*ക്യൂ നിന്ന് മടുക്കേണ്ട: സ്മാര്ട്ടായി വയനാട്ടിലെ ഒ പികള്*
ജില്ലയിലെ സര്ക്കാര് ആരോഗ്യ കേന്ദ്രങ്ങളില് നിന്നും ഇ-ഹെല്ത്ത് വഴി ഓണ്ലൈനായി ഒ.പി ടിക്കറ്റ് ബുക്ക് ചെയ്യാവുന്ന സംവിധാനം പൂര്ണ സജ്ജമായതായി ജില്ലാ മെഡിക്കല് ഓഫീസര് (ആരോഗ്യം) ഡോ. കെ.ടി രേഖ അറിയിച്ചു. ആശുപത്രികളില് ഒ പിക്കുവേണ്ടി ക്യൂ നില്ക്കേണ്ട ആവശ്യമില്ല. യു.എച്ച്.ഐ.ഡി ഉപയോഗിച്ച് ആശുപത്രികളിലെ ഔട്ട് പേഷ്യന്റ് പരിശോധനയും സേവനങ്ങളും ബുക്ക് ചെയ്യാം. പൊതുജനങ്ങള്ക്ക് മൊബൈല് ഫോണിലൂടെ ഈ സേവനങ്ങള് എളുപ്പത്തില് ലഭ്യമാക്കുന്നതിനായി എംഇ ഹെല്ത്ത് (MeHEALTH) എന്ന മൊബൈല് ആപ്ലിക്കേഷന് പ്രവര്ത്തനസജ്ജമാണ്.
ആധാര് നമ്പര് കൊടുത്ത് യു എച്ച് ഐ ഡി ഈ ആപ്പ് വഴി സ്വയം എടുക്കാം. കേരളത്തിലെ ഏത് സര്ക്കാര് ആശുപത്രിയിലെയും ഒ പി പരിശോധനക്കുള്ള ടിക്കറ്റ് ആപ്പ് വഴി എടുക്കാം. തൊട്ടടുത്തുള്ള ആശുപത്രികളും 10 കിലോമീറ്റര് ചുറ്റളവിലുള്ള സര്ക്കാര് ആശുപത്രികളും അവയിലേക്കുള്ള ദൂരവും എളുപ്പത്തില് കണ്ടെത്താം. ഗൂഗിള് മാപ്പിന്റെ സഹായത്തോടെ ആശുപത്രിയിലേക്കുള്ള റൂട്ടും ആപ്പില് ലഭിക്കും. ഏത് ആശുപത്രികളിലാണ് സ്പെഷ്യാലിറ്റി ഡോക്ടര്മാരുള്ളതെന്ന് എളുപ്പം അറിയാനും ബുക്ക് ചെയ്യാനും സാധിക്കും. ലാബ് പരിശോധനകള്, അവയുടെ നിരക്കുകള്, ബ്ലഡ് ബാങ്ക്, പേവാര്ഡ്, റേഡിയോളജി, ആംബുലന്സ് എന്നീ വിവരങ്ങള് വിരല്ത്തുമ്പില് ലഭ്യമാകും. ജനകീയ ആരോഗ്യ കേന്ദ്രങ്ങള്, സര്ക്കാര് ഹോമിയോപ്പതി ആശുപത്രികള്, കാരുണ്യ ഫാര്മസികള് എന്നിവയുടെ വിവരങ്ങളും അറിയാന് കഴിയും.
- Log in to post comments