ദുരിതമേഖലകളിലും ക്യാമ്പുകളിലും ആശ്വാസമേകി മന്ത്രി

- മന്ത്രി വി.എൻ. വാസവൻ ദുരിതാശ്വാസ ക്യാമ്പുകൾ സന്ദർശിച്ചു

കോട്ടയം: വെള്ളപ്പൊക്കദുരിതം നേരിടുന്ന ജില്ലയിലെ പടിഞ്ഞാറൻ പ്രദേശങ്ങളും വിവിധ സ്ഥലങ്ങളിൽ ആരംഭിച്ച ദുരിതാശ്വാസ ക്യാമ്പുകളും സഹകരണ-സാംസ്‌കാരിക വകുപ്പു മന്ത്രി വി.എൻ. വാസവൻ സന്ദർശിച്ച് സ്ഥിതിഗതികൾ വിലയിരുത്തി.
ചെങ്ങളം എസ്.എൻ.ഡി.പി. ഹാളിലെ ക്യാമ്പ് സന്ദർശിച്ച മന്ത്രി ക്യാമ്പിൽ കഴിയുന്നവരുമായി സംസാരിച്ചു. 130 പേരാണ് ക്യാമ്പിലുള്ളത്. ചെങ്ങളം ഗവൺമെന്റ് എച്ച്.എസ്.എസ്., ചെങ്ങളം തെക്ക് സെന്റ് തോമസ് യാക്കോബായ സുറിയാനി പള്ളി ഹാൾ, സെന്റ് ജോസഫ്സ് എൽ.പി. സ്‌കൂൾ, സെന്റ് മേരീസ് സെഹിയോൻ ക്നാനായ പള്ളി ഹാൾ, കാഞ്ഞിരം എസ്.എൻ.ഡി.പി. എച്ച്.എസ്.എസ്., തിരുവാർപ്പ് ഗവൺമെന്റ് യു.പി.എസ്., തിരുവാർപ്പ് മർത്തുശ് മുനി പള്ളി പാരിഷ് ഹാൾ
എന്നിവിടങ്ങൾ മന്ത്രി സന്ദർശിച്ചു. ക്യാമ്പിൽ കഴിയുന്നവർക്ക് ഭക്ഷണം, ആരോഗ്യവകുപ്പിന്റെ സേവനങ്ങൾ എന്നിവ ലഭ്യമാകുന്നതടക്കമുള്ളവ വിലയിരുത്തി.

 ചെങ്ങളം ഗവൺമെന്റ് എച്ച്.എസ്.എസിൽ 8 കുടുംബങ്ങളിലെ 24 പേരും ചെങ്ങളം തെക്ക് സെന്റ് തോമസ് യാക്കോബായ പള്ളി ഹാളിൽ 31 കുടുംബങ്ങളിലെ 75 പേരും സെന്റ് മേരീസ് സെഹിയോൻ ക്നാനായ പള്ളി ഹാളിൽ 32 കുടുംബങ്ങളിലെ 112 പേരുമാണുള്ളത്. കാഞ്ഞിരം എസ്.എൻ.ഡി.പി. എച്ച്.എസ്.എസിൽ 10 കുടുംബങ്ങളിലെ 35 പേരും തിരുവാർപ്പ് ഗവൺമെന്റ് യു.പി.എസിൽ 16 കുടുംബങ്ങളിലെ 42 പേരും തിരുവാർപ്പ് മർത്തുശ് മുനി പള്ളി പാരിഷ് ഹാളിൽ 15 കുടുംബങ്ങളിലെ 24 പേരുമുണ്ട്.

തിരുവാർപ്പ് പഞ്ചായത്ത്, കോട്ടയം നഗരസഭയിലെ പടിഞ്ഞാറൻ പ്രദേശങ്ങൾ എന്നിവിടങ്ങളിലെ വെള്ളപ്പൊക്കദുരിത മേഖലകൾ മന്ത്രി സന്ദർശിച്ചു. ജില്ലാ പഞ്ചായത്തംഗം കെ.വി. ബിന്ദു, തിരുവാർപ്പ് ഗ്രാമപഞ്ചായത്ത് പ്രസിഡന്റ് അജയൻ കെ. മോനോൻ, വൈസ് പ്രസിഡന്റ് രശ്മി പ്രസാദ്, ഗ്രാമപഞ്ചായത്ത് സ്ഥിരംസമിതി അധ്യക്ഷരായ  കെ.ആർ. അജയ്, സി.റ്റി. രാജേഷ്, ഷീന മോൾ, ഗ്രാമപഞ്ചായത്തംഗങ്ങളായ ജയ സജിമോൻ, റൂബി ചാക്കോ, റേച്ചൽ ജേക്കബ്, കെ.എസ്. സുമേഷ് കുമാർ, മഞ്ജു ഷിബു, കെ.ബി. ശിവദാസ്,  റാണി പുഷ്പാകരൻ  എന്നിവർ മന്ത്രിക്കൊപ്പമുണ്ടായിരുന്നു.