എല്ലാവര്‍ക്കും എല്‍പിജി കണക്ഷന്‍ഃ വയനാട് പുകരഹിത ജില്ലയാകും
ഗ്രാമസ്വരാജ് അഭിയാന്‍ പദ്ധതി പ്രകാരം പുകരഹിത ജില്ലയായി വയനാടിനെ പ്രഖ്യാപിക്കുന്നതിന്റെ ഭാഗമായി എല്ലാ വീടുകളിലും എല്‍പിജി ഗ്യാസ് കണക്ഷന്‍ നല്‍കുന്ന പദ്ധതി ജില്ലയില്‍ പുരോഗമിക്കുന്നു. പ്രധാനമന്ത്രി ഉജ്ജ്വല യോജന പദ്ധതിക്ക് ജില്ലയില്‍ അപേക്ഷ സ്വീകരിച്ചു തുടങ്ങി. ജില്ലയിലെ അരലക്ഷത്തോളം പേര്‍ക്ക് പദ്ധതിയുടെ ഗുണം ലഭിക്കും. നിലവില്‍ 10 ശതമാനം പേരാണ് പദ്ധതിയുടെ ഭാഗമായിട്ടുള്ളത്. ആഗസ്റ്റ് ആദ്യവാരം മുഴുവന്‍ ഗുണഭോക്താക്കള്‍ക്കും ഗ്യാസ് കണക്ഷന്‍ ലഭ്യമാക്കാനാണ് ലക്ഷ്യം. ദാരിദ്ര രേഖയ്ക്കു താഴെയുള്ള കുടുംബങ്ങളിലെ മുതിര്‍ന്ന സ്ത്രീകളുടെ പേരിലാണ് കണക്ഷന്‍ നല്‍കുന്നത്. കണക്ഷന്‍ പൂര്‍ണ്ണമായും സൗജന്യമായിരിക്കും. ഗ്യാസ് സ്റ്റൗവ് അടക്കമുള്ളവ ലോണ്‍ വ്യവസ്ഥയില്‍ ലഭ്യമാക്കും.
ഗ്രാമപ്രദേശങ്ങളില്‍ പ്രധാനമന്ത്രി ആവാസ യോജന പദ്ധതിയുടെ ഉപഭോക്താക്കള്‍ക്കും പദ്ധതിയുടെ പ്രയോജനം ലഭിക്കും. കൂടാതെ മുഴുവന്‍ എസ്.എസി/ എസ്.ടി കുടുംബങ്ങള്‍, അന്ത്യോദയ അന്ന യോജന (എ.എ.വൈ) റേഷന്‍ കാര്‍ഡുടമകള്‍, വനാതിര്‍ത്തിയില്‍ താമസിക്കുന്നവര്‍, ഏറ്റവും പിന്നോക്ക വിഭാഗക്കാര്‍ (എം.ബി.സി), പ്ലാന്റേഷനുകളില്‍ താമസിക്കുന്നവര്‍, പുഴയോരത്തും ദ്വീപിലും താമസിക്കുന്ന സാധാരക്കാര്‍ എന്നിവരാണ് പദ്ധതിയുടെ പ്രധാന ഗുണഭോക്താക്കള്‍.
പദ്ധതിയില്‍ ഉള്‍പ്പെട്ടവരും അര്‍ഹരായവരും വിവിധ തിരിച്ചറിയല്‍ രേഖകള്‍ നോഡല്‍ ഓഫീസര്‍മാരെയോ വിതരണക്കാരെയോ ഏല്‍പ്പിക്കണം. ഗുണഭോക്താവിന്റെ ആധാര്‍ കാര്‍ഡും ലഭ്യമാകുമെങ്കില്‍ കുടുംബത്തിലെ പ്രായപൂര്‍ത്തിയായ മറ്റൊരാളുടെ ആധാര്‍ നമ്പറും കണക്ഷന്‍ ലഭിക്കുന്നതിനായി നല്‍കണം. കൂടാതെ ഗുണഭോക്താവന്റെ ബാങ്ക് അക്കൗണ്ട് വിവരങ്ങള്‍, റേഷന്‍ കാര്‍ഡ്, വിഭാഗം/ജാതി തെളിയിക്കുന്ന സര്‍ട്ടിഫിക്കറ്റ് എന്നിവയാണ് പ്രധാനമായും അപേക്ഷകര്‍ സമര്‍പ്പിക്കേണ്ടത്. അര്‍ഹതപ്പെട്ടവരുടെയിടയില്‍ വിവാഹമോചനം, വേര്‍പിരിഞ്ഞു ജീവിക്കുന്നവര്‍, എന്നിവരുടെ സര്‍ട്ടിഫക്കറ്റുകള്‍ പരിശോധിച്ച് ആധാര്‍ നമ്പര്‍ മാത്രം സ്വീകരിച്ചും ഗ്യാസ് കണക്ഷന്‍ ലഭ്യമാക്കും. എ.എ.വൈ റേഷന്‍ കാര്‍ഡില്ലാത്ത എസ്.സി./ എസ്.ടി കുടുംബങ്ങള്‍ താലൂക്ക് ഓഫീസില്‍ നിന്നും ലഭിക്കുന്ന സര്‍ട്ടിഫിക്കറ്റ് ഹാജരാക്കിയാല്‍ മതിയാവുമെന്ന് ജില്ലാ സപ്ലൈ ഓഫീസര്‍ അറിയിച്ചു. അപേക്ഷ ഫോമുകള്‍ ഗ്യാസ് ഏജന്‍സികളില്‍ നിന്നും ലഭിക്കും. ഗുണഭോക്താക്കള്‍ അടുത്തുള്ള വിതരണക്കാരെ സമീപിക്കണം. ഇതിനായി കമ്പനികളുടെ 15 ഏജന്‍സികളും ജില്ലയില്‍ സജീവമാണ്. കൂടുതല്‍ വിവരങ്ങള്‍ക്ക് - ചെറിയതോട്ടം ഭാരത് ഗ്യാസ് - 9447107155, 9947915501, പുത്തന്‍പുരയ്ക്കല്‍ ഭാരത് ഗ്യാസ് - 9744498646, പുല്‍പ്പള്ളി ഭാരത് ഗ്യാസ് - 9447316615, ഗായത്രി ഭാരത് ഗ്യാസ് - 9446838480.
- Log in to post comments