അഞ്ചു പഞ്ചായത്തുകളിലെ 11 ടൺ ചില്ല് മാലിന്യം  ക്ലീൻ കേരള കമ്പനിക്കു കൈമാറി

കോട്ടയം: മാടപ്പള്ളി ബ്ലോക്ക് പഞ്ചായത്തിലെ മാടപ്പള്ളി, തൃക്കൊടിത്താനം, പായിപ്പാട്, വാകത്താനം, വാഴപ്പള്ളി ഗ്രാമപഞ്ചായത്തുകളിൽ നിന്ന 11 ടൺ ചില്ല് മാലിന്യം ക്ലീൻ കേരള കമ്പനിക്ക് കൈമാറി. ഹരിത കർമസേനയുടെ നേതൃത്വത്തിൽ ഗ്രാമപഞ്ചായത്തുകളിൽ നിന്നു ശേഖരിച്ച ചില്ല് മാലിന്യമാണ് കൈമാറിയത്.  പഞ്ചായത്ത് തലത്തിൽ കളക്ഷൻ സെന്ററുകൾ സ്ഥാപിച്ചാണ് ചില്ലു മാലിന്യം ശേഖരിച്ചത്.  ബ്ലോക്ക് പഞ്ചായത്ത് പ്രസിഡന്റ് അലക്‌സാണ്ടർ പ്രാക്കുഴി വാഹനം ഫ്‌ളാഗ് ഓഫ് ചെയ്തു. വാകത്താനം ഗ്രാമപഞ്ചായത്ത് പ്രസിഡന്റുമാരായ റോസമ്മ മത്തായി, സോഫി ലാലിച്ചൻ, മാടപ്പള്ളി ബ്ലോക്ക് പഞ്ചായത്ത് സെക്രട്ടറി എം.ഇ. ഷാജി, ജി. ഇ.ഒ. ഗിരീഷ് കെ. ദാസ്, ക്ലീൻ കേരള കമ്പനി മാനേജർ സഞ്ചു വർഗീസ്, ഹരിത കേരളം മിഷന്റെ ആർ.പി. ശരത് ചന്ദ്രൻ, സോഷ്യോഇക്കണോമിക് യൂണിറ്റ് ഫൌണ്ടേഷൻ ബ്ലോക്ക് കോർഡിനേറ്റർ മനോജ് മാധവൻ,  ഗ്രാമപഞ്ചായത്ത് ഹരിത കർമസേന പ്രതിനിധികൾ എന്നിവർ പങ്കെടുത്തു. ക്ലീൻ കേരള കമ്പനി ഗ്രാമപഞ്ചായത്തുകൾക്ക് നൽകിയ കലണ്ടർ പ്രകാരം ഹരിത കേരളം മിഷൻ, ശുചിത്വ മിഷൻ, കുടുംബശ്രീ, ഹരിത സഹായ സ്ഥാപനമായ സോഷ്യോ ഇക്കണോമിക് യൂണിറ്റ് ഫൗണ്ടേഷൻ എന്നിവരുടെ നിർദേശ പ്രകാരമാണ് മാലിന്യം ശേഖരിക്കുന്നത്.