ഓണ്ലൈന് ക്ലാസുകള്ക്കിടയിലും കൃഷിപരിപാലനത്തിന് സമയം കണ്ടെത്തി എന്സിസി കേഡറ്റ്സ്
പുതിയ അധ്യയന വര്ഷം കൊവിഡ് 19 രോഗത്തെ തുടര്ന്ന് സ്കൂളുകള് തുറക്കാന് കഴിയാതായതോടെ വിദ്യാര്ത്ഥികളുടെ പഠനം ഓണ്ലൈന് വഴി വീടുകളിലായി. കൂട്ടുകാരില് നിന്നും സമൂഹത്തില് നിന്നും അകന്ന് പഠനം വീടിനുള്ളില് ഒതുങ്ങിയപ്പോള് കുട്ടികള്ക്ക് പഠനത്തിനൊപ്പം പാഠ്യേതര പ്രവര്ത്തനങ്ങളിലൂടെ മാനസിക പിന്തുണ ഉറപ്പാക്കുകയാണ് എന്.ആര് സിറ്റി എസ്എന്വി ഹയര്സെക്കന്ഡറി സ്കൂളിലെ എന്സിസി യൂണിറ്റ്. കൊവിഡ് സമ്പര്ക്ക വിലക്ക് കാലത്ത് കൃഷി പരിപാലനത്തിനും സമയം കണ്ടെത്താന് അധ്യാപകര് നിര്ദേശിച്ചതിനെ തുടര്ന്ന് എന്സിസി കേഡറ്റ്സ് ആണ് ആദ്യം കാര്ഷിക രംഗത്തേക്ക് ഇറങ്ങിയത്. പാവല്, പയര്, വെണ്ട, വഴുതന, ചീര തുടങ്ങി ചെറിയ രീതിയില് അടുക്കളത്തോട്ടം ആരംഭിക്കുകയായിരുന്നു. പുതിയ അധ്യയന വര്ഷം ഓണ്ലൈന് പഠനം ആരംഭിച്ചെങ്കിലും പഠനത്തിനൊപ്പം കാര്ഷിക പ്രവര്ത്തനങ്ങളിലൂടെ മാനസിക ഉല്ലാസത്തിനും കൃഷിയിലും താത്പര്യമുണ്ടാക്കാന് വിവിധ കൃഷി രീതികളെയും പ്രോത്സാഹിപ്പിക്കുകയായിരുന്നു അധ്യാപകര്. എന്സിസി കേഡറ്റുകളായ നൂറ് വിദ്യാര്ത്ഥികള് തങ്ങളുടെ വീടുകളില് തുടങ്ങിവച്ച കാര്ഷിക പ്രവര്ത്തനങ്ങള് മറ്റു വിദ്യാര്ത്ഥികളും ഏറ്റെടുത്തിരിക്കുകയാണ്. കൊവിഡ് കാലത്ത് എന്സിസി കേഡറ്റ്സ് നടത്തിയ അടുക്കളത്തോട്ടത്തിലെ ആദ്യവിളവെടുപ്പ് രാജക്കാട് പഞ്ചായത്തിന്റെ സമൂഹഅടുക്കളയിലേക്കും നല്കിയിരുന്നു. പഠനത്തിനൊപ്പമുള്ള കൃഷി പരിപാലനം കുട്ടികളില് മാനസിക ഉല്ലാസവും കാര്ഷിക അവബോധവും ഉണ്ടാക്കാന് സഹായകമാണെന്നും അസോസ്സിയേറ്റ് എന്സിസി ഓഫീസര് കെ.എസ് രതീഷ് കുമാര് പറഞ്ഞു. കുട്ടികളുടെ കൃഷിപരിപാലനത്തിന് ഉറച്ച പിന്തുണയായി രക്ഷാകര്ത്താക്കളും ഒപ്പമുണ്ട്.
കൃഷി പരിപാലനത്തിനൊപ്പം മാസ്ക് നിര്മ്മാണത്തിനും എന്സിസി കേഡറ്റ്സ് മുന്നിരയിലുണ്ട്. കൊവിഡ് കാലം വേനലവധി തന്നെ ഇല്ലാതാക്കിയപ്പോള് പുതിയ പ്രതീക്ഷയോടെ അധ്യയന വര്ഷത്തെ വരവേല്ക്കാന് മാസ്ക് നിര്മ്മാണത്തില് വ്യാപൃതരാകുകായിരുന്നു ഒരു കൂട്ടം എന്സിസി കേഡറ്റ്സ്. അധ്യാപകന്റെ നിര്ദേശപ്രകാരം 24 ഓളം വിദ്യാര്ത്ഥിനികളാണ് തങ്ങളുടെ സമ്പര്ക്ക വിലക്കു കാലം മാസ്ക് നിര്മ്മാണത്തിന് മാറ്റിവച്ചത്. രണ്ടര മാസം കൊണ്ട് 24 വിദ്യാര്ത്ഥിനികള് തങ്ങളുടെ വീട്ടിലിരുന്ന് തയ്ച്ചെടുത്തത് രണ്ടായിരത്തോളം മാസ്കുകളാണ്. മാസ്ക് നിര്മ്മാണത്തില് ഇവര്ക്ക് സഹായങ്ങളുമായി കുടുംബവും ഒപ്പമുണ്ട്. അധ്യാപകര് തുണിവാങ്ങി വിദ്യാര്ത്ഥികളുടെ വീടുകളിലെത്തിച്ച് നല്കും. വിദ്യാര്ത്ഥികള് അവരവരുടെ വീടുകളിലിരുന്ന് മാസ്ക് തയ്ച്ച് അധ്യാപകര്ക്ക് കൈമാറുകയാണ്. ഇവര് തയ്ച്ച് നല്കിയ മാസ്കാണ് കൊവിഡ് കാലത്ത് എസ്എസ്എല്സി, പ്ലസ്ടു പരീക്ഷ എഴുതാനെത്തിയ വിദ്യാര്ത്ഥികള്ക്കും നല്കിയത്. കൊവിഡാനന്തരം പുതിയ ശീലമായി മാസ്ക് ധരിച്ച് സ്കൂളിലെത്താന് കാത്തിരിക്കുകയാണ് വിദ്യാര്ത്ഥികള്. പുതിയ അധ്യയന വര്ഷത്തില് സ്കൂളിലെത്തുന്ന കൂട്ടുകാര്ക്കുള്ള മാസ്ക് കൂടി ഇവര് തയ്യാറാക്കി സ്കൂളിലെത്തിച്ചിട്ടുണ്ട്.
- Log in to post comments