ജനകീയാസൂത്രണത്തിന്റെ രജതജൂബിലി ആഘോഷത്തിന് ആഗസ്റ്റ് 17ന് തുടക്കമാവും

17ന് മുഖ്യമന്ത്രി ഉദ്ഘാടനം ചെയ്യും;
പ്രാദേശിക തലത്തിൽ വിവിധ പരിപാടികൾ

കേരളത്തിന്റെ സാമൂഹ്യ വികാസചരിത്രത്തിലെ നാഴികക്കല്ലായ ജനകീയാസൂത്രണ പ്രസ്ഥാനത്തിന്റെ 25ാം വാർഷികം ഒരു വർഷം നീളുന്ന പരിപാടികളോടെ ആഘോഷിക്കുന്നു. ജനകീയ പങ്കാളിത്തത്തോടെയുള്ള ആസൂത്രണവും നിർവ്വഹണവും ലക്ഷ്യമിട്ട് 1996 ആഗസ്റ്റ് 17ന് (കൊല്ലവർഷം 1171 ചിങ്ങം 1) ആരംഭിച്ചതാണ് സർഗാത്മക വികസന മുന്നേറ്റമായ ജനകീയാസൂത്രണ പ്രസ്ഥാനം.
ആഗസ്റ്റ് 17ന് വൈകീട്ട് 4.30ന് തിരുവനന്തപുരത്ത് മുഖ്യമന്ത്രി പിണറായി വിജയൻ ജനകീയാസൂത്രണ പ്രസ്ഥാനത്തിന്റെ രജതജൂബിലി ആഘോഷം ഉദ്ഘാടനം ചെയ്യും. തദ്ദേശ സ്വയംഭരണ വകുപ്പ് മന്ത്രി എം.വി. ഗോവിന്ദൻ മാസ്റ്റർ അധ്യക്ഷനാകും. മുൻ മുഖ്യമന്ത്രിമാരും മുൻ തദ്ദേശ സ്വയംഭരണ വകുപ്പ് മന്ത്രിമാരും രാഷ്ട്രീയ നേതാക്കളും ആസൂത്രണ ബോർഡ് അംഗങ്ങളും പങ്കാളികളാകും. സംസ്ഥാനത്തെ കലാ സാഹിത്യ-സാംസ്‌കാരിക മാധ്യമ മേഖലകളിലുള്ള പ്രമുഖ വ്യക്തിത്വങ്ങൾ പങ്കെടുക്കും.
17ന് എല്ലാ തദ്ദേശ സ്വയംഭരണ സ്ഥാപന തലത്തിലും സംസ്ഥാനതല ഉദ്ഘാടന പരിപാടിക്ക് മുമ്പായി രജതജൂബിലി ആഘോഷം സംഘടിപ്പിക്കും. ഓരോ തദ്ദേശ സ്വയംഭരണ സ്ഥാപനവും ജനകീയാസൂത്രണകാലം മുതൽക്കിങ്ങോട്ടുള്ള അധ്യക്ഷൻമാരെയും ജനപ്രതിനിധികളെയും ചടങ്ങിൽ ആദരിക്കും. വേദിയിൽ സജ്ജമാക്കിയ സ്‌ക്രീനിൽ സംസ്ഥാന തല പരിപാടി എല്ലാവരും വീക്ഷിക്കാനുള്ള സൗകര്യം ഒരുക്കും.
പ്രാദേശിക വേദിയിൽ, 1996 മുതലിങ്ങോട്ട് ഓരോ തദ്ദേശ സ്വയംഭരണ സ്ഥാപനവും പിന്നിട്ട ജനകീയാസൂത്രണ വഴികളെ കുറിച്ച് വിശദമായ റിപ്പോർട്ട് അവതരിപ്പിക്കും. മുൻ അധ്യക്ഷൻമാരെയും ജനപ്രതിനിധികളെയും ജനകീയാസൂത്രണം രജത ജൂബിലി മെമന്റോ സമ്മാനിച്ച് ആദരിക്കും.
