ഓപ്പറേഷൻ തെളിമ: പ്രത്യേക പരിശോധനയുമായി ഭക്ഷ്യസുരക്ഷാ വകുപ്പ്

ഉപയോഗിച്ച പാചക എണ്ണ വീണ്ടും ഉപയോഗിച്ച് പ്രാദേശിക പലഹാരങ്ങൾ, വിവിധ ഭക്ഷ്യവിഭവങ്ങൾ തുടങ്ങിയവ തയാറാക്കുന്ന പ്രവണത തടയുന്നതിന് ഭക്ഷ്യസുരക്ഷാ വകുപ്പ് ‘ഓപ്പറേഷൻ തെളിമ’ എന്ന പേരിൽ സംസ്ഥാന വ്യാപകമായി പ്രത്യേക പരിശോധന സംഘടിപ്പിച്ചു.

രണ്ടു ദിവസങ്ങളിലായി തിരുവനന്തപുരം ജില്ലയിൽ 14 പ്രത്യേക സ്ക്വാഡുകളെ വിന്യസിച്ച് 167 സ്ഥാപനങ്ങളിൽ പരിശോധന നടത്തി. ഭക്ഷണം പാകം ചെയ്യുന്നതിനായി സൂക്ഷിച്ചിരുന്ന 41 ലിറ്റർ ഉപയോഗശൂന്യമായ എണ്ണ കണ്ടെത്തി നശിപ്പിച്ചു. നിയമലംഘനങ്ങൾ കണ്ടെത്തിയ ഏഴ് സ്ഥാപനങ്ങൾ അടച്ചുപൂട്ടുന്നതിനുള്ള നടപടി സ്വീകരിച്ചു. ഭക്ഷ്യസുരക്ഷാ ലൈസൻസ്/ രജിസ്ട്രേഷൻ, മെഡിക്കൽ ഫിറ്റ്നസ് സർട്ടിഫിക്കറ്റ് തുടങ്ങിയവ ഇല്ലാതെ പ്രവർത്തിക്കൽ, വെള്ളത്തിന്റെ സുരക്ഷിതത്വം ഉറപ്പാക്കാത്തത്, ശുചിത്വ മാനദണ്ഡങ്ങൾ പാലിക്കാത്തത്, ഭക്ഷ്യവസ്തുക്കളുടെ അനാരോഗ്യകരമായ സംഭരണം തുടങ്ങിയ മറ്റ് നിയമലംഘനങ്ങളും കണ്ടെത്തി നടപടി സ്വീകരിച്ചു. ഭക്ഷ്യസുരക്ഷാ മാനദണ്ഡങ്ങൾ ഉറപ്പാക്കുന്നതിന് തുടർന്നും പരിശോധന ശക്തമാക്കുമെന്ന് തിരുവനന്തപുരം ഭക്ഷ്യസുരക്ഷാ അസിസ്റ്റന്റ് കമ്മീഷണർ അറിയിച്ചു.

പി.എൻ.എക്‌സ്. 4130/2026