നൂറുദിന പദ്ധതിയിൽ അതിവേഗ വ്യക്തിഗത, ഗ്രൂപ്പ് വായ്പകൾ നൽകുന്നു 

 എറണാകുളം: സംസ്ഥാന സർക്കാരിന്റെ നൂറുദിന കർമപദ്ധതിയുടെ ഭാഗമായി കേരള സംസ്ഥാന വനിത വികസന കോർപ്പറേഷൻ ലളിതമായ നടപടിക്രമത്തിലൂടെ അതിവേഗ വ്യക്തിഗത, ഗ്രൂപ്പ് വായ്പകൾ നൽകുന്നു. നിശ്ചിത വരുമാന പരിധിയിലുള്ള 18 നും 55 നും മധ്യേ പ്രായമുള്ള തൊഴിൽ രഹിതരായ സ്ത്രീകൾക്ക് അഞ്ച് വർഷ തിരിച്ചടവ് കാലാവധിയിൽ ആറ് ശതമാനം പലിശ നിരക്കിൽ ഉദ്യോഗസ്ഥ, വസ്തു ജാമ്യത്തിന്റെ അടിസ്ഥാനത്തിലാണ് വ്യക്തിഗത വായ്പ നൽകുന്നത്. 
   വായ്പ അപേക്ഷാ ഫോറം www.kswdc.org എന്ന വെബ് സൈറ്റിൽ ലഭിക്കും. പൂരിപ്പിച്ച അപേക്ഷ സംസ്ഥാന വനിത വികസന കോർപ്പറേഷന്റെ എറണാകുളം മേഖലാ ഓഫീസിൽ സമർപ്പിക്കാം. കൂടാതെ മൈക്രോ ഫിനാൻസ് പദ്ധതിയിൽ കുടുംബശ്രീ സി.ഡി.എസ്സിന് മൂന്ന് മുതൽ മൂന്നര ശതമാനം വരെ പലിശ നിരക്കിൽ ഒന്നരക്കോടി രൂപ വരെ വായ്പ അനുവദിക്കും.  സി.ഡി.എസ്സിന് കീഴിലുള്ള എസ്.എച്ച്.ജികൾക്ക് പത്ത് ലക്ഷം രൂപ വരെയും ഹരിതകർമ്മ സേന, ശുചീകരണ തൊഴിലാളി യൂണിറ്റ് എന്നിവയ്ക്ക് ആറ് ലക്ഷം രൂപ വരെയും വായ്പ ലഭിക്കും. അപേക്ഷകൾക്കും വിശദ വിവരങ്ങൾക്കും എറണാകുളം മേഖലാ ഓഫീസുമായി ബന്ധപ്പെടാം. ഫോൺ 0484 2984932, 9496015011.