മികവിന്റെ കേന്ദ്രമായി പൊതുവിദ്യാഭ്യാസ സ്റ്റാൾ

എന്റെ കേരളം മെഗാ എക്സിബിഷനിലെ പൊതു വിദ്യാഭ്യാസ വകുപ്പിന്റെ സ്റ്റാളിൽ തിരക്കേറുന്നു.
മേളയുടെ തുടക്കം മുതൽ ജില്ലയിലെ വിവിധ ബി ആർ സി കളിൽ നിന്നും വിവിധ മേഖലകളിൽ കഴിവ് തെളിയിച്ച വിദ്യാർത്ഥികളുടെ കലാപരമായ കഴിവുകളുടെ പ്രദർശനങ്ങളും വിപണനങ്ങളും നടത്തി മേളയിലെ ശ്രദ്ധാകേന്ദ്രമായി മാറുകയാണ് പൊതു വിദ്യാഭ്യാസ വകുപ്പിന്റെ സ്റ്റാൾ. സമഗ്ര ശിക്ഷാ കേരളം കണ്ണൂർ, ഡയറ്റ് കണ്ണൂർ, കൈറ്റ് എന്നിവയുടെ സഹകരണത്തോടെയാണ് പരിപാടികൾ നടത്തുന്നത്. ഓരോ ദിവസവും രണ്ട് ബി ആർ സി കളിൽ നിന്നായി 15 ഓളം പ്രതിഭകളാണ് പ്രദർശന വിപണനത്തിൽ എത്തുന്നത്.
വെള്ളിയാഴ്ച ചമ്പേരി നിർമ്മല ഹയർ സെക്കണ്ടറി സ്‌കൂൾ വിദ്യാർത്ഥിനിയായ ആൻ മരിയ ബിജു സ്റ്റാളിൽ എത്തുന്നവർക്ക് ആവശ്യാനുസരണം തങ്ങളുടെ പേര് പല കൈ അക്ഷരങ്ങളിൽ എഴുതി നൽകി. ലോക കൈയെഴുത്ത് മത്സരത്തിൽ ഒന്നാം സ്ഥാനക്കാരിയാണ് ആൻ മരിയ ബിജു. ആൻ മരിയയോട് നിരവധി പേരാണ് തങ്ങളുടെ പേര് എഴുതി നൽകാൻ ആവിശ്യപ്പെടുന്നത്.
ഇരിക്കൂർ ഗവ.ഹയർ സെക്കണ്ടറി സ്‌കൂളിലെ ടി സി ഹന ഫാത്തിമ രണ്ട് മണിക്കൂർ കൊണ്ട് പെൻസിൽ ഉപയോഗിച്ച് നാല് ചാർട്ടുകളിൽ വരച്ചെടുത്ത പീലി വിടർത്തി നിൽക്കുന്ന മയിലിന്റെ ചിത്രം പ്രദർശനത്തിനുണ്ട്്. ഇന്ത്യ ബുക്ക് ഓഫ് റെക്കോർഡ് 2022 എന്ന നേട്ടം ഹനയുടെ ഈ ചിത്രത്തിനുണ്ട്. ഹനയുടെ മറ്റ് ചിത്രങ്ങളുടെ പ്രദർശനവും, ലൈവ് ചിത്ര രചനയും സ്റ്റാളിൽ ഒരുക്കിയിട്ടുണ്ട്. പൈസക്കരി യു പി സ്‌കൂളിലെ ഗൗതം കൃഷ്ണ സ്റ്റാളിൽ എത്തുന്നവർക്ക് പേപ്പർ ഉപയോഗിച്ച് പൂക്കൾ നിർമ്മിച്ച് നൽകുന്നു. വാൾ ഡക്കറേഷനിലും കഴിവ് തെളിയിച്ചിട്ടുണ്ട് ഈ ഏഴാം ക്ലാസുകാരൻ. ശ്രീകണ്ഠാപുരം ഗവൺമെന്റ് ഹയർ സെക്കൻഡറി സ്‌കൂളിലെ വിദ്യാർഥികൾ ആരംഭിച്ച വിദ്യാഗീതം അറിവിന്റെ പുതിയ ആകാശം എന്ന പേരിൽ ആറു വർഷം മുൻപ് തുടങ്ങിയ റേഡിയോയുടെ ശബ്ദവും ആസ്വദിക്കാം. ഇതിന് പുറമെ ിന്നശേഷി വിദ്യാർത്ഥികളുടെ കുടകളുടെ പ്രദർശനം, വിപണനം, സോപ്പ് നിർമ്മാണം, വിപണനം, ഹാന്റ് റൈറ്റിംങ്, യോഗ പ്രദർശനം കളരി, ഏറോബിക്ക് തുടങ്ങി വിവിധവിഭാഗങ്ങളിലുമുള്ള വിദ്യാർത്ഥികളുടെ പരിപാടികൾ എല്ലാ ദിവസവും സ്റ്റാളിൽ സജ്ജമാക്കിയിട്ടുണ്ട്.