ലൈഫ് - പി.എം.എ.വൈ പദ്ധതിയില്‍  തിരൂരങ്ങാടിയില്‍ അനുവദിച്ചത് 5.91 കോടിയുടെ ധനസഹായം ഗുണഭോക്താക്കള്‍ ഇന്ന് ഒത്തുചേരും

തിരൂരങ്ങാടി നഗരസഭ  ലൈഫ് - പി.എം.എ.വൈ പദ്ധതിയില്‍ അനുവദിച്ചത് 5.91 കോടി രൂപയുടെ സാമ്പത്തിക സഹായം. 322 പദ്ധതി ഗുണഭോക്താക്കളില്‍ 278 കുടുംബങ്ങള്‍ ഭവന നിര്‍മ്മാണം തുടങ്ങി. ഇതില്‍ 152 ഗുണഭോക്താക്കള്‍ നിര്‍മ്മാണ പ്രവൃത്തി പൂര്‍ത്തീകരിച്ചതായി നഗരസഭാ സെക്രട്ടറി ഇ.നാസിം പറഞ്ഞു. ലൈഫ് മിഷനില്‍ ഉള്‍പ്പെടുത്തി സംസ്ഥാന സര്‍ക്കാര്‍ 2.5 ലക്ഷം രൂപയും കേന്ദ്ര വിഹിതമായ 1.5 ലക്ഷം രൂപയും ഉള്‍പ്പെടെ നാലു ലക്ഷം രൂപ വീതമാണ് ഭവന നിര്‍മ്മാണത്തിനായുള്ള സാമ്പത്തിക സഹായമായി അനുവദിച്ചത്. ഒന്നാം ഘട്ടത്തില്‍ 40,000 രൂപ വീതം 277 ഗുണഭോക്താക്കള്‍ക്ക് നല്‍കി. രണ്ടാം ഘട്ടത്തില്‍  266 ഗുണഭോക്താക്കള്‍ക്ക് 16,0000 രൂപയാണ് അനുവദിച്ചത്. 240 ഗുണഭോക്താക്കള്‍ക്ക് 16,0000 രൂപ വീതം മൂന്നം ഘട്ടത്തിലും നല്‍കി. വീട് നിര്‍മ്മാണം പൂര്‍ത്തീകരിച്ച 152 കുടുംബങ്ങള്‍ക്ക് അവസാന ഘഡുവായ 40,000 രൂപ നാലാം ഘട്ടമായി കൈമാറി. 2018 മുതലുള്ള കാലയളവിലാണ് ഭവന രഹിതര്‍ക്ക് സ്വന്തമായി വീട് യാഥാര്‍ത്ഥ്യമാക്കാന്‍ സര്‍ക്കാര്‍ സഹായത്തോടെ തിരൂരങ്ങാടി നഗരസഭ  5.91 കോടി രൂപ സാമ്പത്തിക സഹായം നല്‍കിയത്. സ്വപ്ന ഭവനങ്ങളുടെ പൂര്‍ത്തീകരണ വേളയില്‍ ഇന്ന് (ജനുവരി 15ന് ) തിരൂരങ്ങാടി നഗരസഭ ഓഡിറ്റോറിയത്തില്‍ പി.എം.എ.വൈ - ലൈഫ് ഗുണഭോക്താക്കളുടെ സംഗമം നടക്കും. രാവിലെ 10ന് നഗരസഭാ ചെയര്‍പേഴ്‌സണ്‍ കെ.ടി റഹീദ ഉദ്ഘാടനം ചെയ്യും. വൈസ് ചെയര്‍മാന്‍ എം.അബ്ദുറഹ്മാന്‍ കുട്ടി അധ്യക്ഷനാകും. കുടുംബ സംഗമത്തോടനുബന്ധിച്ച് വിവിധ സര്‍ക്കാര്‍ വകുപ്പുകളുടെ നേതൃത്വത്തില്‍ പരാതി പരിഹാര അദാലത്തുമുണ്ടാകും.