ഈ വര്‍ഷത്തെ മികച്ച ആയുര്‍വേദ ഡോക്ടര്‍മാരെയും അധ്യാപകരെയും തെരഞ്ഞെടുക്കുന്നതിന് അപേക്ഷ ക്ഷണിച്ചു.  അവാര്‍ഡ് നിര്‍ണയിക്കുന്നതിനുളള രൂപരേഖയും മാനദണ്ഡവും അപേക്ഷാ ഫോറത്തിന്റെ മാതൃകയും www.ism.kerala.gov.in എന്ന വെബ്‌സൈറ്റിലും എല്ലാ ആയുര്‍വേദ  ജില്ലാ മെഡിക്കല്‍ ഓഫീസുകളിലും ലഭ്യമാണ്.  

അപേക്ഷകള്‍/നോമിനേഷനുകള്‍, ജില്ലാ മെഡിക്കല്‍ ഓഫീസര്‍മാര്‍, ആയുര്‍വേദ മെഡിക്കല്‍ എഡ്യൂക്കേഷന്‍ ഡയറക്ടര്‍ എന്നിവര്‍ മുഖേനയോ നേരിട്ടോ നവംബര്‍ 30 വൈകിട്ട് അഞ്ചിനു മുമ്പ് ഭാരതീയ ചികിത്സാ വകുപ്പ് ഡയറക്ടര്‍ക്ക് ലഭിക്കണം.  

വൈകി കിട്ടുന്ന അപേക്ഷകള്‍ പരിഗണിക്കില്ല.

മാനേജ്‌മെന്റ് ഇന്‍ഫര്‍മേഷന്‍ സിസ്റ്റം മുഖാന്തരം 2014, 2015, 2016 വരെ സംസ്ഥാനത്തെ ഗവ./പ്രൈവറ്റ് ഐ.ടി.ഐകളില്‍ പ്രവേശനം നേടിയ ട്രെയിനികളുടെ വിവരങ്ങളിലെ പിശകുകള്‍ തിരുത്താന്‍ അവസരം.

(സര്‍ട്ടിഫിക്കറ്റ് കറക്ഷന്‍ ഉള്‍പ്പെടെ) തിരുത്തുന്നതിന് നിശ്ചിത മാതൃകയില്‍ നവംബര്‍ മൂന്നിനകം പരിശീലനം നേടിയ സ്ഥാപനം മുഖാന്തരം അഡീഷണല്‍ സ്റ്റേറ്റ് പ്രോജക്ട് ഡയറക്ടര്‍,എസ്.പി.ഐ.യു ചാക്കയില്‍ നേരിട്ട് ലഭ്യമാക്കണം.  2014, 2015, 2016 വര്‍ഷങ്ങളിലെ തിരുത്തലിന് ഇനി അവസരമുണ്ടാകില്ല.  

വിശദവിവരങ്ങള്‍ det.kerala.gov.in എന്ന വെബ്‌സൈറ്റില്‍ ലഭ്യമാണ്.

പി.എന്‍.എക്‌സ്.4684/17
 

തിരുവനന്തപുരം യൂണിവേഴ്‌സിറ്റി കോളേജില്‍ പൊളിറ്റിക്‌സ്, സംസ്‌കൃത വിഭാഗങ്ങളില്‍ നിലവിലുളള ഓരോ ഒഴിവുകളില്‍ അതിഥി അധ്യാപക നിയമനത്തിനുളള ഇന്റര്‍വ്യൂ യഥാസമയം നവംബര്‍ 13, 14 തീയതികളില്‍ രാവിലെ 11ന് കോളേജ് ഓഫീസില്‍ നടത്തും.  

കൊല്ലം കോളേജ് വിദ്യാഭ്യാസ ഡെപ്യൂട്ടി ഡയറക്ടറുടെ അതിഥി അധ്യാപക പാനലില്‍ രജിസ്റ്റര്‍ ചെയ്തിട്ടുളളവര്‍ അസല്‍ സര്‍ട്ടിഫിക്കറ്റുകള്‍ സഹിതം ഇന്റര്‍വ്യൂവിന് ഹാജരാകണം.

