ജലോത്സവങ്ങളെ ലോകത്തിന് മുന്നിൽ  അവതരിപ്പിക്കും; മന്ത്രി പി സി വിഷ്ണുനാഥ് ചമ്പക്കുളം വള്ളംകളി ഗ്രാൻ്റ് വർധിപ്പിക്കുമെന്ന് മന്ത്രി

ചമ്പക്കുളം മൂലം വള്ളംകളിക്ക് നൽകുന്ന ഗ്രാൻ്റ് വർധിപ്പിക്കാൻ  തീരുമാനിച്ചതായി ടൂറിസം-സാംസ്‌കാരിക വകുപ്പ് മന്ത്രി പി. സി. വിഷ്ണുനാഥ് പറഞ്ഞു. ചമ്പക്കുളം മൂലം വള്ളംകളി 2026-ൻ്റെ ഉദ്ഘാടനം നിർവഹിച്ചു സംസാരിക്കുകയായിരുന്നു മന്ത്രി.

ജലോത്സവങ്ങളെ കേരള ടൂറിസത്തിൻ്റെ പ്രധാന ആകർഷണമായി ലോകത്തിന് മുന്നിൽ അവതരിപ്പിക്കും.
​കേരളത്തിലെ ജലോത്സവങ്ങൾ തുടങ്ങുന്നത് ചമ്പക്കുളം മൂലം വള്ളംകളിയോടെയാണ്. ജലോത്സവങ്ങൾ കേവലമായ മത്സരങ്ങൾ മാത്രമല്ല, കേരളത്തിൻ്റെ ജല നാഗരികതയെ പുതിയ തലമുറയ്ക്ക് പരിചയപ്പെടുത്തുന്നതിനും നമ്മുടെ സമ്പന്നമായ സംസ്‌കാരത്തിൻ്റെ ചരിത്രത്തിലേയ്ക്കുള്ള ഒരു യാത്രകൂടിയാണ്. സർക്കാർ ജലോത്സവങ്ങളെ വലിയ ഗൗരവത്തോടെയാണ് കാണുന്നത്. സി.ബി.എൽ ഈ വർഷം മുതൽ കൂടുതൽ മെച്ചപ്പെട്ട നിലയിൽ നടത്തുമെന്നും അദ്ദേഹം പറഞ്ഞു. 
.
​റെജി ചെറിയാൻ എം.എൽ.എ അധ്യക്ഷത വഹിച്ചു. കൊടിക്കുന്നിൽ സുരേഷ് എംപി വിശിഷ്ടാതിഥിയായി.  ചമ്പക്കുളം മൂലം വള്ളംകളി 2026-ൻ്റെ പതാക ജില്ലാ കളക്ടർ ഷാജി വി. നായർ ഉയർത്തി. മന്ത്രി പി സി വിഷ്ണുനാഥും, കൊടിക്കുന്നിൽ സുരേഷ് എം.പി, റെജി ചെറിയാൻ എം.എൽ.എ എന്നിവരും ചേർന്ന് സമ്മാനദാനം നിർവഹിച്ചു.

​ആലപ്പുഴ ജില്ലാ പഞ്ചായത്ത് പ്രസിഡൻ്റ് എ. മഹേന്ദ്രൻ, കോട്ടയം ജില്ലാ പഞ്ചായത്ത് പ്രസിഡൻ്റ് ജോഷി ഫിലിപ്പ്, ഡെപ്യൂട്ടി ഇൻസ്പെക്ടർ ജനറൽ ഓഫ് പൊലീസ് ജി. എച്ച്. യതീഷ്ചന്ദ്ര, ജില്ലാ പൊലീസ് മേധാവി ടി. കെ. വിഷ്ണു പ്രദീപ് തുടങ്ങിയവർ  പങ്കെടുത്തു. ബ്ലോക്ക്-ഗ്രാമ പഞ്ചായത്ത് പ്രസിഡൻ്റുമാർ, വൈസ് പ്രസിഡൻ്റുമാർ, ജില്ലാ-ബ്ലോക്ക്-ഗ്രാമ പഞ്ചായത്ത് അംഗങ്ങൾ, വിവിധ വകുപ്പുകളിലെ ഉദ്യോഗസ്ഥർ തുടങ്ങിയവർ പങ്കെടുത്തു.