ചാവക്കാട് നഗരസഭയുടെ പി പി സെയ്ത് മുഹമ്മദ് സ്മാരക വാണിജ്യ സമുച്ചയം ഉദ്ഘാടനം 20ന്

സംസ്ഥാന സർക്കാരിന്റെ രണ്ടാം വാർഷികത്തോടനുബന്ധിച്ചുള്ള നൂറുദിന കർമ്മപരിപാടിയുടെ ഭാഗമായി ചാവക്കാട് നഗരസഭയിൽ നിർമ്മാണം പൂർത്തീകരിച്ച പി പി സെയ്ത് മുഹമ്മദ് സ്മാരക വാണിജ്യ സമുച്ചയം സെക്രട്ടറി ക്വാർട്ടേഴ്സ് പരിസരത്ത് മെയ് 20ന് തുറക്കും. വൈകീട്ട് 5.30ന്  തുറമുഖം, മ്യൂസിയം, പുരാവസ്തു വകുപ്പ് മന്ത്രി അഹമ്മദ് ദേവർകോവിൽ ഉദ്ഘാടനം ചെയ്യും. എൻ കെ അക്ബർ എംഎൽഎ അദ്ധ്യക്ഷത വഹിക്കുന്ന ചടങ്ങിൽ ഗുരുവായൂർ നഗരസഭ ചെയർമാൻ എം. കൃഷ്ണദാസ് മുഖ്യാതിഥിയാകും. വൈസ് പ്രസിഡന്റ് കെ കെ മുബാറക്, സ്ഥിരം സമിതി അധ്യക്ഷന്മാർ, കൗൺസിലർമാർ, ജനപ്രതിനിധികൾ തുടങ്ങിയവർ പങ്കെടുക്കും.

ചാവക്കാട് നഗരസഭ 9-ാം വാർഡിൽ പഴയ പഞ്ചായത്ത് ഓഫീസ് നിലനിന്നിരുന്ന സ്ഥലത്താണ് ജനകീയാസൂത്രണ പദ്ധതി പ്രകാരം 45 ലക്ഷം രൂപ ചെലവഴിച്ച് 1500 ച.അടിയിൽ വാണിജ്യ സമുച്ചയ നിർമ്മാണം പൂർത്തീകരിച്ചത്. സംസ്ഥാന നിർമ്മിതി കേന്ദ്രത്തിനായിരുന്നു നിർവ്വഹണച്ചുമതല. ചാവക്കാട് പഞ്ചായത്ത് പ്രസിഡന്റായിരുന്ന പി പി സെയ്ത് മുഹമ്മദിന്റെ സ്മരണാർത്ഥം അദ്ദേഹത്തിന്റെ പേരാണ് വാണിജ്യ സമുച്ചയത്തിന് നൽകിയിട്ടുള്ളത്. ചാവക്കാട്, ഗുരുവായൂർ ഭാഗങ്ങളിൽ നിന്നും എളുപ്പത്തിൽ എത്തിച്ചേരാവുന്ന  വാണിജ്യ സമുച്ചയം കൂടിയാണിത്.  വാണിജ്യ സമുച്ചയം യാഥാർത്ഥ്യമാകുന്നതോടെ പ്രാദേശിക സാമ്പത്തിക വികസനത്തിന് അവസരമൊരുക്കുന്നതിനും സംരംഭകർക്ക് പുതു അവസരങ്ങൾ സൃഷ്ടിക്കുന്നതിനും സാധിക്കും.