രാഷ്ട്രീയ വയോശ്രീ യോജന പദ്ധതി 60 വയസ്സിന് മുകളിൽ പ്രായമുള്ളവർക്ക് സഹായ ഉപകരണങ്ങൾ ലഭ്യമാക്കുന്നു

ജില്ലയിലെ 60 വയസ്സിന് മുകളിൽ പ്രായമുള്ള മുതിർന്ന പൗരന്മാർക്ക് പ്രായത്തിന്റെ പരിമിതികൾ കൊണ്ടുള്ള പ്രശ്‌നങ്ങൾക്ക് പരിഹാരമാകുന്നു. ജില്ലാ ഭരണസംവിധാനം കേന്ദ്ര സർക്കാർ സ്ഥാപനമായ അലിംകോയുമായി സഹകരിച്ച് രാഷ്ട്രീയ വയോശ്രീ യോജന പദ്ധതി ജില്ലയിൽ നടപ്പിലാക്കുകയാണ്.
പദ്ധതി പ്രകാരം ബി.പി.എൽ കുടുംബങ്ങളിൽപെട്ടവരോ പ്രതിമാസം 15000 രൂപയിൽ താഴെ വരുമാനം ഉള്ളവരോ ആയ മുതിർന്ന പൗരന്മാർക്ക് ശാരീരിക ബുദ്ധിമുട്ടുകൾ ഒഴിവാക്കുന്നതിനുള്ള വിവിധ സഹായ ഉപകരണങ്ങൾ ലഭ്യമാക്കുന്നു.
വീൽ ചെയർ, ക്രച്ചസ്, എൽബോ ക്രച്ചസ്, കണ്ണടകൾ, കൃത്രിമ ദന്തങ്ങൾ (പൂർണമായോ ഭാഗികമായോ), വാക്കിംഗ് സ്റ്റിക്ക്, വാക്കർ, ട്രൈപോഡ്, ടെട്ര പോഡ്, കേൾവി സഹായ ഉപകരണങ്ങൾ എന്നീ പത്ത് തരം സഹായ ഉപകരണങ്ങൾ ലഭ്യമാക്കും. അപേക്ഷകർ 60 വയസ്സും അതിന് മുകളിൽ പ്രയവുമുള്ള മുതിർന്ന പൗരൻ ആയിരിക്കണം. ബി.പി എൽ കാർഡ് ഉടമ അല്ലെങ്കിൽ കുടുംബ മാസ വരുമാനം 15000 രൂപയിൽ താഴെ ഉള്ളവർക്ക് അർഹതയുണ്ട്. കഴിഞ്ഞ 3 വർഷത്തിനുള്ളിൽ സർക്കാർ, പൊതുമേഖല, തദ്ദേശ സ്വയംഭരണ സ്ഥാപനങ്ങൾ എന്നിവിടങ്ങളിൽ നിന്നും സമാന സേവനങ്ങൾ നേടിയവർ ആകരുത്.
അപേക്ഷകൾ അംഗീകൃത അക്ഷയ കേന്ദ്രങ്ങൾ വഴി ഓൺലൈൻ ആയി മാത്രമേ സ്വീകരിക്കുകയുള്ളൂ. എല്ലാ അക്ഷയ കേന്ദ്രങ്ങളെയും ഇതിനായി ചുമതലപ്പെടുത്തിയിട്ടുണ്ട്.
അപേക്ഷയോടൊപ്പം സമർപ്പിക്കേണ്ട രേഖകൾ: ആധാർ കാർഡ്, ബി.പി.എൽ റേഷൻ കാർഡ് അല്ലെങ്കിൽ വരുമാന സർട്ടിഫിക്കറ്റ്, അല്ലെങ്കിൽ ദേശീയ ഗ്രാമീണ തൊഴിലുറപ്പ് കാർഡ്/ വാർദ്ധക്യ പെൻഷൻറെ രസീത്, ഒരു ഫോട്ടോ
അപേക്ഷിക്കേണ്ട അവസാന ദിവസം 2021 ജൂലൈ 3.
ഓൺലൈൻ ആയി ലഭിക്കുന്ന അപേക്ഷകൾ കേന്ദ്ര സർക്കാർ സ്ഥാപനമായ അലിംകോ പരിശോധിച്ച് അർഹമായ അപേക്ഷകൾ കണ്ടെത്തുന്നു. അടുത്ത ഘട്ടത്തിൽ അർഹമായ അപേക്ഷകരെ നേരിൽ കണ്ട് വിദഗ്ധരെ കൊണ്ട് സ്‌ക്രീനിംഗ് നടത്തി ആവശ്യകത മനസിലാക്കി വേണ്ട സഹായ ഉപകരണം അനുവദിച്ച് പിന്നീട് ഇവ വിതരണം ചെയ്യുന്നു. കൂടുതൽ വിവരങ്ങൾക്ക് 9387088887 എന്ന നമ്പരിൽ ബന്ധപ്പെടുക.