പട്ടികജാതി-പട്ടികവര്‍ഗ്ഗ വിഭാഗങ്ങളില്‍പ്പെടുന്ന സര്‍ക്കാര്‍ ഉദ്യോഗസ്ഥരെ ഡിപ്പാര്‍ട്ട്‌മെന്റ് ടെസ്റ്റിന് തയ്യാറാക്കുന്നതിനായി ഐ.എം.ജി.യുടെ തിരുവനന്തപുരം, കൊച്ചി, കോഴിക്കോട് കേന്ദ്രങ്ങളില്‍ നവംബര്‍ 27 മുതല്‍ ഡിസംബര്‍ 23 വരെ പ്രത്യേക പരിശീലനം സംഘടിപ്പിക്കും. തിരുവനന്തപുരം, കൊല്ലം, പത്തനംതിട്ട ജില്ലകളിലുള്ളവര്‍ തിരുവനന്തപുരത്തും ആലപ്പുഴ, എറണാകുളം, ഇടുക്കി, കോട്ടയം, തൃശൂര്‍ ജില്ലകളിലുള്ളവര്‍ കൊച്ചിയിലും കോഴിക്കോട്, വയനാട്, കണ്ണൂര്‍, കാസര്‍കോട്, മലപ്പുറം, പാലക്കാട് ജില്ലകളിലുള്ളവര്‍ കോഴിക്കോട്ടുമാണ് പരിശീലനത്തിനെത്തേണ്ടത്. പരീശീലന കേന്ദ്രം മാറ്റി നല്‍കില്ല.

കേന്ദ്ര സര്‍ക്കാര്‍ സ്ഥാപനമായ ഭിന്നശേഷിക്കാര്‍ക്കുള്ള ദേശീയ തൊഴില്‍ സേവന കേന്ദ്രം (തിരുവനന്തപുരം) കേള്‍വി വൈകല്യമുള്ള ഉദ്യോഗാര്‍ത്ഥികള്‍ക്കായി സൗജന്യ മത്സര പരീക്ഷ പരിശീലനം നടത്തുന്നു.  തിരുവനന്തപുരം നാലാഞ്ചിറയില്‍ നടത്തുന്ന പരിശീലനത്തിന് 18 നും 35 നുമിടയില്‍ പ്രായമായ കേള്‍വി വൈകല്യമുള്ളവര്‍ക്ക് നേരിട്ടോ തപാല്‍ മുഖേനയോ അപേക്ഷിക്കാം.  വെള്ള പേപ്പറില്‍ തയ്യാറാക്കിയ അപേക്ഷകള്‍ നവംബര്‍ 20 നകം ഡെപ്യൂട്ടി ഡയറക്ടര്‍, ഭിന്നശേഷിക്കാര്‍ക്കുള്ള ദേശീയ തൊഴില്‍ സേവന കേന്ദ്രം, നാലാഞ്ചിറ പി.ഒ, തിരുവനന്തപുരം-695 015.

മൈനിംഗ് &  ജിയോളജി വകുപ്പിന്റെ തിരുവനന്തപുരം, എറണാകുളം ജില്ലാ ഓഫീസുകളില്‍ കേരള ഓണ്‍ലൈന്‍ മൈനിംഗ് പെര്‍മിറ്റ് അവാര്‍ഡിംഗ് സര്‍വ്വീസസ് (KOMPAS) ആരംഭിച്ചിട്ടുണ്ട്. www.portal.dmg.kerala.gov.in ലൂടെയാണ് ഇ-പാസ് അനുവദിക്കുന്നത്. പാസ്സുകളുടെ വിതരണം ഘട്ടംഘട്ടമായി ഓണ്‍ലൈനാക്കുന്നതിനാല്‍ കരിങ്കല്ല് ഉല്‍പാദകരും/ഡീലര്‍മാരും പോര്‍ട്ടലില്‍ രജിസ്റ്റര്‍ ചെയ്യുകയും ഓണ്‍ലൈനായി മൂവ്‌മെന്റ് പെര്‍മിറ്റിനും ഇ-പാസ്സിനും അപേക്ഷിക്കുകയും വേണം. ഇ-പാസ്സ് ലഭിക്കുന്നതിനായി ധാതുക്കള്‍ കയറ്റുന്ന വാഹനങ്ങള്‍ പ്രസ്തുത പോര്‍ട്ടലില്‍ എന്റോള്‍ ചെയ്യണം.

