വനമഹോത്സവത്തിന്റെ ഭാഗമായി 13.25 ലക്ഷം രൂപയുടെ വികസന പ്രവർത്തനങ്ങളുമായി മണികിണർ ആദിവാസി കോളനി വലിയ മുന്നേറ്റത്തിന് വഴിയൊരുക്കുകയാണെന്ന് ഗവ ചീഫ് വിപ്പ് കെ രാജൻ അറിയിച്ചു. പീച്ചി വന മഹോൽസവം 2020 ഉദ്ഘാടനം നിർവ്വഹിച്ച് സംസാരിക്കുകയായിരുന്നു അദ്ദേഹം. കോവിഡ് പ്രതിരോധ കിറ്റ് വിതരണത്തിനായി 50,000 രൂപ, എൽപിജി വിതരണത്തിനായി 80500 രൂപ, പി എസ് സി പരിശീലന സഹായ പദ്ധതിക്കായി 10,000 രൂപ, മണിയൻ കിണർ കോളനിക്ക് ചുറ്റും സൗരോർജ്ജ വേലി കെട്ടാൻ 5,30,000 രൂപ, സോളാർ സ്ട്രീറ്റ് ലൈറ്റ് 2,50,000 രൂപ, പോത്തുചാടി- മണിയൻ കിണർ റോഡിനായി 4,00,000 എന്നിങ്ങനെയാണ് തുക വകയിരുത്തിയിരിക്കുന്നത്.

പറപ്പൂക്കരയിൽ സംസ്ഥാന സർക്കാരിന്റെ സപ്ലൈകോ മാവേലി സൂപ്പർ സ്റ്റോർ വരുന്നു. നന്ദിക്കര ദേശീയ പാതയോട് ചേർന്ന് പഴയ പഞ്ചായത്ത് ഓഫീസ് കെട്ടിടത്തിലാണ് സ്റ്റോർ പ്രവർത്തനം ആരംഭിക്കുന്നത്. ജൂലൈ മൂന്നിന് രാവിലെ 11 മണിക്ക് നന്ദിക്കര പഴയ പഞ്ചായത്ത് ഓഫീസിൽ സംസ്ഥാന ഭക്ഷ്യ സിവിൽ സപ്ലൈസ് വകുപ്പ് മന്ത്രി പി തിലോത്തമൻ ഓൺലൈനായി ഉദ്ഘാടനം നിർവ്വഹിക്കും. പൊതുവിദ്യാഭ്യാസ വകുപ്പ് മന്ത്രി സി രവീന്ദ്രനാഥ് അദ്ധ്യക്ഷനാവുന്ന ചടങ്ങിൽ ഗ്രാമപഞ്ചായത്ത് പ്രസിഡന്റ് കാർത്തിക ജയൻ ആദ്യവിൽപ്പന നടത്തും.
 

പ്രത്യേക പരിഗണന അർഹിക്കുന്ന വിദ്യാർത്ഥികൾക്കുള്ള ഓൺലൈൻ പഠന സംവിധാനം ഒരുക്കുന്ന വൈറ്റ് ബോർഡ് പദ്ധതി ആരംഭിച്ചു. പഴയന്നൂർ ബ്ലോക്ക് റിസോഴ്സ് സെന്ററിന്റെ സഹകരണത്തോടെ ആരംഭിച്ച പദ്ധതി യൂ.ആർ.പ്രദീപ് എം.എൽ.എ. ഉദ്ഘാടനം ചെയ്തു. സംസ്ഥാനത്തെ 168 ബി.ആർ.സികൾ പഠന സഹായികൾ തയ്യാറാക്കും. പ്രത്യേക പരിഗണന അർഹിക്കുന്ന വിദ്യർത്ഥികളെ തെരഞ്ഞെടുത്ത് അവർക്ക് വാട്സ്ആപ്പ്, യൂറ്റിയുബ് എന്നിവയിലൂടെയാണ് പഠന പദ്ധതി നടപ്പിലാക്കുക. ഉദ്ഘാടന ചടങ്ങിൽ ബ്ലോക്ക് പ്രസിഡന്റ് വി.തങ്കമ്മ അദ്ധ്യക്ഷയായി. എം.പത്മകുമാർ, ഗായത്രി ജയൻ, വി.ചാന്ദിനി, കെ.എം.സഫിയ തുടങ്ങിയവർ സംസാരിച്ചു.

