സ്‌കില്‍ ഡെവലപ്പ്‌മെന്റ് സെന്റര്‍ ബ്രോഷര്‍ പ്രകാശനം ചെയ്തു
പൊതു വിദ്യാഭ്യാസ വകുപ്പ് വണ്ടൂര്‍ ഗവ. വൊക്കേഷണല്‍ ഹയര്‍സെക്കന്‍ഡറി സ്‌കൂളില്‍ പുതുതായി ആരംഭിക്കുന്ന സ്‌കില്‍ ഡെവലപ്‌മെന്റ് സെന്റര്‍ ബ്രോഷര്‍ എ.പി അനില്‍ കുമാര്‍ എം.എല്‍.എ പ്രകാശനം ചെയ്തു. പി.ടി.എ പ്രസിഡന്റ് ശരീഫ് തുറക്കല്‍ അധ്യക്ഷത വഹിച്ചു. ജില്ലാ പഞ്ചായത്ത് അംഗം കെ.ടി അജ്മല്‍, ഗ്രാമപഞ്ചായത്ത് പ്രസിഡന്റ് വി.എം സീന, വൈസ് പ്രസിഡന്റ് സിദ്ധീഖ് പട്ടിക്കാടന്‍,ബ്ലോക്ക് പഞ്ചായത്ത് അംഗം കെ.സി കുഞ്ഞുമുഹമ്മദ്, പ്രിന്‍സിപ്പല്‍ ഒ.വിനോദ്, വി.എച്ച്.എസ്.സി പ്രിന്‍സിപ്പല്‍ എം.ഐശ്വര്യ, പ്രധാനാധ്യാപിക സത്യവതി, സ്‌കില്‍ സെന്റര്‍ കോര്‍ഡിനേറ്റര്‍ പി.അന്‍ഫാസ് തുടങ്ങിയവര്‍ സംസാരിച്ചു.
ഔപചാരിക വിദ്യാഭ്യാസത്തോടൊപ്പം കുട്ടികളില്‍ തൊഴില്‍ നൈപുണ്യം വളര്‍ത്തിയെടുക്കുക എന്ന ലക്ഷ്യത്തോടെ സമഗ്ര ശിക്ഷാ കേരള, സ്റ്റാര്‍സ് പദ്ധതിയുടെ ഭാഗമായി ആരംഭിക്കുന്ന സ്‌കില്‍ ഡെവലപ്‌മെന്റ് സെന്ററില്‍ കോഡ്മാറ്റോളജിസ്റ്റ്, ബേക്കിങ് ടെക്‌നീഷ്യന്‍ എന്നീ രണ്ട് ജോബ് റോളുകളാണ് അനുവദിച്ചിരിക്കുന്നത്. എസ്.എസ്.എല്‍.സി വിദ്യാഭ്യാസ യോഗ്യതയുള്ളവര്‍ക്ക് അപേക്ഷിക്കാം. ശനി, ഞായര്‍ ദിവസങ്ങളിലും മറ്റു പൊതു അവധി ദിവസങ്ങളിലും ആയിരിക്കും ക്ലാസ് നടക്കുന്നത്. ഒരു വര്‍ഷംദൈര്‍ഘ്യമുള്ള കോഴ്‌സും മൂല്യനിര്‍ണയവും വിജയകരമായി പൂര്‍ത്തിയാക്കുന്ന വിദ്യാര്‍ത്ഥികള്‍ക്ക് സര്‍ക്കാര്‍ അംഗീകൃത സ്‌കില്‍ സര്‍ട്ടിഫിക്കറ്റ് ലഭിക്കും.
- Log in to post comments