കൊച്ചി: നിര്‍ധനരായ ക്ഷയരോഗബാധിതര്‍ക്ക് പോഷകാഹാരം നല്‍കുന്നതിന് ജില്ലാതലത്തില്‍ പ്രത്യേക പദ്ധതി തയ്യാറാക്കുമെന്ന് ജില്ല പഞ്ചായത്ത് പ്രസിഡന്റ് ആശ സനില്‍ പറഞ്ഞു. എറണാകുളം ജില്ല ക്ഷയരോഗമുക്തമാക്കുന്നതിനുള്ള കര്‍മപദ്ധതി തയ്യാറാക്കുന്നതിനു വേണ്ടി ജനപ്രതിനിധികള്‍ക്കായി കലൂര്‍ ഐഎംഎ ഹൗസില്‍ സംഘടിപ്പിച്ച ജില്ലാതല ശില്‍പശാല ഉദ്ഘാടനം ചെയ്യുകയായിരുന്നു, അവര്‍. 

കൊച്ചി: സംസ്ഥാന നിയമ സേവന അതോറിറ്റി (കെല്‍സ) റിലയന്‍സ് ഫൗണ്ടേഷന്‍ ഇന്‍ഫര്‍മേഷന്‍ സര്‍വീസുമായി ചേര്‍ന്ന് പൊതുജനങ്ങള്‍ക്ക് നിയമ സഹായ സംവിധാനം ഒരുക്കുന്നു. നിയമ സേവന അതോറിറ്റിയുടെ സേവനങ്ങളെ സംബന്ധിച്ച അറിയിപ്പുകള്‍ മൊബൈല്‍ ഫോണ്‍ ശബ്ദസന്ദേശങ്ങളായി ജനങ്ങളിലേക്ക് എത്തിക്കുന്ന സംവിധാനമാണിത്.

കൊച്ചി: ജില്ലാ ടൂറിസം പ്രമോഷന്‍ കൗണ്‍സിലും ജില്ലാ ഭരണകൂടവും സംയുക്തമായി സംഘടിപ്പിക്കുന്ന വസന്തോല്‍സവം 2017-18 നടത്തിപ്പിലേക്ക് ഏതെങ്കിലും സര്‍ക്കാര്‍ പരിപാടികള്‍ നടത്തി മുന്‍പരിചയമുളള പ്രമുഖ ഇവന്റ് മാനേജ്‌മെന്റ് കമ്പനികളില്‍ നിന്നും താത്പര്യപത്രം ക്ഷണിച്ചു.

ഡിസംബര്‍ 22 മുതല്‍ ജനുവരി മൂന്ന് വരെ നടക്കുന്ന പരിപാടിക്കുളള മുഴുവന്‍ ചെലവും സ്‌പോണ്‍സര്‍ഷിപ്പിലൂടെയും സ്റ്റാള്‍ വരുമാനത്തിലൂടെയും ടിക്കറ്റ് കളക്ഷനിലൂടെയും കണ്ടെത്തി, ലാഭ വിഹിതം ഡിറ്റിപിസിയ്ക്ക് നല്‍കുന്നതിനുളള ഉത്തരവാദിത്വം ഏറ്റടുക്കാന്‍ താത്പര്യമുളളവര്‍ മാത്രം അപേക്ഷിക്കുക.

കൊച്ചി: കേരള വനിതാ കമ്മീഷന്‍ എറണാകുളത്ത് സംഘടിപ്പിക്കുന്ന മെഗാ അദാലത്ത് ഇന്ന് (8.11.2017) രാവിലെ 10 മുതല്‍  ചിറ്റൂര്‍ റോഡിലെ വൈ.എം.സി.എ ഹാളില്‍ നടക്കും.

