വനിത ശിശു വികസന വകുപ്പിന് കീഴിലുള്ള സമ്പുഷ്ടകേരളം പദ്ധതിക്ക് കീഴിലുള്ള തസ്തികളിലേക്ക് അപേക്ഷ ക്ഷണിച്ചു. നാഷനൽ ന്യൂട്രിഷൻ മിഷൻ പദ്ധതി പ്രകാരം ബ്ലോക്ക് കോ ഓർഡിനേറ്റർ, ബ്ലോക്ക് പ്രോജക്ട് അസിസ്റ്റന്റ് എന്നി തസ്തികകളിലേക്കാണ് അപേക്ഷ ക്ഷണിച്ചത്. ബയോഡാറ്റ, അനുബന്ധ രേഖകൾ സഹിതം അപേക്ഷ ആഗസ്റ്റ് 27ന് വൈകീട്ട് അഞ്ചിന് മുമ്പ് പ്രോഗ്രാം ഓഫീസർ, ജില്ലാതല ഐ.സി.ഡി.എസ് സെൽ ,മിനി സിവിൽ സ്റ്റേഷൻ, പി.ഒ. ചെമ്പിക്കാവ് തൃശൂർ 680020 എന്ന വിലസത്തിൽ ലഭിക്കണം. ഫോൺ: 0487 2321689.
 

സംസ്ഥാന ആരോഗ്യ വകുപ്പിന് കീഴിൽ പാലക്കാട് പെരിങ്ങോട്ടുകുറുശ്ശി ഗവ. ജൂനിയർ പബ്ലിക്ക് ഹെൽത്ത് നേഴ്സിംഗ് ട്രെയിനിങ് സെന്ററിൽ 2020-22 അധ്യയന വർഷത്തെ എഎൻഎം കോഴ്സിനുള്ള അപേക്ഷ ക്ഷണിച്ചു. ആലപ്പുഴ, ഇടുക്കി, എറണാകുളം, തൃശൂർ, മലപ്പുറം, പാലക്കാട് എന്നീ ജില്ലകളിലെ സ്ഥിര താമസക്കാർക്ക് അപേക്ഷിക്കാം. പ്ലസ് ടു/തത്തുല്യ യോഗ്യതയുള്ള മലയാളം എഴുതാനും വായിക്കാനും കഴിയുന്ന പെൺകുട്ടികൾ ആയിരിക്കണം. അപേക്ഷകർ 2019 ഡിസംബർ 31ന് 17 വയസ്സ് തികഞ്ഞവർ ആയിരിക്കണം. 30 വയസ്സ് കവിയരുത്.

തൃശൂർ ഗവ. ഡെന്റൽ കോളേജിലെ കമ്മ്യൂണിറ്റി ഡെന്റിസ്ട്രി വിഭാഗത്തിൽ അസിസ്റ്റന്റ് പ്രൊഫസർ തസ്തികയിൽ ഒഴിവുണ്ട്. യോഗ്യത ഉള്ള ഉദ്യോഗാർഥികൾ ആഗസ്റ്റ് 14 ന് അസ്സൽ സർട്ടിഫിക്കറ്റുകൾ സഹിതം പ്രിൻസിപ്പാളിന്റെ ചേംബറിൽ ഹാജരാവണം. കൂടുതൽ വിവരങ്ങൾക്ക് ഫോൺ : 0487 2206200.

പട്ടികജാതി വികസന വകുപ്പിന്റെ 2020-21 സാമ്പത്തിക വർഷത്തെ പഠനമുറി പദ്ധതിയിലേക്ക് അപേക്ഷ ക്ഷണിച്ചു. ഗവൺമെന്റ് / എയ്ഡഡ് സ്‌കൂളുകളിൽ 8, 9, 10, 11, 12, ക്ലാസ്സുകളിൽ പഠിക്കുന്ന മതിലകം ബ്ലോക്ക് പരിധിയിലെ വിദ്യാർത്ഥികൾക്ക് അപേക്ഷിക്കാം. അപേക്ഷ, ജാതി, വരുമാനം, വിദ്യാർത്ഥിയുടെ സ്‌കൂൾ സാക്ഷ്യപത്രം, വീട് 800 ചതുരശ്ര അടിയിൽ താഴെയാണെന്നുള്ള സാക്ഷ്യപത്രം, ആധാർ, റേഷൻ കാർഡ് പകർപ്പ് എന്നിവ ആഗസ്റ്റ് 27 ന് വൈകിട്ട് 5 ന് മുമ്പായി മതിലകം ബ്ലോക്ക് പട്ടികജാതി വികസന ഓഫീസർക്ക് നൽക്കണം. ഫോൺ: 0480 2852560.

തൃശൂർ-കാഞ്ഞാണി റൂട്ടിലെ പെരുമ്പുഴ വലിയ പാലത്തിൽ ബലക്ഷയം കണ്ടെത്തിയതിനെ തുടർന്ന് പാലത്തിൽ ഗതാഗതനിയന്ത്രണമേർപ്പെടുത്തി. പാലത്തിൽ കൂടിയുള്ള ചരക്കു വാഹനങ്ങളുടെയും മറ്റു വലിയ വാഹനങ്ങളുടെയും ഈ വഴിയുളള യാത്ര നിരോധിച്ചു. വാഹനങ്ങൾ അമല നഗർ-പാവറട്ടി റോഡിലൂടെയും തൃശൂർ-ചേർപ്പ്-തൃപ്രയാർ റോഡിലൂടെയും തിരിഞ്ഞ് പോകണമെന്ന് അന്തിക്കാട് പോലിസ് ഇൻസ്‌പെക്ടർ അറിയിച്ചു.
 

