തൃശൂരിലെ പ്രവാസികൾക്ക് ക്വാറന്റൈൻ സൗകര്യമൊരുക്കി കുന്നംകുളം താലൂക്കിലെ കേന്ദ്രങ്ങൾ

വിദേശത്ത് നിന്നുള്ള തൃശൂർ ജില്ലക്കാരായ പ്രവാസികൾക്ക് ക്വാറന്റൈൻ സൗകര്യമൊരുക്കി കുന്നംകുളം താലൂക്കിലെ കേന്ദ്രങ്ങൾ. താലൂക്ക് പരിധിയിലെ നാല് ക്വാറന്റൈൻ കേന്ദ്രങ്ങളിലായാണ് ഇത്തരം സൗകര്യമൊരുക്കിയത്. ചൂണ്ടൽ പഞ്ചായത്തിലെ ഗാഗുൽത്താ ധ്യാന കേന്ദ്രം, കടങ്ങോട് പഞ്ചായത്തിലെ തേജസ് എഞ്ചനീയറിങ്ങ് കോളേജ്, വേലൂർ പഞ്ചായത്തിലെ വിദ്യ എഞ്ചിനീയറിങ്ങ് കോളേജ്, പോർക്കുളം പഞ്ചായത്തിലെ പി.എസ്.എം. ഡെന്റൽ കോളേജ് എന്നിവടങ്ങളിലാണ് ക്വാറന്റൈൻ കേന്ദ്രങ്ങൾ ഉള്ളത്. ജില്ലയിലെ വിവിധ ഭാഗങ്ങളിലുള്ളവർ ഈ കേന്ദ്രങ്ങളിലുണ്ട്.
ഇതിൽ തേജസ് എഞ്ചീനിയറിങ്ങ് കോളജിൽ 90 പേർ നിലവിലുണ്ട്. ഗൾഫ് രാജ്യങ്ങളിൽ നിന്നും മാലിദ്വീപിൽ നിന്നും എത്തിയവരാണ് ഇവർ. വിദ്യാ എഞ്ചീനിയറിങ്ങ് കോളേജിൽ 45 പേർക്കും ഗാഗുൽത്ത ധ്യാനകേന്ദ്രത്തിൽ 70 പേർക്കും പി.എസ്.എം. ഡെന്റൽ കോളേജിൽ 59 പേർക്കും ക്വാറന്റൈൻ ചെയ്യുന്നതിനുള്ള സൗകര്യവും ഒരുക്കിയിട്ടുണ്ട്. ഇവിടെയും ആളുകൾ എത്തി തുടങ്ങിയിട്ടുണ്ട്.
ശനിയാഴ്ച്ച ദുബൈയിൽ നിന്നും അബുദാബിയിൽ നിന്നും മൂന്ന് ഫ്‌ളൈറ്റുകളിലായി എത്തിയവരിൽ 55 പേരാണ് തൃശൂർ ജില്ലക്കാരായി ഉണ്ടായിരുന്നത്. വരും ദിവസങ്ങളിലും വിദേശത്ത് നിന്ന് എത്തുന്നവർക്ക് കുന്നംകുളം താലൂക്കിലെ ക്വാറന്റൈൻ കേന്ദ്രങ്ങളിലാണ് സൗകര്യമൊരുക്കുക. നാലിടങ്ങളിലായി 271 പേർക്ക് ക്വാറന്റൈൻ ചെയ്യുന്നതിനുള്ള സൗകര്യമാണ് കുന്നംകുളം താലൂക്കിലെ കേന്ദ്രങ്ങളിലുള്ളത്.
വിവിധ കേന്ദ്രങ്ങളിൽ ഗ്രാമ പഞ്ചായത്തംഗങ്ങൾ, കുന്നംകുളം താലൂക്ക് ആശുപത്രി സൂപ്രണ്ട്, ആരോഗ്യ വിഭാഗം പ്രവർത്തകർ തുടങ്ങിയവർ നേരിട്ടെത്തി കാര്യങ്ങൾ വിലയിരുത്തുന്നുണ്ട്.