ചെയര്‍പെഴ്‌സണ്‍ എം.സി. ജോസഫൈന്‍ അദാലത്തിന് നേതൃത്വം നല്‍കും.

കൊച്ചി: സംവാദത്തിന് സാധ്യതയുള്ള സമൂഹമാണ് ജനാധിപത്യത്തിന്റെ കരുത്തും കാതലുമെന്ന് നിയമസഭാ സ്പീക്കര്‍ പി. ശ്രീരാമകൃഷ്ണന്‍. പരസ്പര വിനിമയത്തിലൂടെ യോജിപ്പിലെത്താന്‍ ഇന്നുവരെ ലഭ്യമായിട്ടുള്ളതില്‍ ഉത്തമമായ മാര്‍ഗമാണ് ജനാധിപത്യമെന്നും അദ്ദേഹം പറഞ്ഞു. നിയമസഭാ വജ്രജൂബിലി ആഘോഷത്തിന്റെ ഭാഗമായി ജില്ലയിലെ വിവിധ കോളേജുകളെ പങ്കെടുപ്പിച്ച് നിയമസഭാ സെക്രട്ടേറിയറ്റ് മഹാരാജാസ് കോളേജില്‍ സംഘടിപ്പിച്ച ഡിബേറ്റ് മത്സരം ഉദ്ഘാടനം ചെയ്യുകയായിരുന്നു സ്പീക്കര്‍.

കാക്കനാട്: ക്ലിനിക്കല്‍ എസ്റ്റാബ്ലിഷ്‌മെന്റ് ബില്‍ 2017 സംബന്ധിച്ച് വ്യക്തികളില്‍ നിന്നും സംഘടനകളില്‍ നിന്നും നേരിട്ട് ഹര്‍ജികള്‍ സ്വീകരിക്കുന്നതിനായി നിയമസഭയുടെ ആരോഗ്യവും കുടുംബക്ഷേമവും സംബന്ധിച്ച സബ്ജക്ട് കമ്മിറ്റി യോഗം എറണാകുളം കളക്ടറേറ്റ് കോണ്‍ഫറന്‍സ് ഹാളില്‍ ആരോഗ്യമന്ത്രി കെ.കെ. ശൈലജയുടെ അധ്യക്ഷതയില്‍ നടന്നു. ആരോഗ്യമേഖലയിലെ സംഘടനകളില്‍ നിന്നും വ്യക്തികളില്‍ നിന്നും ആക്ഷേപങ്ങളും പരാതികളും കേള്‍ക്കുകയും നിര്‍ദേശങ്ങള്‍ സ്വീകരിക്കുകയും ചെയ്തു. 

ജവഹര്‍ലാല്‍ നെഹ്‌റു ജയന്തിയോടും നെഹ്‌റു യുവ കേന്ദ്ര സ്ഥാപകദിനത്തോടും അനുബന്ധിച്ച് ജില്ലാ നെഹ്‌റു യുവ കേന്ദ്രയുടെ ആഭിമുഖ്യത്തില്‍ പുസ്തകാസ്വാദനം, ക്വിസ് എന്നീ മത്സരങ്ങള്‍ സംഘടിപ്പിക്കുന്നു. പ്രായം 15 നും 30 നും മദ്ധ്യേ. നെഹ്‌റുവിന്റെ 'വിശ്വചരിത്രാവലോകനം' എന്ന ഗ്രന്ഥത്തെ അധികരിച്ചുളള പുസ്തകാസ്വാദനം 10 പുറത്തില്‍ കവിയാതെ മലയാളത്തില്‍ നവംബര്‍ 10 നകം.

തൃശൂര്‍ നെഹ്‌റു യുവ കേന്ദ്രയുടെ ഓഫീസില്‍ ലഭിക്കണം. ലോക വിജ്ഞാനമാണ്  ക്വിസ് മത്സരവിഷയം. നവംബര്‍ 14 രാവിലെ 11 തൃശൂര്‍ നെഹ്‌റു യുവ കേന്ദ്രയിലാണ് മത്സരം. കൂടുതല്‍ വിവരങ്ങള്‍ക്ക് ഫോണ്‍  : 0487-2360355, 8086991746.