കെഐപി കനാല്‍ ശുചീകരിക്കണം; ജലലഭ്യത ഉറപ്പാക്കണം-താലൂക്ക് വികസന സമിതി
കല്ലട ജലസേചന പദ്ധതി കനാല്‍ അടിയന്തരമായി ശുചീകരിക്കണമെന്നും ജനുവരി 15ന് മുന്‍പ് തുറന്നുവിട്ട് ജല ലഭ്യത ഉറപ്പുവരുത്തണമെന്നും അടൂര്‍ താലൂക്ക് വികസന സമിതി യോഗം ആവശ്യപ്പെട്ടു. കനാല്‍ തുറക്കാതിരുന്നാല്‍ തുമ്പമണ്‍ മാവര പുഞ്ചയിലെ കൃഷി ഉണങ്ങി പോകാന്‍ സാധ്യതയുണ്ട്. കനാലിന്റെ ശുചീകരണ പ്രവര്‍ത്തനങ്ങള്‍ പഞ്ചായത്ത് തലത്തില്‍ അടിയന്തരമായി നടത്തണം.
മണക്കാല ജനശക്തി നഗറിന് 500 മീറ്റര്‍ തെക്കായി കണിയാരേത്ത് വീടുകള്‍ക്ക് സമീപമുള്ള കെ.ഐ.പി സബ് കനാലിലെ കലുങ്ക് സ്ഥിരമായി മാലിന്യം കയറി അടയുന്നു. ഒഴുക്ക് തടസപ്പെടുകയും ദുര്‍ഗന്ധം വമിക്കുകയും ചെയ്യുന്നതിനാല്‍ വിസ്താരം കൂടിയ പൈപ്പ് ഇട്ട് പുനരുദ്ധരിക്കണമെന്നും ആവശ്യം ഉയര്‍ന്നു.
പന്തളം ജംഗ്ഷനിലെ ഗതാഗത കുരുക്ക് ഒഴിവാക്കുന്നതിനും പന്തളം - പത്തനംതിട്ട റോഡില്‍ ടിപ്പറുകളുടെ അമിത വേഗത നിയന്ത്രിക്കുന്നതിനും നടപടി സ്വീകരിക്കണം. ജോയിന്റ് ആര്‍.ടി.ഒയുടെ നേതൃത്വത്തില്‍ ഗതാഗത വികസന സമിതി വിളിച്ച് ചേര്‍ക്കണമെന്നും യോഗം നിര്‍ദേശിച്ചു. പന്തളം മെഡിക്കല്‍ മിഷന്‍ ഭാഗത്ത് വെയ്റ്റിംഗ് ഷെഡ് സാമൂഹിക വിരുദ്ധര്‍ ദുരുപയോഗം ചെയ്യുന്നതായും നടപടി സ്വീകരിക്കണമെന്നും പരാതി ഉയര്‍ന്നു.
വര്‍ഷങ്ങളായി കെ.പി റോഡ് അരികില്‍ തടസമായി കിടക്കുന്ന വാട്ടര്‍ അതോറിറ്റിയുടെ വലിയ പൈപ്പ് നീക്കം ചെയ്യണം. ഈ പൈപ്പ് സ്ഥാപിക്കുന്നതിന് പി.ഡബ്ലു.ഡി നിരത്ത് വിഭാഗത്തില്‍ നിന്നും അനുമതി ലഭിച്ചിട്ടില്ലെന്നു വാട്ടര്‍ അതോറിറ്റി അധികൃതര്‍ അറിയിച്ചു. ഇതുമായി ബന്ധപ്പെട്ട കാര്യങ്ങള്‍ എം.എല്‍.എയുടെ നേതൃത്വത്തില്‍ വകുപ്പുതല ചീഫ് എഞ്ചിനീയര്‍മാരുമായി കൂടിയാലോചന നടത്തി തീരുമാനമെടുക്കണമെന്ന് താലൂക്ക് വികസന സമിതി യോഗം നിര്‍ദേശിച്ചു.
അടൂര്‍ നഗരസഭ പരിധിയിലുള്ള ഹോട്ടലുകളില്‍ മാലിന്യ സംസ്‌കരണ സംവിധാനം ശരിയായി നടപ്പാക്കാത്തതിനാല്‍ ഹോട്ടല്‍ മാലിന്യം ഓടകളില്‍ ഒഴുക്കുകയാണ്. ഇതുമൂലം ഓടകളുടെ പ്രവര്‍ത്തനം തടസപ്പെടുന്നതിന് പരിഹാരം കാണണം. അടൂര്‍ നഗരസഭ ആരോഗ്യ വിഭാഗം ഈ വിഷയത്തില്‍ അടിയന്തര നടപടി സ്വീകരിക്കണമെന്ന് യോഗം നിര്‍ദേശിച്ചു. പള്ളിക്കലാര്‍ ഉള്‍പ്പെടെയുള്ള ഭാഗത്തെ പുറമ്പോക്ക് കൈയേറ്റം ഒഴിപ്പിക്കുന്നതിന് അടൂര്‍ നഗരസഭ, കടമ്പനാട്, ഏനാത്ത്, ഏറത്ത്, പള്ളിക്കല്‍ പഞ്ചായത്ത് സെക്രട്ടറിമാര്‍ അടിയന്തരമായി നടപടി സ്വീകരിക്കണം.
നെടുങ്കുന്നുമല ടൂറിസം പദ്ധതി നടപ്പാക്കുന്നതിന് ടൂറിസം വകുപ്പും റവന്യൂ വകുപ്പും സംയുക്തമായി നടപടി കൈക്കൊള്ളണം. തുമ്പമണ്‍ ഗ്രാമപഞ്ചായത്ത് പ്രസിഡന്റ് സഖറിയാ വര്‍ഗീസിന്റെ അധ്യക്ഷതയില്‍ താലൂക്ക് ഓഫീസില്‍ ചേര്‍ന്ന അടൂര്‍ താലൂക്ക് വികസന സമിതി യോഗത്തില്‍ ജയപ്രസാദ്, പ്രൊഫ. പ്രഭാകരകുറുപ്പ്, സാബുഖാന്‍, ഏഴംകുളം അജു, അടൂര്‍ ജയന്‍, വിവിധ രാഷ്ട്രീയ പാര്‍ട്ടി പ്രതിനിധികള്‍, വകുപ്പുതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.
- Log in to post comments