കോവിഡ്: കട്ടപ്പനയില് പ്രത്യേക മാര്ഗ്ഗനിര്ദ്ദേശങ്ങള്
കട്ടപ്പന മാര്ക്കറ്റിലെ ഡ്രൈവര്ക്ക് കോവിഡ് 19 സ്ഥിരീകരിച്ചതിനെ തുടര്ന്ന് കണ്ടെയ്ന്മെന്റ് സോണായി പ്രഖ്യാപിക്കപ്പെട്ട കട്ടപ്പന മാര്ക്കറ്റിലെ നിയന്ത്രണങ്ങള് പിന്വലിക്കുമ്പോള് വ്യാപാരികള്, തൊഴിലാളികള്, പൊതുജനങ്ങള് എന്നിവര് ശ്രദ്ധിക്കേണ്ട ജാഗ്രതാ നിര്ദ്ദേശങ്ങള്ക്കും, വ്യാപാരികള് പാലിക്കേണ്ട നിയന്ത്രണങ്ങള്ക്കും നഗരസഭാ സ്റ്റിയറിംഗ് കമ്മറ്റി രൂപരേഖ തയ്യാറാക്കിയതായി ചെയര്മാന് ജോയി വെട്ടിക്കുഴി അറിയിച്ചു.
വ്യാപാരികളോ, ഏജന്റുമാരോ, ഡ്രൈവര്മാരോ വ്യാപാരത്തിനു വേണ്ടി തമിഴ്നാട്ടിലേയ്ക്ക് പോകുന്നത് ഒഴിവാക്കണം. രോഗ ഭീഷണി ഒഴിവാകുന്നതു വരെ വ്യാപാരത്തിന് മറ്റ് മാര്ഗ്ഗങ്ങള് അവലംബിക്കണം ഏതെങ്കിലും കാരണവശാല് തമിഴ്നാട്ടില് പോകുവാനിടയായാല് തിരിച്ചു വന്ന് ക്വാറന്റൈനില് പോകാന് തയ്യാറാകണം. തമിഴ്നാട്ടില് നിന്നും സാധനങ്ങളുമായി വരുന്ന വാഹനങ്ങള് പാറക്കടവില് കഴുകിയ ശേഷം മാത്രമേ മാര്ക്കറ്റില് എത്താവു.
മാര്ക്കറ്റിലെ ജനത്തിരക്ക് ഒഴിവാക്കി, സാമൂഹിക അകലം പാലിച്ച് വ്യാപാരം നടത്തുന്നതിനും, ജനങ്ങള്ക്ക് സാധനങ്ങള് വാങ്ങുന്നതിനുമുള്ള സൗകര്യം ക്രമീകരിക്കണം. മാര്ക്കറ്റില് നഗരസഭ രേഖപ്പെടുത്തിയിരിക്കുന്ന ലൈനിന് പുറത്തേയ്ക്ക് സാധനങ്ങള് വ്യാപാരികള് ഇറക്കിവയ്ക്കുവാന് അനുവദിക്കുന്നതല്ല.രണ്ട് മാര്ക്കറ്റുകളിലും വണ്വേ സംവിധാനം ഏര്പ്പെടുത്തുകയാണ്. പച്ചക്കറി മാര്ക്കറ്റിലേയ്ക്ക് പ്രവേശിക്കേണ്ട വാഹനങ്ങള് ഇരട്ടയാര് ജംഗ്ഷന് ഭാഗത്തു നിന്നും മാര്ക്കറ്റില് പ്രവേശിച്ച് സെന്ട്രല് ജംഗ്ഷന് റോഡിലേയ്ക്ക് ഇറങ്ങണം. മീന് മാര്ക്കറ്റില് പ്രവേശിക്കേണ്ട വാഹനങ്ങള് സെന്ട്രല് ജംഗ്ഷന് റോഡില് നിന്നും മാര്ക്കറ്റില് പ്രവേശിച്ച് ഇടശേരി റോഡില് ഇറങ്ങണം.
