അഷ്ടമുടി വാട്ടർ ഗേറ്റ് മ്യൂസിക് ഫെസ്റ്റിവൽ ഒക്ടോബർ 7 മുതൽ *അഞ്ച് ദിവസങ്ങളിൽ ഇന്ത്യയിലെ വ്യത്യസ്ത സംഗീതധാരകളുടെ സംഗമം *ദിവസവും സംഗീതാധിഷ്ഠിത സിനിമകളുടെ പ്രദർശനവും

കൊല്ലം: സംസ്ഥാന സർക്കാരിന്റെ നൂറുദിന കർമ്മപരിപാടിയുടെ ഭാഗമായി സാംസ്‌കാരിക വകുപ്പിന്റെ നേതൃത്വത്തിൽ ‘അഷ്ടമുടി വാട്ടർ ഗേറ്റ് മ്യൂസിക് ഫെസ്റ്റിവൽ’ ഒക്ടോബർ 7 മുതൽ 11 വരെ കൊല്ലം ശ്രീനാരായണഗുരു സാംസ്‌കാരിക സമുച്ചയത്തിൽ സംഘടിപ്പിക്കും. 
അഞ്ച് ദിവസങ്ങളിലായി നടക്കുന്ന സംഗീതോത്സവത്തിൽ എല്ലാ ദിവസവും വൈകിട്ട് ഏഴുമുതൽ സംഗീതപരിപാടികൾ അരങ്ങേറും. പ്രവർത്തനരഹിതമായി കിടക്കുന്ന ശ്രീനാരായണഗുരു സാംസ്‌കാരിക സമുച്ചയത്തെ പുനരുജ്ജീവിപ്പിച്ച് വീണ്ടും സജീവമായ പൊതുസാംസ്‌കാരിക ഇടമായി അവതരിപ്പിക്കുന്നതിന്റെ ഭാഗമായാണ് സർക്കാർ വ്യത്യസ്തമായ പരിപാടി ആവിഷ്കരിച്ചതെന്ന് ടൂറിസം, സാംസ്കാരിക, സിനിമാ വകുപ്പ് മന്ത്രി പി.സി വിഷ്ണുനാഥ് അറിയിച്ചു.

അഷ്ടമുടിക്കായലിന്റെ സവിശേഷമായ പ്രകൃതിപശ്ചാത്തലവും കൊല്ലത്തിന്റെ സമ്പന്നമായ സാംസ്‌കാരിക പൈതൃകവും വിവിധ സംഗീതപാരമ്പര്യങ്ങളുമായി കൂട്ടിയിണക്കി വ്യത്യസ്തമായ സാംസ്‌കാരിക അനുഭവം ഒരുക്കുകയാണ് ഫെസ്റ്റിവലിന്റെ ലക്ഷ്യം. ‘Musical Ecology – Water’ എന്ന ആശയത്തെ ആധാരമാക്കിയാണ് സംഗീതോത്സവം വിഭാവനം ചെയ്തിരിക്കുന്നത്. ജലവും മനുഷ്യജീവിതവും സംസ്കാരവും തമ്മിലുള്ള ബന്ധത്തെ സംഗീതത്തിലൂടെ അവതരിപ്പിക്കുന്നതും ഫെസ്റ്റിവലിന്റെ പ്രത്യേകതയാണ്.

ഇന്ത്യയുടെ വിവിധ ഭാഗങ്ങളിൽ രൂപപ്പെട്ട സംഗീതപാരമ്പര്യങ്ങളിൽ നിന്നുള്ള കലാകാരന്മാരും സംഗീതസംഘങ്ങളും ഫെസ്റ്റിവലിൽ അണിനിരക്കും. രാജസ്ഥാനിലെ മാംഗനിയാർ സംഗീതപാരമ്പര്യം, ഇന്ത്യൻ ഫ്യൂഷൻ സംഗീതം, ജനകീയവും താളാധിഷ്ഠിതവുമായ സംഗീതധാരകൾ, സമകാലിക സംഗീതാവിഷ്‌കാരങ്ങൾ തുടങ്ങി വൈവിധ്യമാർന്ന സംഗീതശാഖകൾക്ക് ഒരേ വേദിയിൽ ഇടം ലഭിക്കും. Manganiyar Seduction, Araka Vyooham – The Percussion Band, Hamsi & Band, Shanka Tribe, Indian Ocean എന്നിവരാണ് വിവിധ ദിവസങ്ങളിലെ സംഗീതപരിപാടികൾ അവതരിപ്പിക്കുന്നത്.

