പെന്‍ഷന്‍: അംഗത്വം പുനഃസ്ഥാപിക്കാന്‍ ജൂണ്‍ 30 വരെ കുടിശിക തുക അടയ്ക്കാം
പത്രപ്രവര്‍ത്തക / പത്രപ്രവര്‍ത്തകേതര പെന്‍ഷന്‍ പദ്ധതിയില്‍ അംഗത്വം നേടിയതിനു ശേഷം 2020 മാര്‍ച്ച് മുതല്‍ ഏതെങ്കിലും കാലഘട്ടത്തില്‍ ആറ് മാസത്തിലധികം അംശദായ കുടിശിക വന്ന് അംഗത്വം റദ്ദായവര്‍ക്ക് അതു പുനഃസ്ഥാപിക്കാന്‍ 2021 ജൂണ്‍ 30 വരെ ബന്ധപ്പെട്ട ഓഫീസില്‍ കുടിശ്ശിക തുക 15 ശതമാനം പിഴപ്പലിശ സഹിതം അടയ്ക്കാമെന്ന് ഇന്‍ഫര്‍മേഷന്‍ -പബ്ലിക് റിലേഷന്‍സ് വകുപ്പു ഡയറക്ടര്‍ എസ്. ഹരികിഷോര്‍ അറിയിച്ചു.
ഇതുമായി ബന്ധപ്പെട്ട 2021 മെയ് 4ലെ സര്‍ക്കാര്‍ ഉത്തരവുകള്‍ പ്രകാരമാണ് നടപടി. അംഗത്വം പുനഃസ്ഥാപിക്കാനായി അപേക്ഷകര്‍ താഴെ പറയുന്ന രേഖകള്‍ മേഖലാ /ജില്ലാ ഓഫീസില്‍ ലഭ്യമാക്കണം:
(1) എന്നു മുതല്‍ അംശദായം മുടങ്ങി എന്നും മുടങ്ങിയതിന്റെ കാരണവും വ്യക്തമാക്കുന്ന അപേക്ഷ. (2) നിലവില്‍ പത്രപ്രവര്‍ത്തകരായി/പത്രപ്രവര്‍ത്തകേതര ജീവനക്കാരനായി ജോലി ചെയ്യുന്നുണ്ട് എന്നു തെളിയിക്കുന്ന അസ്സല്‍ തൊഴില്‍ സര്‍ട്ടിഫിക്കറ്റ്. (3) മുമ്പ് അംഗത്വം റദ്ദായിട്ടുണ്ടോ എന്നും ഉണ്ടെങ്കില്‍ എത്ര തവണ പുനഃസ്ഥാപിക്കപ്പെട്ടു എന്നും ബോധിപ്പിക്കുന്ന രേഖ (അപേക്ഷകന്‍ വെള്ളക്കടലാസില്‍ തയ്യാറാക്കിയ 'സത്യപ്രസ്താവന'). (4) ഏറ്റവും ഒടുവിലത്തെ അടവു വിവരം വരെ രേഖപ്പെടുത്തിയ പാസ് ബുക്ക്.
മേല്‍പ്പറഞ്ഞ കാലയളവിലെ കുടിശ്ശിക മൂലമാണ് അംഗത്വം റദ്ദായതെന്നും അംശദായം മുടങ്ങിയതു മുതല്‍ തുക അടയ്ക്കുന്ന/തൊട്ടുമുമ്പുള്ള മാസം വരെ അപേക്ഷകന്‍ ചട്ടപ്രകാരമുള്ള പത്രപ്രവര്‍ത്തകനായി/പത്രപ്രവര്‍ത്തകേതര ജീവനക്കാരനായി തുടരുന്നുണ്ട് എന്നും മുമ്പ് മൂന്നു തവണ അംഗത്വം പുനഃസ്ഥാപിക്കപ്പെട്ടിട്ടില്ല എന്നും മേഖലാ ഡെപ്യൂട്ടി ഡയറക്ടര്‍ /ജില്ലാഇന്‍ഫര്‍മേഷന്‍ ഓഫീസര്‍ രേഖകള്‍ പരിശോധിച്ച് ഉറപ്പു വരുത്തിയതിനു ശേഷമാണ് തുക സ്വീകരിക്കുക.
വിശദവിവരത്തിനും തൊഴില്‍ സര്‍ട്ടിഫിക്കറ്റിന്റെ മാതൃകയ്ക്കും വകുപ്പിന്റെ മേഖലാ ഡെപ്യൂട്ടി ഡയറക്ടര്‍ ഓഫീസുമായോ ജില്ലാ ഇന്‍ഫര്‍മേഷന്‍ ഓഫീസുമായോ ബന്ധപ്പെടുക.
- Log in to post comments