കിഫ്ബി പദ്ധതിയില്‍ ഉള്‍പ്പെടുത്തി നവീകരിച്ച കടുങ്ങല്ലൂര്‍ വിളയില്‍ ചാലിയപ്പുറം റോഡ്   വീഡിയോ കോണ്‍ഫറന്‍സിങിലൂടെ സംസ്ഥാന പൊതുമരാമത്ത് - രജിസ്‌ട്രേഷന്‍ വകുപ്പ് മന്ത്രി ജി. സുധാകരന്‍ ഉദ്ഘാടനം ചെയ്തു.  എടവണ്ണപ്പാറ ജംങ്ഷനില്‍ നടന്ന ചടങ്ങില്‍ ടി.വി ഇബ്രാഹിം എം.എല്‍.എ അധ്യക്ഷനായി.

മലപ്പുറം ജില്ലയില്‍ മേലെ കോഴിച്ചെനയിലുളള ക്ലാരി ആര്‍.ആര്‍.ആര്‍.എഫ് ക്യാമ്പില്‍ കെട്ടിടങ്ങള്‍ക്ക് ഭീക്ഷണിയായി നില്‍ക്കുന്ന വിവിധ ഇനങ്ങളിലുളള 31 മരങ്ങള്‍ മുറിക്കുന്നതിന് ജൂലൈ എട്ടിന് രാവിലെ 11 ന് ലേലം ചെയ്യും. 60000 രൂപയാണ് നിരതദ്രവ്യം. കൂടുതല്‍ വിവരങ്ങള്‍ക്ക് ഫോണ്‍ : 0494-2489398.

പൊല്‍പുളളി സ്വദേശിനിയായ കല്യാണിയില്‍ നിന്നും ഏറ്റെടുത്ത ഭൂമിയിലെ 18 തെങ്ങുകളിലെ കായ്ഫലം എടുക്കാനുളള അവകാശം ജൂലൈ 10 ന് രാവിലെ 11 ന് പൊല്‍പുളളി വില്ലേജോഫീസില്‍ ലേലം ചെയ്യും.  217/6 സര്‍വേ നമ്പറില്‍ ഉള്‍പ്പെട്ട 14 സെന്റ് ഭൂമിയാണ് ഏറ്റെടുത്തത്.

മേപ്പറമ്പ് ഗവ. യു.പി സ്‌കൂളില്‍ 2020-21 അധ്യയന വര്‍ഷത്തിലെ പാഠപുസ്തക വിതരണത്തോടൊപ്പം അധ്യാപക രക്ഷാകര്‍തൃ സമിതി, സ്‌കൂള്‍ മാനേജ്‌മെന്റ് കമ്മിറ്റി എന്നിവരുടെ സഹകരണത്തോടെ വിദ്യാര്‍ഥികള്‍ക്ക് നോട്ടുപുസ്തക വിതരണം നടത്തി. എസ്.എം.സി ചെയര്‍മാന്‍ നസീര്‍ തൊട്ടിയാന്‍ ഉദ്ഘാടനം ചെയ്തു. പി.ടി.എ പ്രസിഡന്റ്  റഫീഖ്, പ്രധാനാധ്യാപിക കെ. നസീബ, മറ്റു അധ്യാപകര്‍ എന്നിവര്‍ പങ്കെടുത്തു

പാലക്കാട് കോട്ടയ്ക്കകത്ത് പ്രവര്‍ത്തിക്കുന്ന ലാന്‍ഡ് ട്രൈബ്യൂണല്‍ കാര്യാലയത്തില്‍ ജൂലൈയില്‍ വിചാരണയ്ക്ക് വെച്ച എല്ലാ എസ്.എം. കേസുകളിലെ വിചാരണയും മാറ്റി. പുതിയ തീയതി പിന്നീട് അറിയിക്കുമെന്ന് ഭൂപരിഷ്‌കരണം സ്പെഷ്യല്‍ തഹസില്‍ദാര്‍ അറിയിച്ചു.

