കുട്ടികള്ക്കായി കണക്റ്റിംഗ് പത്തനംതിട്ടയുമായി ജില്ലാ ശിശുസംരക്ഷണ യൂണിറ്റ്
ജില്ലാ ശിശുസംരക്ഷണ യൂണിറ്റിന്റ ആഭിമുഖ്യത്തില് കോവിഡ് 19 ലോക്ക് ഡൗണ് നിലനില്ക്കുന്ന സാഹചര്യത്തില് കുട്ടികളുടെ മാനസിക സാമൂഹിക ആരോഗ്യ സംരക്ഷണം ഉറപ്പുവരുത്തുന്ന കാവല് പദ്ധതിയുടെ ഭാഗമായി കണക്റ്റിംഗ് പത്തനംതിട്ട എന്ന പരിപാടി സംഘടിപ്പിക്കുന്നു. സന്നദ്ധ സംഘടനകളുടെയും വിവിധ വകുപ്പുകളുടെയും സഹായത്തോടെയാണു പരിപാടി സംഘടിപ്പിക്കുന്നത്. കാവല് പദ്ധതിയില് ഉള്പ്പെടുന്ന 18 വയസിനു താഴെ പ്രായംവരുന്ന കുട്ടികള്ക്കായാണു പദ്ധതി. ടെലിഫോണ് കോള്, വാട്സ്ആപ്പ് ഗ്രൂപ്പ്, ടെക്സ്റ്റ് സന്ദേശങ്ങള് മുഖേനയാണു പദ്ധതി നടപ്പിലാക്കുന്നത്.
ഹലോ ചങ്ങായി, ജ്വാല, ചിലങ്ക, ജാങ്കോ ഞാന് പെട്ടു നീയോ, ബോധന, പ്രചോദന എന്നിങ്ങനെ ആറുതരം പരിപാടികളാണ് ഇതിനായി ക്രമീകരിച്ചിരിക്കുന്നത്.
കൊറോണയെ ചെറുത്തുതോല്പ്പിക്കാന് കുട്ടികള്ക്ക് മാനസിക ഊര്ജ്ജം നല്കുന്നതോടൊപ്പം സാമൂഹിക അകലം പാലിക്കുന്നതിന്റെ ആവശ്യകത ബോധ്യപ്പെടുത്തുക, ഫലപ്രദമായി കൊറോണ പ്രതിരോധ പ്രവര്ത്തനങ്ങളില് കുട്ടികളുടെ പങ്കാളിത്തം ഉറപ്പാക്കുക, വീട്ടില് കഴിയുന്ന കുട്ടികളുടെ മാനസിക സമ്മര്ദ്ദം അകറ്റുക, ടെലി-കൗണ്സിലിംഗ് സംവിധാനം കുടുംബാംഗങ്ങളുടെയും കുട്ടികളുടെയും കൊറോണയുമായി ബന്ധപ്പെടുന്ന സംശയങ്ങള് ആശങ്കകള് പരിഹരിക്കുക, ഗവണ്മെന്റ് മുഖേനയുള്ള ജാഗ്രത നിര്ദേശങ്ങള് അതാതു സമയം കുട്ടികളിലേക്ക് എത്തിക്കുക, ജില്ലയിലെ ആരോഗ്യ സാമൂഹിക രംഗത്തെ പ്രമുഖര് കുട്ടികളുമായി സംവദിക്കാന് അവസരം ഒരുക്കുക, കുട്ടിയും കുടുംബവും സമൂഹത്തിനു പ്രിയപ്പെട്ടതാണെന്ന ബോധം കുട്ടികളില് വളര്ത്താന് സഹായിക്കുക, വീടുകളില് കുട്ടികളുടെ സുരക്ഷയും മാനസിക സാമൂഹിക ആരോഗ്യവും ഉറപ്പ് വരുത്തുക തുടങ്ങിയവയാണു പദ്ധതിയിലൂടെ ലക്ഷ്യമിടുന്നത്.
- Log in to post comments