കോവിഡ് പ്രതിരോധം: മലപ്പുറം ജില്ലയില്‍ 12.84 ലക്ഷം പേര്‍ വാക്‌സിന്‍ സ്വീകരിച്ചു

കോവിഡ് വാക്‌സിന്‍ വിതരണം ജില്ലയില്‍ പുരോഗമിക്കുന്നതായി ജില്ലാ മെഡിക്കല്‍ ഓഫീസര്‍ ഡോ. കെ. സക്കീന അറിയിച്ചു. ജില്ലയില്‍ 12,84,409 പേരാണ് ഇതുവരെ കോവിഡ് പ്രതിരോധ വാക്‌സിന്‍ സ്വീകരിച്ചത്. ഇതില്‍ 9,83,249 പേര്‍ക്ക് ഒന്നാം ഡോസും 3,01,160 പേര്‍ക്ക് രണ്ടാം ഡോസുമാണ് നല്‍കിയത്.  

18 മുതല്‍ 44 വയസ് വരെ പ്രായമുള്ള 1,96,666 പേര്‍ക്ക് ഒന്നാം ഡോസ് വാക്‌സിനും 26,881 പേര്‍ക്ക് രണ്ടാം ഡോസും നല്‍കി. 45 വയസിനു മുകളില്‍ പ്രായമുള്ള 6,86,886 പേര്‍ക്ക് ആദ്യഘട്ട വാക്‌സിനും 2,12,061 പേര്‍ക്ക് രണ്ടാം ഘട്ട വാക്‌സിനുമാണ് നല്‍കിയിരിക്കുന്നത്. ആരോഗ്യ പ്രവര്‍ത്തകരില്‍ 43,916 പേര്‍ക്ക് ഒന്നാം ഡോസും 30,238 പേര്‍ക്ക് രണ്ടാം ഡോസും നല്‍കി. കോവിഡ് മുന്നണി പോരാളികളില്‍ 22,234 പേര്‍ക്ക് ഒന്നാം ഡോസും 19,080 പേര്‍ക്ക് രണ്ടാം ഡോസും ലഭ്യമാക്കി. പോളിംഗ് ഉദ്യോഗസ്ഥരില്‍ 12,900 പേര്‍ രണ്ടാം വാക്‌സിന്‍ സ്വീകരിച്ചു. നേരത്തെ 33,547 പോളിംഗ് ഉദ്യോഗസ്ഥര്‍ക്ക് ആദ്യ ഘട്ട വാക്‌സിന്‍ നല്‍കിയിരുന്നു.