പി.എന്‍.എക്‌സ്.4683/17
 

സംസ്ഥാനത്തെ സര്‍ക്കാര്‍ എയ്ഡഡ് സ്‌കൂളുകളില്‍ ഒന്നു മുതല്‍ 10 വരെ ക്ലാസുകളില്‍ പഠിക്കുന്ന ഒ.ഇ.സി വിഭാഗം വിദ്യാര്‍ത്ഥികളുടെ 2017 -18 വര്‍ഷത്തെ പ്രീമെട്രിക് വിദ്യാഭ്യാസ ആനുകൂല്യം പ്രധാനാധ്യാപകരുടെ ഔദേ്യാഗിക അക്കൗണ്ടിലേക്ക് ക്രെഡിറ്റ് ചെയ്തതായി പിന്നാക്ക വിഭാഗ വികസന വകുപ്പ് ഡയറക്ടര്‍ അറിയിച്ചു.  തുക ഉടന്‍ പിന്‍വലിച്ച് വിദ്യാര്‍ത്ഥികള്‍ക്ക് വിതരണം ചെയ്ത് അക്വിറ്റന്‍സ് അതത് മേഖലാ ഓഫീസുകളില്‍ നല്‍കണം.  

കെ.എസ്.ആര്‍.ടി.സി വെറ്റ് ലീസ് കരാര്‍ അടിസ്ഥാനത്തില്‍ അന്തര്‍ സംസ്ഥാന-ദീര്‍ഘ ദൂര സര്‍വീസുകള്‍ക്കായുള്ള സ്‌കാനിയ സൂപ്പര്‍ ഡീലക്‌സ് ബസുകള്‍ ഓടിത്തുടങ്ങി.  പ്രിമിയംക്ലാസ് ബസുകള്‍ വാടക ഇനത്തില്‍ ലഭ്യമാക്കി ഓടിക്കുന്നതിനുള്ള തീരുമാനത്തിന്റെ അടിസ്ഥാനത്തിലാണീ സംരംഭം.  ബെംഗളുരു, മണിപ്പാല്‍, സേലം, മധുര എന്നീ റൂട്ടുകളിലാണ് ആദ്യ ഘട്ടത്തില്‍ സ്‌കാനിയ സൂപ്പര്‍ ഡീലക്‌സ് വാടക ബസുകള്‍ ഓടിക്കുക

സംസ്ഥാന പിന്നാക്ക വിഭാഗ വികസന കോര്‍പറേഷന്‍ നോര്‍ക്ക റൂട്ട്‌സിന്റെ പ്രവാസി പുനരധിവാസ പദ്ധതി പ്രകാരം പ്രവാസികള്‍ക്ക് റീ-ടേണ്‍ വായ്പ പദ്ധതി നടപ്പാക്കുമെന്ന് പട്ടികജാതി-പട്ടികവര്‍ഗ പിന്നാക്കക്ഷേമ മന്ത്രി വാര്‍ത്താ സമ്മേളനത്തില്‍ പറഞ്ഞു.നാട്ടിലേയ്ക്ക് മടങ്ങി വരുന്ന ഒ.ബി.സി., മതന്യൂനപക്ഷ വിഭാഗങ്ങളില്‍പ്പെടുന്ന പ്രവാസികള്‍ക്ക് പിന്നാക്കവിഭാഗ വികസന കോര്‍പ്പറേഷന്റെ സ്വയംതൊഴില്‍ വായ്പ പദ്ധതി കൈത്താങ്ങാവുമെന്ന് മന്ത്രിപറഞ്ഞു.  

പൊതുവിദ്യാഭ്യാസ വകുപ്പിന് കീഴിലുള്ള ആര്‍.എം.എസ്.എ യില്‍ കരാര്‍ അടിസ്ഥാനത്തില്‍ ഒരു പ്രോഗ്രാമറുടെ ഒഴിവുണ്ട്. കൂടുതല്‍ വിവരങ്ങള്‍ പൊതുവിദ്യാഭ്യാസം, ഹയര്‍ സെക്കണ്ടറി വിദ്യാഭ്യാസം, ആര്‍.എം.എസ്.എ എന്നീ വകുപ്പുകളുടെ വെബ്‌സൈറ്റുകളില്‍ ലഭിക്കും.

