ഭരണഭാഷാ വാരാഘോഷം: സര്‍ക്കാര്‍ ജീവനക്കാര്‍ക്കായി ക്വിസ് മത്സരം സംഘടിപ്പിച്ചു

ഭരണഭാഷാ വാരാഘോഷത്തോടനുബന്ധിച്ച് മലപ്പുറം ജില്ലാ ഭരണകൂടവും ജില്ലാ ഇന്‍ഫര്‍മേഷന്‍ ഓഫീസും സംയുക്തമായി ജില്ലയിലെ സര്‍ക്കാര്‍ ജീവനക്കാര്‍ക്ക് ക്വിസ് മത്സരം സംഘടിപ്പിച്ചു. മത്സരത്തില്‍ കിഫ്ബി എൽ.എ. ഓഫീസിലെ ക്ലാർക്ക് കൃഷ്ണന്‍ മങ്കട ഒന്നാം സ്ഥാനവും വനിതാ സംരക്ഷണ ഓഫീസിലെ കെ. മുനവ്വിര്‍ രണ്ടാം സ്ഥാനവും പോരൂര്‍ ജി.എച്ച്.എസ്.എസ് ക്ലര്‍ക്ക് എന്‍.പി ചിത്രേഷ് മൂന്നാം സ്ഥാനവും നേടി. സെയ്ദു പുലാശ്ശേരി, കെ. സജീഷ് എന്നിവര്‍ എ പ്ലസ് ഗ്രേഡ് നേടി.

കളക്ടറേറ്റ് കോണ്‍ഫറന്‍സ് ഹാളില്‍ നടന്ന മത്സരത്തിലെ വിജയികള്‍ക്ക് ജില്ലാ കളക്ടര്‍ വി.ആര്‍ വിനോദ് സമ്മാന ദാനം നടത്തി. എ.ഡി.എം മുഹമ്മദ് റഫീഖ് സി., അസി. കലക്ടര്‍ വി.എം ആര്യ, ജില്ലാ ഇന്‍ഫര്‍മേഷന്‍ ഓഫിസര്‍ കെ. മുഹമ്മദ്, അസി. എഡിറ്റര്‍ ഐ.ആര്‍ പ്രസാദ്, അസി. ഇൻഫർമേഷൻ ഓഫീസർ നൗഷാദ് എ.പി തുടങ്ങിയവര്‍ സംബന്ധിച്ചു. കോഴിക്കോട് ജില്ലാ അസി. ഇന്‍ഫര്‍മേഷന്‍ ഓഫിസര്‍ അമിയ മീത്തല്‍ മത്സരം നിയന്ത്രിച്ചു.