പച്ചമലയാളം കോഴ്സ് : ആദ്യ ബാച്ചിൽ 30 പേർ പരീക്ഷ എഴുതി

കേരള സംസ്ഥാന സാക്ഷരതാമിഷന്‍ അതോറിറ്റി നടപ്പാക്കുന്ന പച്ചമലയാളം അടിസ്ഥാന കോഴ്‌സിൻ്റെ ആദ്യ ബാച്ച് പൊതുപരീക്ഷ നടത്തി.

ആലപ്പുഴ ഗവൺമെന്റ് ഗേൾസ് ഹയർ സെക്കൻഡറി സ്കൂളിൽ നടന്ന പരീക്ഷയിൽ 30 പേർ പങ്കെടുത്തു. ഇതിൽ 29 പേരും സ്ത്രീകളായിരുന്നു. ഒരു ഭിന്നശേഷി പഠിതാവും പരീക്ഷ എഴുതി. സംസ്ഥാന സാക്ഷരതാ മിഷൻ ഡയറക്ടർ എ ജി ഒലീന പരീക്ഷാകേന്ദ്രം സന്ദർശിച്ചു. ജില്ലാ കോർഡിനേറ്റർ കെ വി രതീഷ്, അധ്യാപിക സവിത ശശികുമാർ, സെൻ്റർ കോർഡിനേറ്റർ എം.ഉഷ, ഓഫീസ് അസിസ്റ്റന്റ് എം. മഞ്ജു എന്നിവർ പരീക്ഷയ്ക്ക് നേതൃത്വം നൽകി.

മലയാളം മീഡിയത്തിൽ പഠിക്കാന്‍ അവസരം ലഭിക്കാത്തവര്‍ക്കും മലയാളത്തില്‍ സാമാന്യ പരിജ്ഞാനം ആഗ്രഹിക്കുന്നവർക്കുമായി പൊതുവിദ്യാഭ്യാസ വകുപ്പ് തയ്യാറാക്കിയതാണ് പച്ചമലയാളം കോഴ്സ്. എസ് സി ഇ ആർ ടി യാണ് കോഴ്സിൻ്റെ അക്കാദമിക് കാര്യങ്ങൾ നിർവ്വഹിക്കുന്നത്. കോഴ്സിൻ്റെ നടത്തിപ്പ് ചുമതല സംസ്ഥാന സാക്ഷരതാമിഷനാണ്.

സാക്ഷരതാമിഷൻ്റെ നിലവിലുണ്ടായിരുന്ന നാലുമാസം ദൈര്‍ഘ്യമുള്ള പച്ചമലയാളം സര്‍ട്ടിഫിക്കറ്റ് കോഴ്‌സ് രണ്ടു ഭാഗങ്ങളായി പൂര്‍ത്തിയാകുന്ന രീതിയില്‍ പരിഷ്‌കരിച്ചാണ് പുതിയ കോഴ്‌സ് ആരംഭിച്ചത്. പച്ചമലയാളം അടിസ്ഥാന കോഴ്സ്, പച്ചമലയാളം അഡ്വാന്‍സ്ഡ് കോഴ്‌സ് എന്നിങ്ങനെ ഒരു വര്‍ഷം ദൈര്‍ഘ്യമുള്ള രണ്ട് കോഴ്സായി എസ്.സി.ഇ.ആര്‍.ടിയുടെ നേതൃത്വത്തിലാണ് പരിഷ്‌കരിച്ചത്. 

ഒന്നുമുതല്‍ പത്തുവരെയുള്ള ക്ലാസുകളില്‍ നേടേണ്ട മലയാള ഭാഷാപഠനശേഷികള്‍ സ്വായത്തമാക്കാന്‍ പര്യാപ്തമായ രീതിയിലാണ് പരിഷ്‌കരിച്ച പച്ചമലയാളം കോഴ്സ് വിഭാവനം ചെയ്തിട്ടുള്ളത്. പച്ചമലയാളം കോഴ്‌സ് ഒരു തുല്യതാകോഴ്‌സാണ്. സര്‍ക്കാര്‍ ജീവനക്കാര്‍ക്ക് പത്താം ക്ലാസ് മലയാളപഠനം നിര്‍ബന്ധമായതിനാലാണ് ഈ കോഴ്‌സിന്റെ പരിഷ്‌കരണം നടത്തിയത്.

60 മണിക്കൂര്‍ മുഖാമുഖവും 30 മണിക്കൂര്‍ ഓണ്‍ലൈനുമായാണ് പച്ചമലയാളം അടിസ്ഥാന കോഴ്സിന്റെ ക്ലാസുകള്‍. ഞായറാഴ്ചകളിൽ ആലപ്പുഴ മുഹമ്മദൻസ് ഗേൾസ് ഹയർ സെക്കൻഡറി സ്കൂളിൽ സമ്പർക്ക പഠനക്ലാസ് ഉണ്ടായിരിക്കും.

അടിസ്ഥാനകോഴ്സില്‍ വിജയിക്കുന്നവര്‍ക്ക് അഡ്വാന്‍സ്ഡ് കോഴ്‌സില്‍ ചേര്‍ന്ന് പഠിക്കാം. ആറ് മാസമാണ് അടിസ്ഥാന കോഴസിന്റെ കാലാവധി. രജിസ്‌ട്രേഷന്‍ ഫീസ് 500 രൂപയും കോഴ്‌സ് ഫീസ് 3500 രൂപയുമാണ്. അപേക്ഷകർക്ക് 17 വയസ് പൂർത്തിയായിരിക്കണം

വിശദവിവരങ്ങള്‍ക്ക് 04772252095 എന്ന നമ്പരിൽ വിളിയ്ക്കുകയോ 9947528616 എന്ന നമ്പരിലേയ്ക്ക് വാട്സാപ്പ് സന്ദേശം അയക്കുകയോ ചെയ്യാവുന്നതാണെന്ന് സാക്ഷരതാമിഷൻ ജില്ലാ കോർഡിനേറ്റർ അറിയിച്ചു.

വിവിധ ഗ്രാമ / ബ്ലോക്ക് / നഗരസഭകളിൽ പ്രവർത്തിക്കുന്ന സാക്ഷരത പ്രേരക്മാർ വഴി രജിസ്ട്രേഷൻ നടപടികൾ ചെയ്യാനാകുമെന്ന് ജില്ലാ കോ-ഓർഡിനേറ്റർ അറിയിച്ചു.

http://www.literacymissionkerala.org എന്ന വെബ് സൈറ്റിൽ രജിസ്ട്രേഷൻ വിവരങ്ങൾ ലഭിക്കുന്നതാണ്.