെടുന്നവർക്ക് ഒരാഴ്ചത്തെ സൗജന്യ പരിശീലനം ലഭിക്കും. ക്യാമ്പ് റെസിഡന്‍ഷ്യല്‍ ആയിരിക്കുകയില്ല. പ്രായപരിധി 18-40. ആർട്സ് ആന്റ് സ്പോർട്സ് ക്ലബ് അംഗങ്ങൾ, മേരാ യുവ ഭാരത്, എൻ.വൈ.കെ.എസ്, എൻ.എസ്.എസ്, എൻ.സി.സി, റെഡ്‌ക്രോസ്, സന്നദ്ധസേന, ട്രോമ കെയര്‍ വിഭാഗങ്ങളിലുള്ളവർക്ക് പങ്കെടുക്കാം. മുൻ വോളണ്ടിയർ, സ്പോർട്സ് താരങ്ങൾക്ക് മുൻഗണന.

*നൂറ് ശതമാനം വിജയം നേടി കുട്ടനാട് വിദ്യാഭ്യാസ ജില്ല സംസ്ഥാനത്ത് ഒന്നാമത്

ഒ.ബി.സി. ഹയര്‍ സെക്കണ്ടറി വിഭാഗം വിദ്യാര്‍ഥികള്‍ക്കുള്ള കേന്ദ്രാവിഷ്‌കൃത പദ്ധതിയായ പി എം യശസ്‌വി  ഒബിസി, ഇബിസി,  പോസ്റ്റ്‌മെട്രിക് സ്‌കോളര്‍ഷിപ്പിനായി പിന്നാക്ക വിഭാഗ വികസന വകുപ്പ് മുഖേന അപേക്ഷ സമര്‍പ്പിച്ച യോഗ്യരായ വിദ്യാര്‍ഥികള്‍ക്ക് അര്‍ഹമായ തുക അനുവദിച്ചു. 

ജില്ലയിലെ പകർച്ചവ്യാധി പ്രതിരോധപ്രവർത്തനങ്ങൾ ഏകോപിപ്പിക്കുന്നതിന്റെ ഭാഗമായി കളക്ട്രേറ്റിൽ വകുപ്പുതല ഏകോപനയോഗം ചേർന്നു. ജില്ലയിൽ വെസ്റ്റ്നൈൽ പനി, ജപ്പാൻ ജ്വരം എന്നിവ റിപ്പോർട്ട് ചെയ്ത പശ്ചാത്തലത്തിൽ ചേർന്ന യോഗത്തിൽ  രോഗങ്ങൾ റിപ്പോർട്ടുചെയ്ത ചേർത്തല നഗരസഭ, കഞ്ഞിക്കുഴി, തണ്ണീർമുക്കം ഗ്രാമപഞ്ചായത്തുകളിൽ ഫോഗിംഗ് അടക്കമുള്ള കൊതുകുനശീകരണ പ്രവർത്തനങ്ങൾ നടന്നുവരുന്നുണ്ടെന്ന് ജില്ലാ മെഡിക്കൽ ഓഫീസർ യോഗത്തെ അറിയിച്ചു. 

ജൂൺ ഒന്നിന് ആരംഭിക്കുന്ന പുതിയ അധ്യായന വർഷത്തെ ജില്ലാതല സ്കൂൾ പ്രവേശനോത്സവം വിപുലമായ പരിപാടികളോടെ ആഘോഷിക്കുന്നതിൻ്റെ ഭാഗമായി സ്വാഗതസംഘം രൂപീകരിച്ചു. ചാരമംഗലം ഗവ. ഡി.വി.എച്ച്.എസ്.എസിൽ ചേർന്ന സ്വാഗതസംഘം രൂപീകരണയോഗം ജില്ലാ പഞ്ചായത്ത് പ്രസിഡന്റ് എ മഹേന്ദ്രൻ ഉദ്ഘാടനം ചെയ്തു. വിദ്യാഭ്യാസ വകുപ്പിന്റെ സഹായത്തോടെ ജില്ലയിലെ സ്കൂളുകളുടെ ഭൗതിക സാഹചര്യം മെച്ചപ്പെടുത്താനുള്ള പദ്ധതികൾ ആവിഷ്കരിക്കുമെന്നും കുട്ടികളുടെ മാനസിക ഉല്ലാസത്തിന് മുൻഗണന നൽകുന്ന രീതിയിലാകണം പ്രവേശനോത്സവ പരിപാടികൾ സംഘടിപ്പിക്കേണ്ടതെന്നും ജില്ലാ പഞ്ചായത്ത്‌ പ്രസിഡന്റ്‌ പറഞ്ഞു. 

