ഗ്രാഫ്റ്റ് ചെയ്ത പച്ചക്കറി തൈകൾ വിതരണം ചെയ്തു

മഞ്ഞള്ളൂർ ഗ്രാമപഞ്ചായത്തിൽ ഗ്രാഫ്റ്റ് ചെയ്ത പച്ചക്കറി തൈകൾ വിതരണം ചെയ്തു. വിതരണോദ്ഘാടനം ഗ്രാമപഞ്ചായത്ത് പ്രസിഡൻ്റ് ആൻസി ജോസ് നിർവ്വഹിച്ചു. പഞ്ചായത്തിന്റെ ജനകീയാസൂത്രണം  2023-24 പദ്ധതിയുടെ ഭാഗമായി കൃഷിഭവൻ മുഖേനയാണ്  ഗ്രാഫ്റ്റ് ചെയ്ത പച്ചക്കറിത്തൈകൾ വിതരണം ചെയ്യുന്നത്.

പദ്ധതിയുടെ ഗുണഭോക്തൃ ലിസ്റ്റിൽ ഉൾപ്പെട്ട കർഷകർ 2023 -24 ലെ കരം അടച്ച രസീതിന്റെ  പകർപ്പുമായി കൃഷിഭവനിൽ എത്തിയാൽ പച്ചക്കറി തൈകൾ ലഭ്യമാകും. ഗ്രാഫ്റ്റ് ചെയ്ത വഴുതന, തക്കാളി, മുളക് എന്നീ പച്ചക്കറി തൈകൾ സൗജന്യമായും, ജൈവ വളമായി ട്രൈക്കോഡെർമ സമ്പുഷ്‌ടീകരിച്ച മണ്ണിര കമ്പോസ്റ്റ്, വേപ്പിൻ പിണ്ണാക്ക് മിക്സ്ചർ  25% ഗുണഭോക്തൃ വിഹിതം നൽകിയും വാങ്ങാവുന്നതാണ്.

പച്ചക്കറിവിളകൾ നേരിടുന്ന പ്രധാന രോഗമാണ് ബാക്ടീരിയൽ വാട്ടം.
വഴുതന, തക്കാളി, മുളക് എന്നിവക്കാണ് ഈ രോഗം രൂക്ഷമായി കാണുന്നത്.
വാട്ടരോഗത്തെയും മറ്റ് പ്രശ്നങ്ങളെയും ചെറുക്കാൻ ശേഷിയുള്ള പ്രതിരോധശക്തിയുള്ള ഗ്രാഫ്റ്റ് ചെയ്ത തൈകളാണ് മഞ്ഞള്ളൂർ കൃഷിഭവന്റെ നേതൃത്വത്തിൽ വിതരണത്തിന് എത്തിയിരിക്കുന്നത്. മണ്ണിൽക്കൂടി പടരുന്ന രോഗങ്ങളെ ചെറുത്തുനിൽക്കാൻ പ്രതിരോധശക്തിയുള്ളതാണ് ഈ തൈകൾ.

കൃഷി ഓഫീസർ ടി എം ആരിഫ, അഗ്രോ സർവീസ് സെന്റർ ഫെസിലിറ്റേറ്റർ ഇ എം അനീഫ, കൃഷി വകുപ്പ് ഉദ്യോഗസ്ഥർ, അഗ്രോ സർവീസ് സെന്ററിലെ അംഗങ്ങൾ തുടങ്ങിയവർ പങ്കെടുത്തു.