ആരോഗ്യ വകുപ്പിന് കീഴിൽ തൃശൂർ ഗവ. നേഴ്സിംഗ് സ്‌കൂളിൽ 2020-21 അധ്യയന വർഷത്തെ ഡിപ്ലോമ ഇൻ ജനറൽ നഴ്‌സിംഗ് ആൻഡ് മിഡ്‌വൈഫറി കോഴ്സിന് അപേക്ഷ ക്ഷണിച്ചു. അപേക്ഷാഫോമും പ്രോസ്പെക്ടസും www.dhs.kerala.gov.in എന്ന വെബ്സൈറ്റിൽ ലഭ്യമാണ്. പൂരിപ്പിച്ച അപേക്ഷ ആഗസ്റ്റ് 27 വൈകീട്ട് അഞ്ച് മണിക്കകം തൃശൂർ ഗവ. നേഴ്സിംഗ് സ്‌കൂൾ പ്രിൻസിപ്പാളിന് അയ്ക്കുകയോ നേരിട്ടെത്തിക്കുകയോ ചെയ്യണം.
 

കാണം/വെറുമ്പാട്ടാവകാശഭൂമിക്ക് ജന്മം അനുവദിച്ച് ക്രയസർട്ടിഫിക്കറ്റ് നൽകുന്നതുമായി ബന്ധപ്പെട്ട് തൃശൂർ ലാൻഡ് ട്രൈബ്യൂണൽ ആൻഡ് ഡെപ്യൂട്ടി കളക്ടർ (എൽ ആർ) ആഗസ്റ്റ് 13 ന് തൃശൂർ കളക്ടറേറ്റിൽ നടത്താൻ നിശ്ചയിച്ച എസ്എം കേസുകളുടെ വിചാരണ 2021 മാർച്ച് 18 ലേക്ക് മാറ്റി. ഫോൺ: 0487 -2433449.

കാലവർഷക്കെടുതിയുടെ ഭാഗമായി ജില്ലയിലെ അഞ്ച് താലൂക്കുകളിൽ തുറന്ന 36 ക്യാമ്പുകളിൽ 234 കുടുംബങ്ങളിലെ 748 പേർ കഴിയുന്നു. 309 സ്ത്രീകൾ, 284 പുരുഷൻമാർ, 155 കുട്ടികൾ എന്നിവരാണ് ക്യാമ്പുകളിൽ കഴിയുന്നത്. മുതിർന്ന പൗരൻമാരായ 35 പേർ, ഭിന്നശേഷിക്കാരായ രണ്ടുപേർ, ക്വാറൻൈറനിലുള്ള 33 പേർ എന്നിവരും വിവിധ ക്യാമ്പുകളിലുണ്ട്. തൃശൂർ താലൂക്കിൽ 10 ക്യാമ്പുകളിലായി 92 കുടുംബങ്ങളുണ്ട്. കൊടുങ്ങല്ലൂർ മൂന്ന് ക്യാമ്പുകൾ, 13 കുടുംബങ്ങൾ, ചാലക്കുടി നാല് ക്യാമ്പുകൾ 50 കുടുംബങ്ങൾ, മുകുന്ദപുരം 14 ക്യാമ്പുകൾ 59 കുടുംബങ്ങൾ, ചാവക്കാട് അഞ്ച് ക്യാമ്പുകൾ 20 കുടുംബങ്ങൾ എന്നിങ്ങനെയാണുള്ളത്.
 

ജില്ലയിലെ മുഴുവൻ സ്വകാര്യ ആശുപത്രികളിലും കടുത്ത നിയന്ത്രണങ്ങൾ ഏർപ്പെടുത്താൻ തദ്ദേശ സ്വയംഭരണവകുപ്പ് മന്ത്രി എ.സി. മൊയ്തീന്റെ അധ്യക്ഷതയിൽ കളക്ടറേറ്റിൽ ചേർന്ന യോഗം തീരുമാനിച്ചു. തൃശൂർ അമല മെഡിക്കൽ കോളജ് ആശുപത്രിയിൽ സമ്പർക്ക കേസുകൾ റിപ്പോർട്ട് ചെയ്തതിനെ തുടർന്നാണിത്.

പുതിയ കണ്ടെയ്ൻമെന്റ് സോണുകൾ: കൊരട്ടി ഗ്രാമപഞ്ചായത്ത് 1, 19 വാർഡുകൾ, പാണഞ്ചേരി 7, 8 വാർഡുകൾ മുഴുവനായും 6-ാം വാർഡ് ഭാഗികമായും (കുതിരാൻ മുതൽ കിഴക്കോട്ട്), കൈപ്പറമ്പ് ഗ്രാമപഞ്ചായത്ത് വാർഡ് 4, ചാലക്കുടി നഗരസഭ ഡിവിഷൻ 19, തൃശൂർ കോർപ്പറേഷൻ ഡിവിഷൻ 50.
കണ്ടെയ്ൻമെന്റ് സോണിൽ നിന്ന് ഒഴിവാക്കിയ പ്രദേശങ്ങൾ: കുഴൂർ ഗ്രാമപഞ്ചായത്ത് വാർഡ് 6, കൊടകര വാർഡ് 15, താന്ന്യം വാർഡ് 18, മുളങ്കുന്നത്തുകാവ് വാർഡ് 11, കാട്ടാകാമ്പാൽ വാർഡ് 11, ഇരിങ്ങാലക്കുട നഗരസഭ 9, 10, 12, 34, 36 ഡിവിഷനുകൾ, വടക്കാഞ്ചേരി നഗരസഭ ഡിവിഷൻ 16.