പുത്തൂർ സുവോളജിക്കൽ പാർക്ക് വനമഹോത്സവം സംസ്ഥാനതല ഉദ്ഘാടനവും, അതിജീവന വനം ഉദ്ഘാടനവും വ്യാഴാഴ്ച (ജൂലൈ 2) രാവിലെ 10 മണിക്ക് വനംവകുപ്പ് മന്ത്രി അഡ്വ കെ രാജു നിർവ്വഹിക്കും. ഗവ. ചീഫ് വിപ്പ് അഡ്വ കെ രാജൻ അധ്യക്ഷത വഹിക്കും. നിലവിലുള്ള ഓഫീസ് കെട്ടിടത്തിന് ചേർന്ന് സ്ഥാപിക്കുന്ന പന്തലിൽ നടക്കുന്ന ഉദ്ഘാടന ചടങ്ങിന് ശേഷം 10.30 ന് മന്ത്രി മാധ്യമങ്ങളെ കാണും.
അതിനുശേഷം അതിജീവന മരം നടൽ, നിർമ്മാണ പ്രവൃത്തികൾ നടക്കുന്ന പ്രദേശം സന്ദർശിക്കും. ഒരു മണിക്ക് പ്രവർത്തന അവലോകനവും സംഘടിപ്പിക്കും.

കോവിഡ് ജാഗ്രതയുടെ ഭാഗമായി വിള ഇൻഷുറൻസ് പദ്ധതിയിൽ ചേരാൻ ഓൺലൈൻ സംവിധാനം. കൃഷിഭവനുകളിൽ നേരിട്ട് പോയി അപേക്ഷകൾ നൽകുന്നതിനുള്ള ബുദ്ധിമുട്ട് ഒഴിവാക്കാനാണിത്. www.aims.kerala.gov.in/cropinsurance എന്ന വെബ്സൈറ്റ് വഴി അപേക്ഷിക്കാം.
മുഴുവൻ കർഷകരെയും പദ്ധതിയിൽ അംഗമാക്കാൻ കൃഷിവകുപ്പ് ജൂലൈ 15 വരെ എല്ലാ പഞ്ചായത്തുകളിലും ക്യാമ്പ് നടത്തും. സംസ്ഥാന വിള ഇൻഷുറൻസ് പദ്ധതിയും കേന്ദ്ര സർക്കാരുമായി ചേർന്ന് രണ്ട് ഇൻഷുറൻസ് പദ്ധതികളണ് നടപ്പിലാക്കുന്നത്. പദ്ധതിപ്രകാരം 27 ഇനം വിളകൾക്കാണ് പരിരക്ഷ. തുച്ഛമായ പ്രീമിയം അടച്ചാൽ വിളകളുടെ ഉൽപാദനം ചെലവിന് ആനുപാതികമായ തുക നഷ്ടപരിഹാരമായി ലഭിക്കും.

അക്രമം തടയുന്നതിനും അക്രമിയെ അറസ്റ്റ് ചെയ്യുന്നതിനും പോലീസിന്റെ മൊബൈൽ ആപ്ലിക്കേഷൻ പൊൽ-ആപ്പ്. അക്രമികളുടേയും സാമൂഹ്യദ്രോഹികളുടേയും അക്രമത്തിനിരയാകുന്ന സ്ത്രീകൾ, കുട്ടികൾ എന്നിവരുടെയും സുരക്ഷയ്ക്കായി പൊൽ ആപ്പിൽ ഒരുക്കിയിരിക്കുന്ന പ്രത്യേക സംവിധാനം എടുത്തുപറയേണ്ട സവിശേഷതയാണ്.

2019-20 വർഷത്തെ കാർഷിക പ്രവർത്തനങ്ങളെ വിലയിരുത്തി കൃഷിവകുപ്പ് മുഖേന വിവിധ കർഷക അവാർഡുകൾക്കും പച്ചക്കറി പദ്ധതി അവാർഡുകൾക്കുമുള്ള അപേക്ഷ ക്ഷണിച്ചു. അപേക്ഷകൾ സ്വീകരിക്കുന്ന അവസാന തീയതി ജൂലൈ 6. കൂടുതൽ വിവരങ്ങൾക്ക് അതാത് കൃഷിഭവനുകളുമായി ബന്ധപ്പെടേണ്ടതാണ്.