ഒക്ടോബർ 7ന് Manganiyar Seduction, ഒക്ടോബർ 8ന് Araka Vyooham – The Percussion Band, ഒക്ടോബർ 9ന് Hamsi & Band, ഒക്ടോബർ 10ന് Shanka Tribe, ഒക്ടോബർ 11ന് Indian Ocean എന്നിവരുടെ സംഗീതപരിപാടികളാണ് അരങ്ങേറുക. പാരമ്പര്യ സംഗീതധാരകളെയും സമകാലിക സംഗീതാവിഷ്‌കാരങ്ങളെയും ഒരേ വേദിയിൽ അവതരിപ്പിക്കുന്നതിലൂടെ സംഗീതാസ്വാദകർക്ക് വൈവിധ്യമാർന്ന അനുഭവം ഒരുക്കുകയാണ് ലക്ഷ്യം.

ഫെസ്റ്റിവലിന്റെ ഭാഗമായി എല്ലാ ദിവസവും ഉച്ചയ്ക്ക് രണ്ടുമുതൽ വൈകിട്ട് നാലുവരെ സംഗീതവുമായി ബന്ധപ്പെട്ട സിനിമകളുടെ പ്രദർശനവും നടക്കും. കേരള സംസ്ഥാന ചലച്ചിത്ര അക്കാദമിയുടെ നേതൃത്വത്തിലാണ് ചലച്ചിത്ര പ്രദർശനം സംഘടിപ്പിക്കുന്നത്. സംഗീതവും സിനിമയും സമന്വയിപ്പിച്ചുകൊണ്ടുള്ള സാംസ്‌കാരിക അനുഭവം ഒരുക്കുന്നതിന്റെ ഭാഗമായാണിത്.

ശ്രീനാരായണഗുരു സാംസ്‌കാരിക സമുച്ചയത്തെ കൂടുതൽ സജീവമായ പൊതുസാംസ്‌കാരിക ഇടമാക്കി മാറ്റുകയും കൊല്ലത്തിന്റെ പ്രധാന സാംസ്‌കാരിക കേന്ദ്രമെന്ന നിലയിൽ അതിന്റെ പ്രവർത്തനങ്ങൾ ശക്തിപ്പെടുത്തുകയും ചെയ്യുന്നതും ഫെസ്റ്റിവലിന്റെ പ്രധാന ലക്ഷ്യങ്ങളിലൊന്നാണ്. കലാ-സാംസ്‌കാരിക പരിപാടികൾക്ക് കൂടുതൽ അവസരമൊരുക്കുന്നതിനൊപ്പം സമുച്ചയത്തെ പൊതുജനങ്ങളുടെ സജീവ സാംസ്‌കാരിക ഇടമായി വികസിപ്പിക്കുകയാണ് ലക്ഷ്യം.

സാംസ്‌കാരിക വകുപ്പ്, ടൂറിസം വകുപ്പ്, ജില്ലാ ഭരണകൂടം  ഉൾപ്പെടെയുള്ള വിവിധ വകുപ്പുകളുടെയും സ്ഥാപനങ്ങളുടെയും സഹകരണത്തോടെയാണ് ഫെസ്റ്റിവലിന്റെ ഒരുക്കങ്ങൾ പുരോഗമിക്കുന്നത്. അഷ്ടമുടിക്കായലിന്റെ പ്രകൃതിഭംഗിയും കൊല്ലത്തിന്റെ സാംസ്‌കാരിക പൈതൃകവും ഇന്ത്യയുടെ വൈവിധ്യമാർന്ന സംഗീതധാരകളും ഒരുമിക്കുന്ന ഈ സംഗീതോത്സവം കൊല്ലത്തിന്റെ സാംസ്‌കാരിക പ്രവർത്തനങ്ങൾക്ക് കൂടുതൽ ഊർജം പകരും.

അഷ്ടമുടി വാട്ടർ ഗേറ്റ് മ്യൂസിക് ഫെസ്റ്റിവലിലേക്ക് സംഗീതാസ്വാദകരെയും കലാകാരന്മാരെയും സാംസ്‌കാരിക പ്രവർത്തകരെയും പൊതുജനങ്ങളെയും സ്വാഗതം ചെയ്യുന്നു. ഒക്ടോബർ 7 മുതൽ 11 വരെ കൊല്ലം ശ്രീനാരായണഗുരു സാംസ്‌കാരിക സമുച്ചയത്തിൽ നടക്കുന്ന സംഗീതോത്സവം സംഗീതത്തിന്റെയും പ്രകൃതിയുടെയും സംസ്കാരത്തിന്റെയും മനോഹരമായ സംഗമത്തിന് വേദിയാകും.