സമഗ്ര ഗുണമേന്മ വിദ്യാഭ്യാസ പദ്ധതി വിദ്യാഭ്യാസരംഗത്ത് കൂടുതൽ കരുത്തേകും: മന്ത്രി രാമചന്ദ്രൻ കടന്നപ്പള്ളി 

സംസ്ഥാനത്ത് വിദ്യാഭ്യാസരംഗം പുതിയ വിജ്ഞാന സാധ്യതകൾക്കനുസരിച്ച് നവീകരിച്ചുകൊണ്ടിരിക്കുകയാണെന്നും സമഗ്ര ഗുണമേന്മ വിദ്യാഭ്യാസ പദ്ധതി അതിന് കൂടുതൽ കരുത്തേകുമെന്നും രജിസ്ട്രേഷൻ, മ്യൂസിയം, പുരാവസ്തു വകുപ്പ് മന്ത്രി രാമചന്ദ്രൻ കടന്നപ്പള്ളി പറഞ്ഞു. സ്‌കൂൾ വിദ്യാഭ്യാസ നിലവാരം കൂടുതൽ മെച്ചപ്പെടുത്തുന്നതിന് സംസ്ഥാന സർക്കാർ നടപ്പാക്കുന്ന സമഗ്ര ഗുണമേന്മ വിദ്യാഭ്യാസ പദ്ധതിയുടെ പ്രഖ്യാപനവും ജില്ലാ തല സമിതി ഉദ്ഘാടനവും നിർവഹിച്ച് സംസാരിക്കുകയായിരുന്നു മന്ത്രി. പൊതുവിദ്യാലയങ്ങളെ സംരക്ഷിക്കുക എന്ന പ്രധാനപ്പെട്ട സാമൂഹ്യ ഉത്തരവാദിത്വം തദ്ദേശസ്ഥാപനങ്ങൾ ഗൗരവപൂർവം ഏറ്റെടുക്കണം. അക്കാദമിക പ്രവർത്തനങ്ങളുടെ കാര്യക്ഷമത വർധിപ്പിച്ച് ഗുണമേന്മ ഉറപ്പുവരുത്തുന്ന പദ്ധതി കൂട്ടായ പ്രവർത്തനങ്ങളിലൂടെ ലക്ഷ്യപ്രാപ്തിയിൽ എത്തിക്കണമെന്നും മന്ത്രി പറഞ്ഞു. 

സാങ്കേതികവിദ്യ സൗഹൃദ ക്ലാസ്‌റൂം പ്രവർത്തനങ്ങൾ ശക്തിപ്പെടുത്തുക, മൂല്യനിർണയ രീതിശാസ്ത്രം പരിഷ്‌കരിക്കുകയും സമഗ്രമായി നടപ്പാക്കുകയും ചെയ്യുക, അധ്യാപക പരിശീലനം നവീകരിക്കുക, വിദ്യാഭ്യാസ രംഗത്തെ ഗവേഷണപ്രവർത്തനങ്ങൾ നവീകരിക്കുക, ഗുണമേന്മാ വിദ്യാഭ്യാസത്തിനായി സമൂഹത്തിലെ മറ്റ് സ്ഥാപനങ്ങൾ, വകുപ്പുകൾ, സമിതികൾ എന്നിവയുടെ സഹകരണം ഉറപ്പാക്കുക തുടങ്ങിയവയാണ് സമഗ്ര ഗുണമേന്മ വിദ്യാഭ്യാസ പദ്ധതിയുടെ ലക്ഷ്യങ്ങൾ.

ജില്ലാ പഞ്ചായത്ത് ഹാളിൽ നടന്ന പരിപാടിയിൽ ജില്ലാ പഞ്ചായത്ത് പ്രസിഡന്റ് അഡ്വ.കെ.കെ രത്നകുമാരി അധ്യക്ഷയായി. ജില്ലാ കലക്ടർ അരുൺ. കെ. വിജയൻ മുഖ്യാതിഥിയായി. കണ്ണൂർ ഡയറ്റ്  പ്രിൻസിപ്പൽ വി.വി പ്രേമരാജൻ സംസ്ഥാനതല പ്രവർത്തനാവതരണം നടത്തി. സമഗ്ര ശിക്ഷാ കണ്ണൂർ ഡി.പി.സി ഇ.സി വിനോദ്, വിദ്യാകിരണം കോ ഓർഡിനേറ്റർ കെ.സി സുധീർ എന്നിവർ ജില്ലാതല പ്രവർത്തങ്ങളും ജില്ലാതല തുടർപ്രവർത്തനങ്ങളും വിവരിച്ചു. ജില്ലാ പഞ്ചായത്ത്  വൈസ് പ്രസിഡന്റ് അഡ്വ. ബിനോയ് കുര്യൻ, കണ്ണൂർ കോർപറേഷൻ വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ സുരേഷ്ബാബു എളയാവൂർ, ഡിഡിഇ ഇൻ ചാർജ് എ.എസ് ബിജേഷ്, കണ്ണൂർ ആർ.ഡി.ഡി ആർ.രാജേഷ് കുമാർ, ജില്ലാ പ്ലാനിങ് ഓഫീസർ നെനോജ് മേപ്പടിയത്ത് തുടങ്ങിയവർ സംസാരിച്ചു. തദ്ദേശ സ്വയംഭരണ സ്ഥാപന അധ്യക്ഷൻമാർ, ജനപ്രതിനിധികൾ, വിവിധ വകുപ്പ് മേധാവികൾ, ഉദ്യാഗസ്ഥർ, അധ്യാപക സംഘടനാ നേതാക്കൾ തുടങ്ങിയവർ ജില്ലാ വിദ്യാഭ്യാസ സമിതി രൂപീകരണത്തിലും സെമിനാറിലും പങ്കെടുത്തു. 

ജില്ലാതല വിദ്യാഭ്യാസ സമിതി രൂപീകരിച്ചു

സമഗ്ര ഗുണമേന്മ വിദ്യാഭ്യാസ പദ്ധതി നടപ്പാക്കുന്നതിന്റെ ഭാഗമായി കണ്ണൂർ ജില്ലാതല വിദ്യാഭ്യാസ സമിതി രൂപീകരിച്ചു. സമിതിയിൽ ജില്ലയിലെ മന്ത്രിമാർ രക്ഷാധികാരിയും എംപിമാരും എംഎൽഎമാരും ഉപരക്ഷാധികാരികളുമാണ്. ജില്ലാ പഞ്ചായത്ത് പ്രസിഡന്റും ജില്ലാ ആസൂത്രണ സമിതി ചെയർമാനുമാണ് സമിതിയുടെ അധ്യക്ഷൻമാർ. മേയർ/ മുൻസിപ്പൽ ചെയർമാൻ ഉപാധ്യക്ഷരും ജില്ലാ കലക്ടർ സെക്രട്ടറിയാണ്. വിദ്യാഭ്യാസ ഉപഡയറക്ടർ ആണ് കൺവീനർ. തദ്ദേശ സ്ഥാപന പ്രതിനിധികൾ, ഡയറ്റ് പ്രിൻസിപ്പൽ, എസ്എസ്‌കെ, ഡിപിസി, ഡിഇഒ, എഇഒ പ്രതിനിധി എന്നിവർ അംഗങ്ങളായുമാണ് സമിതി രൂപീകരിച്ചത്. പദ്ധതി നടത്തിപ്പിന്റെ ഭാഗമായി ബ്ലോക്ക് തലത്തിലും ഗ്രാമപഞ്ചായത്ത് തലത്തിലും വിദ്യാഭ്യാസ സമിതികൾ രൂപീകരിക്കും.