ചരക്കുമായി വരുന്ന വാഹനങ്ങള്ക്ക് രാവിലെ 9 മുതല് വൈകിട്ട് 7 വരെ മാര്ക്കറ്റുകളില് പ്രവേശനമുണ്ടായിരിക്കുന്നതല്ല. ഈ സമയത്ത് സാധനങ്ങള് എത്തിക്കേണ്ടിവന്നാല് ചരക്കു വാഹനങ്ങള് പുറത്തു നിര്ത്തി ചെറിയ വാഹനങ്ങളില് സാധനങ്ങള് കടകളില് എത്തിക്കണം. വാന് മുഖേന സാധനങ്ങള് കടകളില് വിതരണം ചെയ്യുന്നവര് വാഹനം പുറത്തിട്ടിട്ട് കടകളിലെ ഓര്ഡര് എടുത്ത് പണമിടപാട് തീര്ത്തതിനു ശേഷം മാത്രമേ വാന് മാര്ക്കറ്റില് പ്രവേശിക്കാവു. 30 മിനിറ്റു കൊണ്ട് സാധനങ്ങള് എടുത്ത് വാഹനം പുറത്തിറക്കണം. പച്ചക്കറി മാര്ക്കറ്റിലും, മീന് മാര്ക്കറ്റിലും ഉപഭോക്താക്കളുടെ വാഹനങ്ങള് 20 മിനിട്ടില് കൂടുതല് പാര്ക്ക് ചെയ്യുവാന് അനുവദിക്കുന്നതല്ല. കൂടുതല് സാധനങ്ങള് വാങ്ങിക്കേണ്ടവര് സാധനങ്ങള് വാങ്ങി പണമടച്ച ശേഷം വാഹനങ്ങള് മാര്ക്കറ്റില് കൊണ്ടുവന്ന് സാധനങ്ങള് എടുക്കണം.
പൊതു മാര്ക്കറ്റിലെയും, വ്യാപാരികളുടെയും, ജീവനക്കാരുടെയും യാതൊരുവിധ വാഹനങ്ങളും മാര്ക്കറ്റിനുള്ളില് പാര്ക്ക് ചെയ്യുവാന് പാടില്ല. മുഴുവന് വ്യാപാര സ്ഥാപനങ്ങളുടെ മുന്പിലും കൈകള് കഴുകുന്നതിനുള്ള വെള്ളവും, സോപ്പും, സാനിട്ടൈസറും നിര്ബന്ധമായി ഉണ്ടായിരിക്കണം. വ്യാപാരികളും, ജീവനക്കാരും മുഖാവരണം ധരിച്ചിരിക്കണം. സ്ഥാപനങ്ങളുടെ അകത്തും, പുറത്തും സാമൂഹിക അകലം നിര്ബന്ധമായും പാലിച്ചിരിക്കണം.
പച്ചമീന്, ഉണക്കമീന്, കോഴിയിറച്ചി തുടങ്ങിയവ വില്ക്കുന്ന സ്ഥാപനങ്ങള് ശുചിയായും, വൃത്തിയായും സൂക്ഷിക്കുന്നതിനുള്ള മുന്കരുതലുകള് എടുക്കണം. മാര്ക്കറ്റിനുള്ളില് വാഹനങ്ങളിലോ, നിരത്തുകളിലോ യാതൊരുവിധ വ്യാപാരങ്ങളും അനുവദിക്കുന്നതല്ല. മാര്ക്കറ്റിനുള്ളില് ഗതാഗത തടസമോ ആള്ക്കൂട്ടമോ ഉണ്ടാകാതിരിക്കാന് എല്ലാ വ്യാപാരികളും ശ്രദ്ധിക്കണം. മാര്ക്കറ്റും, സ്ഥാപനങ്ങളും, പരിസരവും വില്പന വസ്തുക്കളും എല്ലാ ദിവസവും വൃത്തിയായും ശുചിയായും കാത്തു സൂക്ഷിക്കുന്നതിനും രോഗാണുക്കള് ഉണ്ടാകാതിരിക്കാനും എല്ലാ വ്യാപാരുകളും ശ്രദ്ധിക്കണം
- Log in to post comments