കണ്ണൂര് സെന്സസ് ടീമിനെ ജില്ലാ കലക്ടര് അഭിനന്ദിച്ചു
നിശ്ചയിച്ച കാലാവധി പൂര്ത്തിയാവുന്നതിനു മുമ്പേ സെന്സസ് 2027ന്റെ ഒന്നാം ഘട്ട വിവരശേഖരണം നൂറു ശതമാനം പൂര്ത്തിയാക്കിയ ജില്ലയിലെ സെന്സസ് ഉദ്യോഗസ്ഥരെ പ്രിന്സിപ്പല് സെന്സസ് ഓഫീസര് കൂടിയായ ജില്ലാ കലക്ടര് പി. വിഷ്ണുരാജ് അഭിനന്ദിച്ചു.
ജില്ലയില് ആകെയുള്ള 4823 വീട് പട്ടികാ ബ്ലോക്കുകളിലെയും (എച്ച്എല്ബി) മുഴുവന് വീടുകളുടെയും കെട്ടിടങ്ങളുടെയും വിവരശേഖരണം സമയ ബന്ധിതമായി പൂര്ത്തിയാക്കാനായത് മികച്ച നേട്ടമാണെന്ന് അദ്ദേഹം പറഞ്ഞു. ടീം വര്ക്കിന്റെ വിജയമാണിത്. എന്യൂമറേറ്റര്മാരും സൂപ്പര്വൈസര്മാരും ഉള്പ്പെടെ നാലായിരത്തിലേറെ വരുന്ന ജീവനക്കാരുടെ തികഞ്ഞ സമര്പ്പണവും ആസൂത്രണവും ഇതിനു പിന്നിലുണ്ട്.
തനിക്ക് മികച്ച ഒരു പഠനാനുഭവമായിരുന്നു സെന്സസെന്നും ജില്ലാ കലക്ടര് പറഞ്ഞു. ജീവനക്കാരില് അര്പ്പിച്ച വിശ്വാസം അന്വര്ഥമാക്കുന്ന രീതിയിലായിരുന്നു അവരുടെ പ്രകടം. പലരും രാപ്പകല് ഭേദമില്ലാതെയാണ് തങ്ങളുടെ ലക്ഷ്യം പൂര്ത്തീകരിക്കാനായി യത്നിച്ചത്. സെന്സസ് പ്രവര്ത്തനങ്ങള് ഏകോപിപ്പിക്കുന്നതില് ജില്ലാതല ഉദ്യോഗസ്ഥര്, ചാര്ജ് ഓഫീസര്മാര് ഉള്പ്പെടെയുള്ളവര് മാതൃകാപരമായ പ്രവര്ത്തനങ്ങളാണ് കാഴ്ചവച്ചതെന്നും അവരെ അഭിനന്ദിക്കുന്നതായും ജില്ലാ കലക്ടര് പറഞ്ഞു. ഉദ്യോഗസ്ഥര്ക്കുള്ള മെമെന്റോ ജില്ലാ കലക്ടര് വിതരണം ചെയ്തു.
ജില്ലാ കലക്ടറുടെ ചേംബറില് നടന്ന അനുമോദനച്ചടങ്ങില് അസിസ്റ്റന്റ് കലക്ടര് എസ്. സ്വാതി, എഡിഎം പി.എന് പുരുഷോത്തമന്, കന്റോണ്മെന്റ് സി.ഇ.ഒ ഡോ. പ്രശാന്ത് കുമാര് ബി ഒ, ഹുസൂര് ശിരസ്തദാര് രാജേഷ് ഖന്ന, സെന്സസ് ചാര്ജ് ഓഫീസര്മാരായ തഹസില്ദാര്മാര്, നഗരസഭാ സെക്രട്ടറിമാര്, സെന്സസ് ഉദ്യോഗസ്ഥര് തുടങ്ങിയവര് സംബന്ധിച്ചു.
- Log in to post comments