കുഴുപ്പിള്ളിയിൽ വിഷു - കാർഷിക വിപണന മേള ആരംഭിച്ചു

കുഴുപ്പിള്ളിയിൽ വിഷു കാർഷിക വിപണന മേള ആരംഭിച്ചു. കുഴുപ്പിള്ളി സർവ്വീസ് സഹകരണ ബാങ്കിന്റെ നേതൃത്വത്തിൽ ആരംഭിച്ച വിഷുക്കാഴ്ച കാർഷിക വിപണന മേള ഗ്രാമപഞ്ചായത്ത് പ്രസിഡന്റ് കെ.എസ്. നിബിൻ ഉദ്ഘാടനം ചെയ്തു. 

കുഴുപ്പിള്ളി ഗ്രാമപഞ്ചായത്ത്, കൃഷിഭവൻ, കാർഷിക സ്വാശ്രയ ഗ്രൂപ്പുകൾ, കുടുംബശ്രീ യൂണിറ്റുകൾ, കർഷക സംഘം, ഞാറ്റില കൃഷി ഗ്രൂപ്പ് എന്നിവരുടെ സഹകരണത്തോടെയാണ് ബാങ്ക് ഹെഡ് ഓഫീസ് അങ്കണത്തിൽ വിപണന മേള ആരംഭിച്ചത്. നാട്ടിലെ കർഷകരുടെ ഉൽപ്പന്നങ്ങൾക്ക് വിപണി സൗകര്യം ഒരുക്കിക്കൊണ്ട് ഗ്രാമീണ കാർഷിക മേഖലയ്ക്ക് പ്രോത്സാഹനം നൽകുന്നതിനാണ് മേള സംഘടിപ്പിച്ചത്.

നാടൻ പച്ചക്കറികൾ, ഫലവൃക്ഷ തൈകൾ, കണിവെള്ളരി, പൊക്കാളി ഉൽപന്നങ്ങൾ, ഫാം ഫ്രെഷ് മത്സ്യം, പായസം, നെയ്യപ്പം, ഉണ്ണിയപ്പം, മറ്റ്‌ പലഹാരങ്ങൾ തുടങ്ങിയവ മേളയിൽ ലഭിക്കും. ബാങ്ക് പ്രസിഡന്റ് സി.കെ അനന്തകൃഷ്ണൻ ചടങ്ങിൽ അധ്യക്ഷത വഹിച്ചു.