പൂങ്കുന്നം - കുറ്റൂർ റോഡിൽ വഴിവിളക്കുകളുടെ അറ്റകുറ്റപ്പണി തീർക്കാൻ തീരുമാനം

പൂങ്കുന്നം - കുറ്റൂർ റോഡിൽ നിലവിലുള്ള വഴിവിളക്കുകളുടെ അറ്റകുറ്റപ്പണികൾ പൂർത്തീകരിക്കാനും പുതിയത് സ്ഥാപിക്കാനും കെഎസ്ഇബിക്ക് കത്ത് നൽകാൻ തൃശൂർ താലൂക്ക് വികസന സമിതി യോഗത്തിൽ തീരുമാനമായി. താലൂക്കിൽ നടന്നു വരുന്ന വിവിധ വികസന പ്രവർത്തികൾ യോഗം വിലയിരുത്തി. വികസന പ്രവർത്തികൾ ഘട്ടം ഘട്ടമായി പൂർത്തീകരിക്കാനും യോഗം തീരുമാനിച്ചു. 

തൃശൂർ ശക്തൻ സ്റ്റാൻഡിന്റെ പടിഞ്ഞാറു ഭാഗത്തുള്ള കുഴികൾ അടക്കുന്നതിനും കാലപ്പഴക്കംമൂലം പ്രവർത്തനക്ഷമമല്ലാത്ത വാട്ടർ പമ്പുകൾ മാറ്റി പുതിയത് സ്ഥാപിക്കുന്നതിനും തീരുമാനിച്ചു. താലൂക്ക് ഓഫീസ് പരിസരത്ത് ജൈവ അജൈവ മാലിന്യങ്ങൾ സംസ്കരിക്കുന്നതിനായി എം സി എഫ് സ്ഥാപിക്കാൻ കോർപ്പറേഷൻ പ്രതിനിധിയോട് അധ്യക്ഷൻ നിർദ്ദേശിച്ചു. അന്തിക്കാട് ഗ്രാമപഞ്ചായത്തിനുവേണ്ടിയുള്ള കുടിവെള്ളപദ്ധതിക്കായി പൊളിച്ച റോഡ് പൂർവ്വസ്ഥിതിയിലാക്കുന്നത് സംബന്ധിച്ചുള്ള  നടപടികൾ യോഗം വിലയിരുത്തി. പട്ടിക്കാട് - വിലങ്ങന്നൂർ റോഡ് വികസനവുമായി ബന്ധപ്പെട്ട് ആവശ്യമായ മരങ്ങൾ മുറിച്ചുമാറ്റുന്നതിന് തീരുമാനമായിട്ടുണ്ടെന്ന് സോഷ്യൽ ഫോറസ്ട്രി ഓഫീസർ അറിയിച്ചു.

പാണഞ്ചേരി പഞ്ചായത്ത് പ്രസിഡണ്ട് പി പി രവീന്ദ്രൻ അദ്ധ്യക്ഷനായി. തഹസിൽദാർ ടി ജയശ്രീ, ജനപ്രതിനിധികൾ, വിവിധ രാഷ്ട്രീയപാർട്ടി പ്രതിനിധികൾ, ഉദ്യോഗസ്ഥർ എന്നിവർ പങ്കെടുത്തു.