*രണ്ടാംഘട്ട അവലോകനയോഗം ചേർന്നു

ആലപ്പുഴ ജില്ലാ പഞ്ചായത്തിന് കീഴിലുള്ള സ്കൂളുകളിൽ നിലവിൽ നടന്നുകൊണ്ടിരിക്കുന്ന എല്ലാ നിർമ്മാണ പ്രവൃത്തികളും ഈ മാസം 30 ഓടെ പൂർത്തിയാക്കണമെന്ന് ജില്ലാ പഞ്ചായത്ത് പ്രസിഡന്റ് എ മഹേന്ദ്രൻ പറഞ്ഞു. പുതിയ അധ്യായന വര്‍ഷം ആരംഭിക്കുന്നതിന് മുന്നോടിയായി ആലപ്പുഴ ജില്ലാ പഞ്ചായത്തിന്റെ കീഴിലുള്ള 42 ഹൈസ്‌കൂള്‍, ഹയര്‍ സെക്കൻഡറി സ്‌കൂളുകൾ എന്നിവയുടെ ഒരുക്കങ്ങള്‍ പരിശോധിക്കുന്നതിന് ജില്ലാ പഞ്ചായത്ത് കോൺഫറൻസ് ഹാളിൽ ചേർന്ന രണ്ടാംഘട്ട അവലോകനയോഗം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. 

ആലപ്പുഴ ക്രൈംബ്രാഞ്ച് അന്വേഷിച്ചുവന്ന കള്ളനോട്ട് കേസിൽ ഒളിവിലായിരുന്ന  മൂന്നാം പ്രതിയെ 28 വർഷത്തിന് ശേഷം ആലപ്പുഴ ക്രൈം ബ്രാഞ്ച് അറസ്റ്റ് ചെയ്തു. ക്രൈം 155/1998 (ചെങ്ങന്നൂർ പോലീസ് സ്റ്റേഷൻ ക്രൈം 318/1998) (എൽപി നം 22/2006) നമ്പർ കേസിലെ മൂന്നാം പ്രതിയായ രാജേഷ് രാമചന്ദ്രൻ (52) നെയാണ്   പോലീസ് അറസ്റ്റ് ചെയ്തത്. പൊലീസ് സുപ്രണ്ടിന്റെ  നിർദ്ദേശാനുസരണം ലുക്ക് ഔട്ട് നോട്ടീസ് ഇറക്കിയതിന്റെ അടിസ്ഥാനത്തിൽ വിദേശത്ത് നിന്നും മേയ് 14ന് തിരുവനന്തപുരം വിമാനത്താവളത്തിൽ എത്തിയപ്പോൾ വിമാനത്താവള അതോറിറ്റി വിവരം അറിയിച്ചു.

ഭാരതത്തിന്റെ അതിർത്തി ഗ്രാമങ്ങൾ സന്ദർശിക്കാനും അവിടുത്തെ ജനങ്ങളുടെ ജീവിതം അടുത്തറിയാനും യുവാക്കൾക്ക് അവസരം. 2026 ജൂണിൽ ലേ-ലഡാക്ക്, ഹിമാചൽ പ്രദേശ്, ഉത്തരാഖണ്ഡ് എന്നിവിടങ്ങളിലെ തിരഞ്ഞെടുത്ത അതിർത്തി ഗ്രാമങ്ങളിൽ നടക്കാനിരിക്കുന്ന ഒരാഴ്ച നീണ്ടുനിൽക്കുന്ന 'വികസിത് വൈബ്രന്റ് വില്ലേജസ് പ്രോഗ്രാമിലേക്ക് ഓൺലൈൻ ക്വിസ് മത്സരം വഴി യോഗ്യത നേടുന്ന യുവാക്കൾക്ക് പങ്കെടുക്കാം.