അതുല്യം പ്ലാസ്റ്റിക് വിമുക്ത ബാല്യം: ഉദ്ഘാടനം ഇന്ന്

ഹരിത കേരള മിഷനുമായി കൈകോര്‍ത്ത് പെരുമ്പടപ്പ് ബ്ലോക്ക് പഞ്ചായത്ത് നടപ്പിലാക്കുന്ന 'അതുല്യം പ്ലാസ്റ്റിക് വിമുക്ത ബാല്യം' പദ്ധതി ഇന്ന് (ജൂലൈ 21) സ്പീക്കര്‍ പി. ശ്രീരാമകൃഷ്ണന്‍ ഉദ്ഘാടനം ചെയ്യും. പദ്ധതിയിലൂടെ 2400 പ്രൈമറി വിദ്യാര്‍ത്ഥികള്‍ക്കാണ് സ്റ്റീല്‍ തെര്‍മല്‍ ഫ്‌ളാക്‌സും ചോറ്റുപാത്രവും വിതരണം ചെയ്യുന്നത്. 2018 -19 വാര്‍ഷിക പദ്ധതിയില്‍ ഉള്‍പ്പെടുത്തിയാണ് പദ്ധതികള്‍ നടപ്പിലാക്കുന്നത്. ബ്ലോക്ക് പഞ്ചായത്തിന് കീഴിലെ വെളിയങ്കോട്, പെരുമ്പടപ്പ്, നന്നംമുക്ക്, ആലങ്കോട്, മാറഞ്ചേരി ഗ്രാമപ്പഞ്ചായത്തുകളിലെ സര്‍ക്കാര്‍ സ്‌കൂളുകളിലെ പ്രൈമറി വിദ്യാര്‍ത്ഥികള്‍ക്കാണ് 13 ലക്ഷം ചെലവഴിച്ച്   സൗജന്യമായി സ്റ്റീല്‍ തെര്‍മല്‍ ഫ്‌ളാക്‌സും ചോറ്റുപാത്രവും  നല്‍കുന്നത്. കൂടാതെ സര്‍ക്കാര്‍ സ്‌കൂളുകളില്‍ അഞ്ച് മുതല്‍ ഏഴ് വരെ പഠിക്കുന്ന വെളിയങ്കോട്, പെരുമ്പടപ്പ് ഗ്രാമപ്പഞ്ചായത്തുകളിലെ ഫിഷറീസ് വകുപ്പ് അംഗീകരിച്ച മത്സ്യത്തൊഴിലാളികളുടെ  മക്കള്‍ക്ക്  സൗജന്യമായി സൈക്കിള്‍  വിതരണം ചെയ്യും. എട്ട് ലക്ഷം രൂപ ചെലവഴിച്ച് ഇപ്രകാരം 180 വിദ്യാര്‍ത്ഥികള്‍ക്കാണ് സൈക്കിള്‍ നല്‍കുന്നത്. അതോടൊപ്പം വെളിയങ്കോട് ജി.എഫ്.എല്‍.പി സ്‌കൂളിന്റെ അടിസ്ഥാന സൗകര്യ വികസനത്തിന്  നടപ്പിലാക്കുന്ന അഞ്ച് ലക്ഷം രൂപയുടെ പദ്ധതിയും ഉദ്ഘാടനം ചെയ്യും.
രാവിലെ പത്ത് മണിക്ക് വെളിയങ്കോട് ഗവ. ഫിഷറീസ് എല്‍പി സ്‌കൂളില്‍ നടക്കുന്ന ചടങ്ങില്‍ പെരുമ്പടപ്പ് ബ്ലോക്ക് പഞ്ചായത്ത് പ്രസിഡന്റ് പിഎം ആറ്റുണ്ണി തങ്ങള്‍ അധ്യക്ഷനാവും.