അമ്മക്കൂടണഞ്ഞ് "അച്യുത്"

ആലപ്പുഴ സ്ത്രീകളുടെയും കുട്ടികളുടെയും ആശുപത്രിക്കു സമീപം സ്ഥാപിച്ചിട്ടുള്ള അമ്മത്തൊട്ടിലിൽ ചൊവ്വാഴ്ച ഉച്ചയ്ക്കു രണ്ടു മണിക്ക്  മൂന്ന് ദിവസം പ്രായവും 2.5കി.ഗ്രാം ഭാരവുമുള്ള ആൺ കുഞ്ഞിനെ ലഭിച്ചു. കഴിഞ്ഞ ഒക്ടോബർ 1 ന് വീണ എന്ന പെൺകുഞ്ഞിനെയും ആലപ്പുഴയിൽ
ലഭിച്ചിരുന്നു. അമ്മത്തൊട്ടിലിൽ എത്തിയ ഉടൻ ഡബ്ല്യു ആൻഡ് സി ആശുപത്രിയിൽ എത്തിച്ച് നടത്തിയ പ്രാഥമിക പരിശോധനയിൽ കുഞ്ഞിന് മറ്റ് ആരോഗ്യ പ്രശ്നങ്ങൾ ഒന്നുമില്ല എന്ന് കണ്ടെത്തി. നിലവിൽ ആശുപത്രി നിരീക്ഷണത്തിലാണ് കുട്ടി.

പുതിയ അതിഥിയുടെ ദത്തെടുക്കൽ നടപടിക്രമങ്ങൾ ആരംഭിക്കേണ്ട തിനാൽ കുരുന്നിന് അവകാശികൾ ആരെങ്കിലുമുണ്ടെങ്കിൽ അടിയന്തരമായി ബന്ധപ്പെടെണമെന്ന് സംസ്ഥാന ശിശുക്ഷേമ സമിതി ജനറൽ സെക്രട്ടറി അഡ്വ.ജി.എൽ. അരുൺ ഗോപി അറിയിച്ചു. ആലപ്പുഴയിൽ ജനിച്ച് കേരളത്തിൻ്റെ
സമരപോരാട്ടങ്ങളിൽ നെടുനായകത്വം വഹിച്ച അന്തരിച്ച മുൻ മുഖ്യമന്ത്രി വി.എസ്. അച്യുതാനന്ദൻ്റെ  സ്മരണാർത്ഥം കുരുന്നിന് "അച്യുത്"
എന്ന് പേരിട്ടതായി ശിശുക്ഷേമ സമിതി ജനറൽ സെക്രട്ടറി അറിയിച്ചു.