കുഞ്ഞുണ്ണി മാസ്റ്റർ സ്മാരകം 23 ന് മുഖ്യമന്ത്രി ഉദ്ഘാടനം ചെയ്യും

നുറുങ്ങു കവിതകളിലൂടെ മലയാളി മനസ്സിൽ ഇടംനേടിയ കുഞ്ഞുണ്ണിമാഷിന് ജന്മനാടായ വലപ്പാട് സ്മാരകം ഒരുങ്ങി. വലപ്പാട് അതിയാരത്ത് തറവാടിനടുത്തായി നിർമ്മിച്ച സ്മാരകം സെപ്റ്റംബർ 23 രാവിലെ 10.30 ന് മുഖ്യമന്ത്രി പിണറായി വിജയൻ ഉദ്ഘാടനം ചെയ്യും. മലയാളത്തിന്റെ മഹാകവി അന്തരിച്ചിട്ട് 13 വർഷങ്ങൾ പിന്നിട്ടു. സാംസ്‌കാരിക പ്രവർത്തകരുടെയും ആരാധകരുടെയും പ്രവർത്തനങ്ങളുടെ ഫലമായാണ് പ്രിയകവിക്ക് സ്മാരകമൊരുങ്ങിയത്. 2017 ലെ സംസ്ഥാന ബഡ്ജറ്റ് വിഹിതമായ 25 ലക്ഷം രൂപയും വലപ്പാട് ഗ്രാമപഞ്ചായത്തു തനതു ഫണ്ടിൽ നിന്ന് 13 ലക്ഷം രൂപയും ഗീതാഗോപി എംഎൽഎയുടെ ആസ്തിവികസന ഫണ്ടിൽനിന്ന് 4 ലക്ഷം രൂപയും വിനിയോഗിച്ചാണ് സ്മാരക നിർമ്മാണം പൂർത്തിയാക്കിയത്. ഗീതാഗോപി എംഎൽഎ ചെയർപേഴ്‌സണായി സാംസ്‌കാരിക വകുപ്പ് നിയോഗിച്ച കുഞ്ഞുണ്ണി മാഷ് സ്മാരക സമിതിയുടെ നേതൃത്വത്തിലാണ് കെട്ടിടം പണി പൂർത്തിയായത്. സ്മാരകത്തിൽ ലൈബ്രറിയും കുട്ടികളുടെയും സാംസ്‌കാരിക പ്രവർത്തകരുടെയും പരിപാടികൾ സംഘടിപ്പിക്കുന്നതിനായി പ്രത്യേകം ഹാളും സജ്ജമാക്കിയിട്ടുണ്ട്.
ഉദ്ഘാടന ചടങ്ങിൽ ഗീതാഗോപി എംഎൽഎ അധ്യക്ഷയാകും. ടി എൻ പ്രതാപൻ എംപി മുഖ്യതിഥിയാകും. കേരള സാഹിത്യ അക്കാദമി പ്രസിഡന്റ് വൈശാഖൻ മാസ്റ്റർ ലൈബ്രറി ഉദ്ഘാടനം ചെയ്യും. സംസ്ഥാന കായകല്പ അവാർഡിന് അർഹമായ തൃത്തല്ലൂർ സാമൂഹിക ആരോഗ്യ കേന്ദ്രത്തെ മുഖ്യമന്ത്രി ആദരിക്കും. വലപ്പാട് പഞ്ചായത്ത് പ്രസിഡന്റ് ഇ കെ തോമസ് മാസ്റ്റർ ഉപഹാരം സമർപ്പിക്കും. സ്മാരകം രൂപകല്പന ചെയ്ത സ്റ്റുഡിയോ മരം എൻവയോൺമെന്റൽ ഡിസൈൻ ആൻഡ് ഇന്നവേഷൻ പ്രവർത്തകരെ ജില്ലാ കളക്ടർ എസ് ഷാനവാസും സ്മാരക നിർമ്മാണ ഏജൻസിയായ കോസ്റ്റ് ഫോർഡ് പ്രവർത്തകരെ കേരള സാഹിത്യ അക്കാദമി സെക്രട്ടറി കെ പി മോഹനനും ആദരിക്കും.