ചെറുതോണി - ഇടുക്കി അണക്കെട്ട് ഓണാവധിയില്‍ എത്തിയത് 20749 പേര്‍

ഓണാവധിയുടെ ഭാഗമായി സഞ്ചാരികള്‍ക്കായി തുറന്നു കൊടുത്ത ചെറുതോണി - ഇടുക്കി അണക്കെട്ടില്‍ സന്ദര്‍ശക പ്രവാഹം. ഓണാവധി തീര്‍ന്ന ഞായറാഴ്ച മാത്രം സന്ദര്‍ശിച്ചത് 2431 പേരാണ്. ഒക്ടോബര്‍ 1 നാണ് ഡാമുകളില്‍ സന്ദര്‍ശനാനുമതി നല്‍കിയത്. ഇതുവരെ 18623 മുതിര്‍ന്നവരും 2126 കുട്ടികളുമാണ് സന്ദര്‍ശിച്ചത്. ഏറ്റവും കൂടുതല്‍ പേര് മൂന്നാം ഓണനാളിലാണ് എത്തിയത്. കുട്ടികളും മുതിര്‍ന്നവരുമടക്കം 4215 പേര്‍ അന്നേദിവസം അണക്കെട്ട് സന്ദര്‍ശിച്ചു.
25 രൂപയാണ് മുതിര്‍ന്നവര്‍ക്ക്. കുട്ടികള്‍ക്ക് പത്തു രൂപയും.  ചെറുതോണി - ഇടുക്കി അണക്കെട്ടുകള്‍ക്കിടയില്‍ 2 കിലോമീറ്ററോളം ദൂരമുണ്ട്. ഇത്രയും ദൂരം നടന്നു  സഞ്ചരിക്കാന്‍ സാധിക്കാത്തവര്‍ക്കായി ബഗ്ഗി കാറുകള്‍ ഉണ്ട്. ഇതിനു 50 രൂപയുടെ ടിക്കറ്റ് എടുക്കണം.
അണക്കെട്ട് സന്ദര്‍ശിക്കുന്നതിനോടൊപ്പം വനംവകുപ്പിന്റെ ബോട്ടിങ്ങും അണക്കെട്ടിനോട് ചേര്‍ന്ന് ഡി.റ്റി.പി.സിയുടെ ഹില്‍വ്യൂ പാര്‍ക്കുമുണ്ട്. നവംബര്‍ 30 വരെയാണ് അണക്കെട്ട് സന്ദര്‍ശിക്കാനുള്ള അനുമതി.