1400 തൈകൾ വിതരണം ചെയ്ത് ചാവക്കാട് നഗരസഭ
നാടിനെ പച്ചത്തുരുത്താക്കുക എന്ന ലക്ഷ്യത്തോടെ നടപ്പാക്കുന്ന പച്ചത്തുരുത്ത് പദ്ധതിക്ക് ചാവക്കാട് നഗരസഭയിൽ തുടക്കം. മണത്തല പുതിയ പള്ളി പരിസരത്ത് നടന്ന ചാവക്കാട് മുനിസിപ്പൽതല ഉദ്ഘാടനം എൻ കെ അക്ബർ എം എൽ എ തൈ നട്ട് നിർവ്വഹിച്ചു.
പദ്ധതി പ്രാവർത്തികമാക്കുന്നതിനായി 1400 തൈകളാണ്
നഗരസഭ വിതരണത്തിന് തയ്യാറാക്കിയത്. ഇതിൽ 32 വാർഡുകളിലുമായി 30 തൈകൾ വീതം നട്ട് പിടിപ്പിച്ചു. നെല്ലി, ഞാവൽ, പുളി എന്നീ തൈകളാണ് വിതരണം ചെയ്തത്. നഗരസഭ ചെയർപേഴ്സൺ ഷീജ പ്രശാന്ത് അധ്യക്ഷത വഹിച്ച ചടങ്ങിൽ ഹരിത കേരളം റിസോഴ്സ് പേഴ്സൺ സുരേഷ് ബാബു പരിസ്ഥിതിദിന സന്ദേശം നൽകി.
വൈസ് പ്രസിഡന്റ് കെ കെ മുബാറക്ക്, നഗരസഭ സ്റ്റാന്റിംഗ് കമ്മിറ്റി അംഗങ്ങളായ ബുഷറ ലത്തീഫ്, പ്രസന്ന രണദിവെ, വാർഡ് അംഗങ്ങൾ ജനപ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു. പരിസ്ഥിതി ദിനത്തോടനുബന്ധിച്ച് വിവിധ വാർഡുകളിൽ കൗൺസിലർമാരുടെ നേതൃത്വത്തിൽ ഓരോ വീടുകളിലേയ്ക്ക് വൃക്ഷതൈ വിതരണം നടത്തി.
- Log in to post comments