പാലക്കാട് ബ്ലോക്ക്തല കേരളോത്സവത്തിന് തുടക്കമായി

സംസ്ഥാന യുവജനക്ഷേമ ബോര്‍ഡിന്റെ നേതൃത്വത്തില്‍ തദ്ദേശ സ്വയംഭരണ സ്ഥാപനങ്ങളും വിവിധ വകുപ്പുകളും സഹകരിച്ച് നടത്തുന്ന കേരളോത്സവം 2022 ന് പാലക്കാട് ബ്ലോക്കില്‍ തുടക്കമായി. ബ്ലോക്ക് പഞ്ചായത്ത് 2022-23 സാമ്പത്തിക വര്‍ഷത്തെ വികസന ഫണ്ടില്‍ നിന്നും 1.50 ലക്ഷം രൂപയും സംസ്ഥാന യുവജനക്ഷേമ ബോര്‍ഡിന്റെ ഒരു ലക്ഷം രൂപയും വകയിരുത്തിയാണ് കേരളോത്സവം നടത്തുന്നത്. മുട്ടിക്കുളങ്ങര പോലീസ് ക്യാമ്പ് ഗ്രൗണ്ടില്‍ ചെസ് മത്സരത്തോടെ ഗെയിംസ് ഇനങ്ങള്‍ക്ക് തുടക്കമായി. പരിപാടിയുടെ ഭാഗമായി വോളിബോള്‍, ക്രിക്കറ്റ്, കബഡി, പഞ്ചഗുസ്തി, ഫുട്‌ബോള്‍ മത്സരങ്ങള്‍ നടന്നു.
ബ്ലോക്കിന് കീഴിലെ ഗ്രാമപഞ്ചായത്തുകളില്‍ നിന്ന് നിരവധി പേര്‍ പങ്കെടുക്കുന്നുണ്ട്. യുവജനങ്ങളുടെ കലാപരവും സാംസ്‌കാരികവും കായികവുമായ കഴിവുകള്‍ പ്രകടിപ്പിക്കുന്നതിന് കേരളോത്സവം അവസരമൊരുക്കുമെന്ന് ബ്ലോക്ക് അധികൃതര്‍ അറിയിച്ചു. നവംബര്‍ 30, ഡിസംബര്‍ ഒന്ന് തീയതികളില്‍ കല്ലേക്കാട് പോലീസ് ക്യാമ്പ് ഗ്രൗണ്ടില്‍ അത്‌ലറ്റിക്‌സ് മത്സരങ്ങള്‍ നടക്കും. ഡിസംബര്‍ രണ്ടിന് പറളി ഗ്രാമപഞ്ചായത്ത് കല്യാണമണ്ഡപത്തില്‍ നടക്കുന്ന കലാമത്സരങ്ങളോടെ കേരളോത്സവം സമാപിക്കും.