അന്താരാഷ്ട്ര ലഹരി വിരുദ്ധദിനത്തിനോടനുബന്ധിച്ച് തൃശ്ശൂർ സിറ്റി പോലീസ് ഷോർട്ട് ഫിലിം മത്സരം സംഘടിപ്പിക്കുന്നു. മയക്കുമരുന്നും യുവതലമുറയും എന്ന വിഷയത്തിലധിഷ്ഠിതമായി രണ്ട് മിനിറ്റിൽ കൂടുതൽ ദൈർഘ്യം വരാത്ത ഹ്രസ്വചിത്രം തയ്യാറാക്കി തൃശ്ശൂർ സിറ്റി പോലീസ് ഫേസ്ബുക്ക് പേജിന്റെ ഇൻബോക്‌സിലേക്ക് പേരും വിലാസവും മൊബൈൽ നമ്പരും സഹിതം എൻട്രികൾ അയക്കാം. വ്യക്തികൾക്കും സന്നദ്ധ സംഘടനകൾക്കും പങ്കെടുക്കാം. ടിക് ടോക് ഉൾപ്പെടെ ഏതു പ്ലാറ്റ്‌ഫോം ഉപയോഗിച്ചും ഹ്രസ്വ ചിത്രം തയ്യാറാക്കാം. മികച്ച മൂന്ന് ചിത്രങ്ങൾക്ക് പാരിതോഷികം നൽകും. എൻട്രികൾ നൽകേണ്ട അവസാന തീയതി ജൂൺ 30.

കുടുംബശ്രീ ജില്ലാ മിഷന് കീഴിൽ വടക്കാഞ്ചേരി, ഇരിങ്ങാലക്കുട നഗരസഭകളിൽ കമ്മ്യൂണിറ്റി ഓർഗനൈസർ തസ്തികയിലേക്ക് അപേക്ഷ ക്ഷണിച്ചു. പ്ലസ് ടു യോഗ്യതയുളള കുടുംബശ്രീ കുടുബാംഗങ്ങളായ വനിതകളായിരിക്കണം അപേക്ഷകർ. താൽപര്യമുളളവർ പ്രായം, യോഗ്യത, പ്രവൃത്തിപരിചയം എന്നിവ തെളിയിക്കുന്ന സർട്ടിഫിക്കറ്റുകളുടെ പകർപ്പ് സഹിതമുളള അപേക്ഷ ജില്ലാ മിഷൻ കോർഡിനേറ്റർ, കുടുംബശ്രീ, സിവിൽ സ്റ്റേഷൻ, അയ്യന്തോൾ, തൃശൂർ 680 003 എന്ന വിലാസത്തിൽ ജൂലൈ നാലിനകം നൽകണം. ഫോൺ: 0487 2362517.

കേരള ബീഡി-ചുരുട്ട് തൊഴിലാളി ക്ഷേമനിധി ബോർഡിൽ നിന്ന് പെൻഷൻ ലഭിച്ചുകൊണ്ടിരിക്കുന്നവരിൽ നാളിതുവരെ മസ്റ്ററിംഗ് ചെയ്തിട്ടില്ലാത്ത ഗുണഭോക്താക്കൾ ജൂൺ 29 മുതൽ ജൂലൈ 15 വരെ അക്ഷയകേന്ദ്രങ്ങളിൽ നേരിട്ടു ഹാജരായി മസ്റ്ററിംഗ് നടത്തണം. ബയോമെട്രിക്ക് മസ്റ്ററിംഗിൽ പരാജയപ്പെടുന്നവർ അക്ഷയകേന്ദ്രങ്ങളിൽ നിന്ന് ലഭിക്കുന്ന പരാജയ സർട്ടിഫിക്കറ്റ് സഹിതം ജൂലൈ 22 നകം ലൈഫ് സർട്ടിഫിക്കറ്റ് ക്ഷേമനിധി ബോർഡിൽ സമർപ്പിച്ച് മസ്റ്ററിംഗ് പൂർത്തീകരിക്കണമെന്ന് ചീഫ് എക്‌സിക്യൂട്ടീവ് ഓഫീസർ അറിയിച്ചു. ഫോൺ: 0497 2706133.

മഴക്കാലത്ത് പാടശേഖരങ്ങളിലും തോടുകളിലും വ്യാപകമായി നടക്കുന്ന മത്സ്യബന്ധനത്തിൽ നിയന്ത്രണവുമായി ഫിഷറീസ് വകുപ്പ.് പ്രജനന സമയമായതിനാൽ മുട്ടയിടാറായ മത്സ്യങ്ങളാണ് കൂട്ടമായി താഴ്ച്ച കുറവുള്ള സ്ഥലം തേടി പാടശേഖരങ്ങളുടെ ഓരങ്ങളിൽ എത്തുന്നത്. അവയെ പിടിക്കുന്നത് മത്സ്യസമ്പത്തിന് തന്നെ ഭീഷണിയാണ്. ഇക്കാര്യത്തിലെ ഗൗരവം ജനങ്ങളിലേക്ക് എത്തിക്കുന്നതിനായാണ് ഫിഷറീസ് വകുപ്പ് മത്സ്യബന്ധന-മത്സ്യകൃഷി നിയന്ത്രണങ്ങൾ നിർദ്ദേശിക്കുന്നത്.

