*വ്യവസായ ഉത്പന്ന പ്രദർശന വിപണന മേള ഇന്ന് മുതൽ*

ജില്ലാ വ്യവസായ കേന്ദ്രത്തിന്റെ ആഭിമുഖ്യത്തിൽ നടവയൽ സെന്റ് തോമസ് സ്കൂൾ ഗ്രൗണ്ടിൽ നടത്തുന്ന
വയനാട് ഇൻഡസ്ട്രിയൽ എക്സ്പോ ഇന്ന് (ഡിസംബർ 25) വൈകുന്നേരം മൂന്നിന് പട്ടികജാതി-പട്ടികവർഗ പിന്നാക്ക ക്ഷേമ വകുപ്പ് മന്ത്രി ഒ.ആർ കേളു ഉദ്ഘാടനം ചെയ്യും. നടവയൽ ഫെസ്റ്റിനോടനുബന്ധിച്ചാണ് വ്യാവസായിക ഉത്പന്ന പ്രദർശന–വിപണന മേള സംഘടിപ്പിക്കുന്നത്.
ജില്ലയിലെ വ്യവസായ മേഖലയുടെ ശേഷിയും വൈവിധ്യവും പൊതുജനങ്ങൾക്ക് പരിചയപ്പെടുത്തുന്ന പ്രദർശന- വിപണന മേള ജനുവരി ഒന്ന് വരെ നടവയൽ സെന്റ് തോമസ് സ്കൂൾ ഗ്രൗണ്ടിൽ നടക്കും. ജില്ലയിലെ 40-ൽ പരം എം.എസ്.എം.ഇ യൂണിറ്റുകൾ ഉൽപ്പന്നങ്ങളുമായി പങ്കെടുക്കും. തേൻ, മുള, കാപ്പി എന്നിവയിൽ നിന്നുള്ള മൂല്യവർദ്ധിത ഉത്പന്നങ്ങൾ, മൺപാത്രങ്ങൾ, കൈത്തറി–ഹസ്തകല ഉത്പന്നങ്ങൾ എന്നിവയുൾപ്പെടെ വൈവിദ്ധ്യമാർന്ന വ്യവസായ ഉത്പന്നങ്ങൾ സ്റ്റാളുകളിൽ അണിനിരത്തും. പൊതുജനങ്ങൾക്ക് എല്ലാ ദിവസവും രാവിലെ 11 മുതൽ രാത്രി ഒൻപത് വരെ മേള സന്ദർശിക്കാം. പ്രാദേശിക സംരംഭകരെ പ്രോത്സാഹിപ്പിക്കുകയും, വയനാടിന്റെ വ്യവസായ സാധ്യതകൾ  അവതരിപ്പിക്കുകയും ചെയ്യുന്ന വിപണന മേള പൊതുജനങ്ങൾക്കും വ്യാപാരികൾക്കും പ്രയോജനകരമാവുമെന്ന്  സംഘാടകർ അറിയിച്ചു.