ചാലക്കുടി വനം ഡിവിഷൻ വെള്ളിക്കുളങ്ങര റേഞ്ചിലെ മുപ്ലിയം മോഡൽ ഫോറസ്റ്റ് സ്റ്റേഷന്റെയും ബാച്ച്ലർ ക്വാർട്ടേഴ്സിന്റെയും ഉദ്ഘാടനം ചുങ്കാലിൽ വ്യാഴാഴ്ച ( ജൂലായ് 2) രാവിലെ ഒൻപതിന് വനം വകുപ്പ് മന്ത്രി അഡ്വ. കെ രാജു നിർവ്വഹിക്കും. പൊതു വിദ്യാഭ്യാസ വകുപ്പ് മന്ത്രി പ്രൊഫ സി രവീന്ദ്രനാഥ് അധ്യക്ഷത വഹിക്കും. ടി എൻ പ്രതാപൻ എം പി മുഖ്യാതിഥിയാകും. ആദിവാസി കോളനികൾക്കുള്ള മാസ്‌ക്ക് വിതരണവും വനം വകുപ്പ് ജീവനക്കാർക്ക് നൽകുന്ന ആയുർവേദ കോവിഡ് പ്രതിരോധ മരുന്നിന്റെ വിതരണവും വ്യാഴാഴ്ച ( ജൂലായ് 2) നടക്കും.

ജില്ലയിൽ ഒന്നാംതരം മുതൽ പത്താംതരം വരെയുള്ള പാഠപുസ്തകങ്ങളുടെ രണ്ടാംഘട്ട വിതരണം ഒരാഴ്ചയ്ക്കുള്ളിൽ പൂർത്തിയാക്കും. വിതരണത്തിന്റെ ആദ്യഘട്ടം ജൂൺ 30ന് പൂർത്തിയാക്കിയിരുന്നു. വെളിയന്നൂർ പാഠപുസ്തക ഡിപ്പോ, ചേറൂർ ഗവ. എൻജിനീയറിങ് കോളേജ് ഓഡിറ്റോറിയം എന്നിവിടങ്ങളിലായി കുടുംബശ്രീ പ്രവർത്തകരുടെ നേതൃത്വത്തിലാണ് പാഠപുസ്തകങ്ങൾ തരംതിരിക്കുന്നത്. പ്രൈമറി ക്ലാസിലെ പുസ്തകങ്ങൾ ജൂൺ ആദ്യവാരം മുതൽ ജില്ലയിൽ ലഭ്യമായിരുന്നു.

കാർഷിക സർവകലാശാലയുടെ ഭക്ഷ്യ സംസ്‌കരണശാലയിൽ പഴങ്ങൾ കൊണ്ടുവന്ന് മൂല്യവർധിത ഉൽപ്പന്നങ്ങളാക്കുന്ന പദ്ധതിക്ക് ആവശ്യക്കാരേറെ. ജനങ്ങൾ എത്തിക്കുന്ന ഭക്ഷ്യ ഇനങ്ങൾ സംസ്‌കരിച്ച് നൽകുകയാണ് ഇവിടെ. ചക്ക, മാമ്പഴം, ഇഞ്ചി, ജാതിതൊണ്ട്, നേന്ത്രക്കായ, ചെറുപഴം തുടങ്ങിയ ഭക്ഷ്യ ഇന ങ്ങളിൽ നിന്നുമാണ് അവയുടെ മൂല്യവർധിത വസ്തുക്കൾ നിർമ്മിക്കുന്നത്.
സർവകലാശാലയുടെ കോമൺ ഫെസിലിറ്റേഷൻ സെന്ററിന്റെ ഭാഗമാണ് ഈ ഭക്ഷ്യ സംസ്‌കരണശാല. പഴമോ പച്ചക്കറിയോ ഇവിടെ എത്തിക്കാം. ഇതിൽ നിന്നും എന്തെല്ലാം ഇനങ്ങളാണ് വേണ്ടതെന്ന് അറിയിക്കുക. ഇവ തയ്യാറാക്കുന്നതിന് വേണ്ട ചേരുവകളുടെ വിലയും കൂലിയും മാത്രം നൽകിയാൽ മതി.