കൈനൂര്‍ ചിറയില്‍ മുങ്ങിമരിച്ച വിദ്യാര്‍ഥികള്‍ക്ക് റവന്യൂ വകുപ്പ് മന്ത്രി കെ രാജന്‍ അന്തിമോപചാരം അര്‍പ്പിച്ചു
കൈനൂര്‍ ചിറയില്‍ മുങ്ങിമരിച്ച വിദ്യാര്‍ഥികളുടെ മൃതദേഹത്തില്‍ റവന്യൂ വകുപ്പ് മന്ത്രി കെ രാജനും ജില്ലാ കലക്ടര്‍ വി ആര്‍ കൃഷ്ണതേജയും കമ്മീഷണര്‍ അങ്കിത് അശോകനും അന്തിമോപചാരം അര്‍പ്പിച്ചു. സെന്റ് തോമസ് കോളേജ് ജൂബിലി ബ്ലോക്കില്‍ പൊതുദര്‍ശനത്തിന് വെച്ച നിവേദ്കൃഷ്ണയുടെ മൃതദേഹത്തിലാണ് അന്തിമോപചാരം അര്‍പ്പിച്ചത്.
മൃതദേഹങ്ങള്‍ സൂക്ഷിച്ചിരുന്ന മെഡിക്കല്‍ കോളജ് - താലൂക്ക് ആശുപത്രി മോര്‍ച്ചറികളില്‍ മന്ത്രി നേരിട്ടെത്തി സ്ഥിതിഗതികള്‍ വിലയിരുത്തുകയും ഇന്‍ക്വസ്റ്റ് നടപടികള്‍ക്കും മറ്റ് നടപടികള്‍ക്കും ആവശ്യമായ നിര്‍ദ്ദേശങ്ങള്‍ നല്‍കുകയും ചെയ്തു. തുടര്‍ന്ന് മെഡിക്കല്‍ കോളേജ് ആശുപത്രിയില്‍ നിന്നും മൃതദേഹത്തെ അനുഗമിച്ച് സെന്റ് തോമസ് കോളേജില്‍ എത്തിച്ചേരുകയായിരുന്നു.
ഒരു നാടിനെ ആകെ ദുഃഖത്തില്‍ ആഴ്ത്തിയ വിദ്യാര്‍ത്ഥികളുടെ അകാലത്തിലുള്ള വേര്‍പാടില്‍ കോളേജ് അധികൃതരുടെയും സഹപാഠികളുടെയും ദുഃഖത്തില്‍ മന്ത്രി കെ രാജനും പങ്കുചേര്‍ന്നു.
- Log in to post comments