കോവിഡ് 19: ആശങ്ക വേണ്ട, കൊടുങ്ങല്ലൂരിൽ സ്ഥിതി നിയന്ത്രണവിധേയം

കോവിഡ് വൈറസിനെ സംബന്ധിച്ച് ജനങ്ങൾക്കിടയിൽ ഭീതിയും ആശങ്കയും വേണ്ടെന്നും കൊടുങ്ങല്ലൂരിൽ സ്ഥിതി നിയന്ത്രണ വിധേയമാണെന്നും നഗരസഭാ ചെയർമാൻ കെ ആർ ജൈത്രൻ പറഞ്ഞു. കോവിഡ് വൈറസിന്റെ പശ്ചാത്തലത്തിൽ പ്രതിരോധ- ബോധവൽക്കരണ പ്രവർത്തനങ്ങൾ ശക്തിപ്പെടുത്തുവാൻ ചേർന്ന അടിയന്തിര കൗൺസിൽ യോഗത്തിലാണ് ചെയർമാന്റെ പ്രസ്താവന.
താലൂക്കാശുപത്രിയിൽ ഏഴ് പേർ നിരീക്ഷണത്തിലാണെങ്കിലും ആർക്കും രോഗം സ്ഥിരീകരിച്ചിട്ടില്ല. വ്യാജ പ്രചരണങ്ങളും തെറ്റായ വാർത്തകളും നൽകുന്നവർക്കെതിരെ കർശന നടപടി സ്വീകരിക്കും.
ഹോട്ടലുകൾ ഉച്ചയ്ക്കുശേഷം അണുനശീകരണം നടത്തണം. വീഴ്ച്ച വരുത്തുന്നവർക്കെതിരെ ലൈസൻസ് റദ്ദാക്കൽ ഉൾപ്പെടെ നടപടികൾ സ്വീകരിക്കും. നഗരത്തിലുള്ള സിനിമ തിയറ്ററുകളുടെ പ്രവർത്തനം നിർത്തി വെപ്പിച്ചിട്ടുണ്ട്. പാരലൽ - ടൂട്ടോറിയൽ സ്ഥാപനങ്ങളും പ്രവർത്തിക്കരുത്. നഗരസഭാ ഓഫീസിലെ ബയോമെട്രിക് പഞ്ചിങ് സംവിധാനം നിർത്തി. ആരോഗ്യവകുപ്പ് ഉദ്യോഗസ്ഥർ ഹോട്ടലുകളിൽ കർശനമായ പരിശോധനകൾ നടത്തും. വാർഡുകളിൽ ആരോഗ്യവകുപ്പ് ഉദ്യോഗസ്ഥരും ആശാവർക്കർമാരും ചേർന്ന് ജാഗ്രതാ നിർദ്ദേശങ്ങൾ നൽകും. ഉത്സവങ്ങൾ, വിവാഹങ്ങൾ എന്നിവ ചടങ്ങുകൾ മാത്രമായി നടത്തണം . ടൗൺഹാളിലും കമ്മ്യൂണിറ്റി ഹാളിലും പുതിയ ബുക്കിംഗ് സ്വീകരിക്കുന്നതല്ല. ഹെൽത്ത് വിഭാഗം ജീവനക്കാർ പൂർണമായും ഫീൽഡിൽ തന്നെ ഉണ്ടാകണം. വിദേശങ്ങളിൽ നിന്നും വരുന്നവർ പെട്ടെന്നു തന്നെ ആരോഗ്യവകുപ്പ് മേധാവികളുമായി ബന്ധപ്പെടണം.
താലൂക്കാശുപത്രി സൂപ്രണ്ട് ഡോ.ടി.വി. റോഷ്, മെഡിക്കൽ ഓഫീസർമാരായ ഡോ.ഗായത്രി, ഡോ. മിനു ജോർജ്ജ്, സെക്രട്ടറി ടി.കെ.സുജിത് എന്നിവർ പങ്കെടുത്തു.