ജില്ലയിൽ വ്യാഴാഴ്ച (ജൂൺ 25) വിവിധ വിമാനത്താവളങ്ങൾ വഴി എത്തിയത് 115 പ്രവാസികൾ. 55 വിമാനങ്ങളിലായാണ് ഇവർ എത്തിയത്. കരിപ്പൂർ 27, നെടുമ്പാശേരി 66, കണ്ണൂർ 10, തിരുവനന്തപുരം 12 എന്നിങ്ങനെയാണ് ഓരോ വിമാനത്താവളത്തിലും എത്തിയ പ്രവാസികളുടെ എണ്ണം. 

കേരള ചുമട്ടു തൊഴിലാളി ക്ഷേമബോര്‍ഡ് ജില്ലാ കമ്മിറ്റിയില്‍ നിന്നും സ്‌കാറ്റേര്‍ഡ് വിഭാഗം പെന്‍ഷന്‍ കൈപ്പറ്റുന്നവരില്‍ ഇതുവരെ മസ്റ്ററിംഗ് നടത്താത്തവര്‍ക്ക് ജൂലൈ 15 വരെ മസ്റ്ററിങ് നടത്താം. വിശദ വിവരങ്ങള്‍ 0474-2749048 നമ്പരില്‍ ലഭിക്കും.
(പി.ആര്‍.കെ നമ്പര്‍ 1724/2020)

മിതമായ നിരക്കില്‍  സാനിറ്റൈസര്‍  ഡിസ്‌പെന്‍സിംഗ്  യൂണിറ്റുകള്‍ നിര്‍മിച്ച് നല്‍കി ചന്ദനത്തോപ്പ് സര്‍ക്കാര്‍ ഐ ടി ഐ. കലക്‌ട്രേറ്റില്‍  സ്ഥാപിക്കേണ്ട ആദ്യ  യൂണിറ്റ് ജില്ലാ കലക്ടര്‍ ബി അബ്ദുല്‍ നാസര്‍, ചന്ദനത്തോപ്പ് ഐ ടി ഐ വൈസ് പ്രിന്‍സിപ്പല്‍ വി രജനിയില്‍  നിന്നും ഏറ്റുവാങ്ങി. ഹാര്‍ബര്‍  മേഖലകളില്‍ ഇത്തരത്തിലുള്ള സംവിധാനം എത്തിക്കുന്നതിനുള്ള നടപടികള്‍ സ്വീകരിക്കുമെന്ന് കലക്ടര്‍ അറിയിച്ചു.

ജില്ലയിലെ വിവിധ ഗ്രാമ പഞ്ചായത്തുകളിലെ പട്ടിക വർഗ കോളനികളിലേക്ക് ഗ്രാമപഞ്ചായത്ത് വകുപ്പിലെ ജീവനക്കാർ നൽകുന്ന 100 ടി വി ചലഞ്ചിന്റെ വിതരണോദ്ഘാടനം ജില്ലാ കളക്ടറുടെ ചേംബറിൽ തദ്ദേശസ്വയംഭരണ വകുപ്പ് മന്ത്രി എ സി മൊയ്തീൻ നിർവ്വഹിച്ചു. കടവല്ലൂർ ഗ്രാമ പഞ്ചായത്ത് പ്രസിഡന്റ് ശോഭന യു പിക്കാണ് ആദ്യ ടി വി നൽകിയത്. നടത്തറ ഗ്രാമ പഞ്ചായത്ത് പ്രസിഡന്റ് അഡ്വ പി ആർ രജിത്തും ടി വി ഏറ്റു വാങ്ങി.

കോവിഡ് 19ന്റെ പശ്ചാത്തലത്തിൽ തൊഴിലാളികൾക്ക് കേരള സംസ്ഥാന അസംഘടിത തൊഴിലാളി സാമൂഹ്യ സുരക്ഷാ ബോർഡ് ധനസഹായം നൽകുന്നു. ജില്ലയിലെ കേരള സംസ്ഥാന അസംഘടിത തൊഴിലാളി സാമൂഹ്യ സുരക്ഷാ ബോർഡിന് കീഴിൽ 2020 മാർച്ച് 31നകം രജിസ്റ്റർ ചെയ്ത തൊഴിലാളികൾക്കാണ് 1000 രൂപ വീതം താൽക്കാലിക ധനസഹായം വിതരണം ചെയ്യുക.
കൈത്തൊഴിലാളി വിദഗ്ധ തൊഴിലാളി ക്ഷേമപദ്ധതി, ബാർബർ - ബ്യൂട്ടിഷൻ ക്ഷേമപദ്ധതി, ഗാർഹിക തൊഴിലാളി, അലക്ക് തൊഴിലാളി, ക്ഷേത്ര ജീവനക്കാർക്കുള്ള ക്ഷേമപദ്ധതി എന്നിവയിൽ ഏതെങ്കിലും പദ്ധതികളിൽ അംഗത്വം എടുത്തവർക്കാണ് ധനസഹായം നൽകുന്നത്.