അപേക്ഷിക്കേണ്ട അവസാന തീയതി നവംബര്‍ 15.
                                    

പി.എന്‍.എക്‌സ്.4679/17
 

എംപ്ലോയ്‌മെന്റ് വകുപ്പു മുഖേന നടത്തുന്ന കെസ്‌റു, ജോബ് ക്ലബ്ബ്, ശരണ്യ, കൈവല്യ സ്വയം തൊഴില്‍ പദ്ധതികളെ കുറിച്ചുള്ള ഏകദിന ശില്പശാല നാലിന് രാവിലെ 10.30 ന് തിരുവനന്തപുരം പുളിമൂട് പി & റ്റി ഹൗസില്‍ സംഘടിപ്പിക്കും.

തിരുവനന്തപുരം ജില്ലാ എംപ്ലായ്‌മെന്റ് എക്‌സ്‌ചേഞ്ച് സംഘടിപ്പിക്കുന്ന ശില്പശാല ജില്ലാ പഞ്ചായത്ത് പ്രസിഡന്റ് വി.കെ. മധു ഉദ്ഘാടനം ചെയ്യും.

പി.എന്‍.എക്‌സ്.4678/17
 

സ്‌കൂള്‍ വിദ്യാര്‍ത്ഥികളുടെ വായനയ്ക്ക് പുതിയ മാനങ്ങള്‍ വരുത്താനും വായനാശീലം മെച്ചപ്പെടുത്തുന്നതിനും, സാംസ്‌കാരിക വകുപ്പ് സ്ഥാപനമായ കേരള സ്റ്റേറ്റ് ബുക്ക്മാര്‍ക്ക് ആസ്വാദനക്കുറിപ്പെഴുത്ത് മത്സരം സംഘടിപ്പിക്കും. യു.പി, ഹൈസ്‌കൂള്‍, ഹയര്‍ സെക്കണ്ടറി വിദ്യാര്‍ത്ഥികള്‍ക്കാണ് മത്സരം സംഘടിപ്പിക്കുന്നത്. കുട്ടികള്‍ വായിച്ച പുസ്തകങ്ങളെകുറിച്ച് എഴുതിയ ആസ്വാദനക്കുറിപ്പ് മേലധികാരിയുടെ സാക്ഷ്യപത്രത്തോടെ ബുക്ക്മാര്‍ക്കിലെത്തിക്കണം. മൂന്നു തലങ്ങളിലും 10 കുട്ടികള്‍ക്ക് വീതം 30 കുട്ടികള്‍ക്ക് സമ്മാനം നല്‍കും.

കേരള നിയമസഭയുടെ ആഭിമുഖ്യത്തില്‍ നിയമസഭാ ബാങ്ക്വറ്റ് ഹാളില്‍ സംഘടിപ്പിച്ച 'ഭരണഭാഷ മാതൃഭാഷ' പരിപാടി ഡെപ്യൂട്ടി സ്പീക്കര്‍ വി. ശശി ഉദ്ഘാടനം ചെയ്തു. ഭരണഭാഷ മാതൃഭാഷാവത്ക്കരണം കൂടുതല്‍ ജനകീയമാകേണ്ടതുണ്ടെന്നും ഉദ്യോഗസ്ഥരുടേയും ജീവനക്കാരുടെയും പരിശ്രമമാണ് ഇതിനെ പ്രായോഗിക തലത്തിലേക്കെത്തിക്കാന്‍ വേണ്ടതെന്നും ഡെപ്യൂട്ടി സ്പീക്കര്‍ അഭിപ്രായപ്പെട്ടു.

ചടങ്ങില്‍ നിയമസഭാ സെക്രട്ടറി വി.കെ ബാബു പ്രകാശ് അധ്യക്ഷത വഹിച്ചു. ഡോ. നടുവട്ടം ഗോപാലകൃഷ്ണന്‍ മുഖ്യ പ്രഭാഷണം നടത്തി. നിയമസഭാ ജീവനക്കാര്‍ പങ്കെടുത്തു.