കോവിഡ് ധനസഹായം;  ജില്ലയിൽ 47 ലക്ഷം രൂപ നൽകി - 154 പേർക്കുള്ള ധനസഹായം ഉടൻ - ഇന്നലെ വരെ ലഭിച്ചത് 516 അപേക്ഷ - 299 അപേക്ഷകൾക്ക് അംഗീകാരം

കോട്ടയം: ജില്ലയിൽ കോവിഡ് ബാധിച്ച് മരിച്ചവരുടെ ആശ്രിതർക്ക് സർക്കാർ പ്രഖ്യാപിച്ച ധനസഹായമായി 94 പേർക്കായി 47 ലക്ഷം രൂപ വിതരണം ചെയ്തു. ഗുണഭോക്താക്കൾ 50,000 രൂപ വീതം കൈപ്പറ്റി. 154 പേർക്കായി 77 ലക്ഷം രൂപയുടെ ധനസഹായം അനുവദിക്കുന്നതിനായി ബില്ലുകൾ ട്രഷറിയിൽ നൽകി.
ധനസഹായത്തിനായി അപേക്ഷിക്കാൻ താലൂക്ക് ഓഫീസുകളിൽ നടത്തിയ ദ്വിദിന ക്യാമ്പിൽ ആകെ 516 അപേക്ഷ സ്വീകരിച്ചു.  ഇന്നലെ (ഡിസംബർ 21) 111 പേർ കൂടി അപേക്ഷ നൽകി. ജില്ലയിൽ കോവിഡ് മരണ ധനസഹായത്തിനായി അപേക്ഷ നൽകിയതിൽ 299 എണ്ണത്തിനാണ് അംഗീകാരം ലഭിച്ചത്.  
കോവിഡ് ബാധിച്ച് മരിച്ചതിന്റെ ഔദ്യോഗിക മരണ സർട്ടിഫിക്കറ്റ് ലഭിച്ചവർക്ക് ആധാർ, റേഷൻ കാർഡ്, ബന്ധം തെളിയിക്കുന്ന രേഖ, അവകാശിയുടെ ബാങ്ക് അക്കൗണ്ട് രേഖ എന്നിവ സഹിതം ഡിസംബർ 24 വരെ അതത് വില്ലേജ് ഓഫീസുകളിൽ അപേക്ഷിക്കാം. relief.kerala.gov.in എന്ന വെബ് സൈറ്റ് മുഖേന നേരിട്ടും അക്ഷയ കേന്ദ്രങ്ങൾ വഴിയും ഓൺലൈനായി അപേക്ഷ നൽകാം.