രജതജൂബിലി വേളയിൽ ഓരോ തദ്ദേശ സ്ഥാപനവും എല്ലാ കാലവും ഓർമ്മിക്കാവുന്ന ഒരു അടയാളപ്പെടുത്തൽ ഉണ്ടാവും. കൂടുതൽ പ്രദേശത്ത് മിയോവാക്കി വനങ്ങൾ ഉണ്ടാക്കുന്നതിന് തദ്ദേശ സ്വയംഭരണ സ്ഥാപനങ്ങൾ നടപടി സ്വീകരിക്കും. മിയാവോക്കി വനങ്ങളുടെ സ്ഥാപനവും പരിപാലനവും മനസ്സിലാക്കി, ശാസ്ത്രീയമായ വനവൽക്കരണമാണ് ഉദ്ദേശിക്കുന്നത്.
ഗ്രാമ വാർഡ് സഭകളെ ശാക്തീകരിക്കുന്നതിന് രജതജൂബിലി ഗ്രാമവാർഡ് സഭകൾ സെപ്റ്റംബറിൽ വിളിച്ചുചേർക്കും. ആഘോഷത്തിന്റെ ഭാഗമായി ശാക്തീകരണം ഉറപ്പുവരുത്താനുള്ള വൈവിധ്യമാർന്ന പദ്ധതികൾ ആവിഷ്‌കരിക്കും. സ്ത്രീ ഘടക പദ്ധതികൾ വിപുലീകരിക്കും.
2021 നവംബർ, ഡിസംബർ മാസങ്ങളിൽ ഓൺലൈനായി ദേശീയ സെമിനാർ സംഘടിപ്പിക്കും. ദേശീയ തലത്തിൽ വികേന്ദ്രീകൃതാസൂത്രണ പ്രക്രിയയുമായി ബന്ധപ്പെടുന്ന വ്യക്തിത്വങ്ങളെ സെമിനാറിൽ പങ്കെടുപ്പിക്കും.
കോവിഡ് വ്യാപനത്തിന്റെ രൂക്ഷത കുറയുന്ന വേളയിൽ അന്തർദേശീയ തലത്തിൽ ജനകീയാസൂത്രണ കോൺഗ്രസ് സംഘടിപ്പിക്കും. ആഘോഷത്തിന്റെ ഭാഗമായി ഇംഗ്ലീഷിലും മലയാളത്തിലുമായി 25 പുസ്തകങ്ങൾ പ്രസിദ്ധീകരിക്കും. ആഘോഷത്തിന്റെ ഭാഗമായി എൽഡർ ക്ലബ്ബുകൾ രൂപീകരിക്കേണ്ടതാണ്. അവയിലൂടെ അധികാര വികേന്ദ്രീകരണ പ്രക്രിയ ശക്തിപ്പെടുത്താനുള്ള ശ്രമങ്ങൾ പരിപോഷിപ്പിക്കണം. ആഘോഷത്തിന്റെ ഭാഗമായി ഒരു ഓൺലൈൻ പോർട്ടൽ തയ്യാറാക്കും. വികേന്ദ്രീകരണത്തിന്റെ ലഭ്യമായ നിയമങ്ങളും ചട്ടങ്ങളും സംബന്ധിച്ച ഓൺലൈൻ പരിശീലന പരിപാടികൾ സംഘടിപ്പിക്കും.
ജനകീയാസൂത്രണത്തിന്റെ രജതജൂബിലി ആഘോഷത്തിന്റെ കാസർകോട് ജില്ലാതല ആലോചനായോഗം ഓൺലൈനിൽ ചേർന്നു. പഞ്ചായത്ത് ഡെപ്യൂട്ടി ഡയറക്ടർ ജെയ്സൺ മാത്യു റിപ്പോർട്ട് അവതരിപ്പിച്ചു. ഗ്രാമപഞ്ചായത്ത് അസോസിയേഷൻ ജില്ലാ പ്രസിഡൻറ് കെ.പി. വൽസൻ റിപ്പോർട്ട് അവതരിപ്പിച്ചു. അസോസിയേഷൻ സെക്രട്ടറി അഡ്വ. എ.പി. ഉഷ, സംസ്ഥാന സമിതി അംഗം ടി.കെ. രവി, പി.പി. പ്രസന്ന കുമാരി, ഗ്രാമപഞ്ചായത്ത് പ്രസിഡൻറുമാർ, സെക്രട്ടറിമാർ തുടങ്ങിയവർ സംബന്ധിച്ചു.