നിശാഗന്ധിയെ ആവേശത്തിലാഴ്ത്തി സച്ചിൻ വാര്യരുടെ സംഗീതസന്ധ്യ

ഓണം വാരാഘോഷത്തിന്റെ ഭാഗമായി നിശാഗന്ധി വേദിയിൽ പ്രശസ്ത ഗായകൻ സച്ചിൻ വാര്യരും തേക്കിൻകാട് ബാൻഡും ആട്ടം കലാസമിതിയും ചേർന്ന് അവതരിപ്പിച്ച സംഗീതസന്ധ്യ കാണികളിൽ ആവേശം പടർത്തി.

ആർദ്രസംഗീതത്തിന്റെ മനോഹരമായ ആലാപന ശൈലിയുമായി സച്ചിൻ വാര്യർ വേദിയിലെത്തിയപ്പോൾ നിറഞ്ഞ കയ്യടിയോടെയാണ് സദസ്  വരവേറ്റത്. ഒരു മ്യൂസിക് ബാൻഡും ചെണ്ടമേളവും ഒരുമിച്ച് ഒരു വേദിയിൽ അണിനിരന്നു എന്ന പ്രത്യേകതയും ഈ കലാസന്ധ്യയ്ക്കുണ്ടായിരുന്നു.

 'കരിവീരൻ പൊൻ തിടമ്പേറ്റും', 'ഒരു മുറൈ വന്ത് പാർത്തായ',  'കിളിയേ തത്ത കിളിയേ', 'ആലപോറേൻ തമിഴാ' തുടങ്ങിയ പ്രശസ്ത ഗാനങ്ങളും 'ജിയാ ജലേ' എന്ന ഗാനത്തിന്റെ വയലിൻ ഫ്യൂഷനും കാണികളുടെ മനംകവർന്നു.

സെൻട്രൽ സ്റ്റേഡിയത്തിൽ മഞ്ജരിയും മിഥുൻ ജയരാജും സംഘവും അവതരിപ്പിച്ച മ്യൂസിക് ഷോയും കിഷോറും സംഘവും നയിച്ച കോമഡി ഷോയും കാണികൾക്ക് വർണ്ണാഭമായ വിരുന്നായി.

പൂജപ്പുര മൈതാനത്ത് നടന്ന സാംസ്കാരിക സന്ധ്യയിൽ കാവാലം ശ്രീകുമാർ അവതരിപ്പിച്ച ‘കാവാലം സ്മൃതി’ യും കാണികൾക്ക് മികച്ച അനുഭവമാണ് പകർന്നു നൽകിയത്.