ജില്ലയില്‍ ഫിഷറീസ് വകുപ്പ് മുഖേന നടപ്പാക്കുന്ന ബയോഫ്ളോക്ക് മത്സ്യകൃഷിയില്‍ താത്പര്യമുളള മത്സ്യ കര്‍ഷകര്‍ക്കും ഗ്രൂപ്പുകള്‍ക്കും അപേക്ഷിക്കാം. സ്വന്തമായോ കുറഞ്ഞത് മൂന്ന് വര്‍ഷം പാട്ടത്തിനെടുത്തതുമായോ ബയോഫ്ളോക്ക് യൂണിറ്റ് നിര്‍മിക്കാന്‍ ആവശ്യമുള്ള സ്ഥലം ഉളളവരും ഗുണഭോക്തൃ വിഹിതം അടയ്ക്കാന്‍ തയാറുളളവരുമാകണം അപേക്ഷകര്‍. താല്‍പര്യമുള്ളവര്‍ തദ്ദേശ സ്വയംഭരണസ്ഥാപനങ്ങളിലെ അക്വാകള്‍ച്ചര്‍ പ്രമോട്ടര്‍മാര്‍ക്കോ മലമ്പുഴ ഫിഷറീസ് ഡെപ്യൂട്ടി ഡയറക്ടര്‍ ഓഫീസിലോ ജൂലൈ നാലിനകം അപേക്ഷ നല്‍കണം. ഫോണ്‍ : 0491-2815245.

ആരോഗ്യം, ഭാരതീയ ചികിത്സ, ഹോമിയോ, എംപ്ലോയീസ് സ്റ്റേറ്റ് ഇന്‍ഷുറന്‍സ്, മൃഗസംരക്ഷണം, നീതിന്യായം, പി.എസ്.സി എന്നിവ ഒഴികെയുളള വകുപ്പുകളില്‍ 2019 ഡിസംബര്‍ വരെ സര്‍വീസില്‍ പ്രവേശിച്ച പാര്‍ട്ട് ടൈം കണ്ടിജന്റ് ജീവനക്കാരുടെ ജില്ലാതല താത്ക്കാലിക/അന്തിമ സീനിയോറിറ്റി ലിസ്റ്റ് പ്രസിദ്ധീകരിച്ചു. ലിസ്റ്റ് ബന്ധപ്പെട്ട വകുപ്പ് മേധാവികള്‍ക്ക് ഇ-മെയിലായി അയക്കുകയും കലക്ടറേറ്റ് നോട്ടീസ് ബോര്‍ഡില്‍ പ്രസിദ്ധീകരിച്ചിട്ടുമുണ്ട്.

കേരള മോട്ടോര്‍ തൊഴിലാളി ക്ഷേമനിധി ബോര്‍ഡിലെ അംഗങ്ങള്‍ക്കുള്ള കോവിഡ് - 19 ധനസഹായത്തിനായി ഓഗസ്റ്റ് 31 വരെ അപേക്ഷിക്കാമെന്ന് ജില്ലാ എക്സിക്യൂട്ടീവ് ഓഫീസര്‍ അറിയിച്ചു. അപേക്ഷ www.kmtwwfb.org ലോ motorworker.kmtwwfb.kerala.gov.in ലോ നല്‍കാവുന്നതാണ്. ഫോണ്‍: 0491-2547437.

പാലക്കാട് ജില്ലാ ആശുപത്രിയിലെ ജില്ലാ മാനസികാരോഗ്യ പദ്ധതിയിലേക്ക് താത്ക്കാലികമായി ഡോക്ടറെ നിയമിക്കുന്നു. എം.ബി.ബി.എസാണ് യോഗ്യത. ടി.സി.എം.സി. രജിസ്ട്രേഷന്‍ നിര്‍ബന്ധം. താത്പര്യമുളളവര്‍ ബയോഡാറ്റയും യോഗ്യതാ സര്‍ട്ടിഫിക്കറ്റിന്റെ പകര്‍പ്പുമായി ജൂലൈ മൂന്നിന് വൈകിട്ട് അഞ്ചിനകം districthospitalpkd@gmail.com ല്‍ അപേക്ഷിക്കണമെന്ന് സൂപ്രണ്ട് അറിയിച്ചു. ഫോണ്‍ : 0491-2533327, 2534524.