'സ്‌കൂൾ ചലഞ്ച് ഫണ്ട് :' സംസ്ഥാനത്തെ ആദ്യ കെട്ടിടം ഉദ്ഘാടനം ഇന്ന്

സംസ്ഥാന സർക്കാരിന്റെ പൊതുവിദ്യാഭ്യാസ നയത്തിന്റെ ഭാഗമായി എയ്ഡഡ് സ്‌കൂളുകൾക്ക് നൽകുന്ന ചലഞ്ച് ഫണ്ട് ഉപയോഗിച്ച് നിർമിച്ച സംസ്ഥാനത്തെ ആദ്യ കെട്ടിടം കണ്ടശ്ശാങ്കടവ് എച്ച് എസ് ഓഫ് മേരിസ് കോൺവെന്റ് ഗേൾസിൽ വിദ്യാഭ്യാസ വകുപ്പ് മന്ത്രി സി രവീന്ദ്രനാഥ് ഇന്ന് (ജൂൺ 15) ഉച്ചയ്ക്ക് 1.30 ന് ഉദ്ഘാടനം നിർവഹിക്കും. എംപി ടി എൻ പ്രതാപൻ അധ്യക്ഷത വഹിക്കും. മുരളി പെരുനെല്ലി എംഎൽഎ, മണലൂർ പഞ്ചായത്ത് പ്രസിഡന്റ് വിജി ശശി, ത്രിതല പഞ്ചായത്ത് പ്രതിനിധികൾ, ഹെഡ്മിസ്ട്രസ് സിസ്റ്റർ സന്ധ്യ, തൃശൂർ രൂപത ഫാദർ ടോണി നീലങ്കാവിൽ, പ്രൊവിൻഷ്യൽ സുപ്പീരിയർ സിസ്റ്റർ അനിജ, പിടിഎ പ്രസിഡന്റ് റോബിൻ വടക്കേത്തല എന്നിവർ പങ്കെടുക്കും. 40 ലക്ഷം രൂപയാണ് ചലഞ്ച് ഫണ്ട് ഇനത്തിൽ സർക്കാർ സകൂളിനു നൽകുന്നത് 2.75 കോടി രൂപ ചെലവ് വന്ന കെട്ടിടത്തിന്റെ ബാക്കി തുക മാനേജ്‌മെന്റും പിടിഎ യുംകൂടി സ്വരൂപിച്ചാണ് കെട്ടിടം നിർമ്മിച്ചത്. 14500 ചതുരശ്ര അടി വിസ്തീർണമുള്ള കെട്ടിടത്തിൽ അത്യാധുനിക രീതിയിൽ പണികഴിപ്പിച്ച 18 സ്മാർട്ട് ക്ലാസ്സ്മുറികളാണുള്ളത്. ജില്ലയിലെ 9 വിദ്യാലയങ്ങൾക്ക് ചലഞ്ച് ഫണ്ടിൽ ഉൾപ്പെടുത്തി ഭൗതിക സാഹചര്യങ്ങൾ മെച്ചപ്പെടുത്തുവാൻ അനുമതി കിട്ടിയിട്ടുണ്ട്. ക്ലാസ് മുറികളുടെ നിർമാണം, നവീകരണം, ലാബ്, ലൈബ്രറി നിർമാണം, സ്മാർട്ട്ക്ലാസ്സ് റൂം ക്രമീകരിക്കൽ, ഡൈനിങ് ഹാൾ, ടോയ്‌ലറ്റ്, സ്റ്റേഡിയം നിർമ്മാണം എന്നിങ്ങനെയുള്ള പ്രവർത്തികളാണ് പ്രസ്തുത വിദ്യാലയങ്ങളിൽ നടക്കുക. മൊത്തം 1 കോടി 80 ലക്ഷം രൂപയാണ് ഈ ഇനത്തിൽ സർക്കാർ വിദ്യാലയങ്ങൾക്കായി നൽകുക. അത്രയും തുക തന്നെ മാനേജ്മെന്റുകളും നിക്ഷേപിക്കും. 1:1 അനുപാതത്തിലാണ് പദ്ധതി നടപ്പിലാക്കുന്നത്.