സംസ്ഥാന ക്ഷീരസംഗമം "പടവ് 2023" ലോഗോ പ്രകാശനം ചെയ്തു

ക്ഷീരവികസന വകുപ്പിന്റെ ആഭിമുഖ്യത്തിൽ നടക്കുന്ന സംസ്ഥാന ക്ഷീര സംഗമം "പടവ് 2023" ന്റെ ലോഗോ പ്രകാശനം ക്ഷീര വികസന വകുപ്പ് മന്ത്രി ജെ ചിഞ്ചുറാണി, റവന്യൂ മന്ത്രി കെ രാജൻ എന്നിവർ ചേർന്ന് നിർവഹിച്ചു. 

KVASU, മിൽമ, കേരള ഫീഡ്സ്, കെഎൽഡി ബോർഡ്, സംസ്ഥാനത്തെ പ്രാഥമിക ക്ഷീരസംഘങ്ങൾ എന്നിവയുടെ സംയുക്താഭിമുഖ്യത്തിൽ സംസ്ഥാന ക്ഷീരസംഗമം "പടവ് 2023" ഫെബ്രുവരി 10 മുതൽ 15 വരെ തൃശൂർ മണ്ണുത്തി വെറ്റിനറി യൂണിവേഴ്സിറ്റി ക്യാമ്പസിൽ വച്ച് നടക്കും. മുഖ്യമന്ത്രി പിണറായി വിജയൻ ഉദ്ഘാടനം ചെയ്യുന്ന പടവ് 2023ൽ ക്ഷീരഗ്രാമം പദ്ധതിയുടെ  ഉദ്ഘാടനം, മാധ്യമ ശില്പശാല, ഡയറി എക്സ്പോ, ഫയൽ അദാലത്ത്, കരിയർ ഗൈഡൻസ് ക്യാമ്പ്, ക്ഷീരസഹകാരി ശില്പശാല, ടെക്നിക്കൽ സെഷൻ, വനിതാ സംരംഭകത്വ ശില്പശാല, ക്ഷീരസംഘം ജീവനക്കാർക്കുള്ള ശില്പശാല, സംവാദ സദസ്, ക്ഷീരകർഷക മുഖാമുഖം തുടങ്ങിയ വിവിധങ്ങളായ പരിപാടികൾ സംഘടിപ്പിക്കും. 

സംസ്ഥാന മന്ത്രിമാർ, എംഎൽഎമാർ, എംപിമാർ, തദ്ദേശസ്വയംഭരണ പ്രതിനിധികൾ, ക്ഷീര മേഖലയിലെ വിദഗ്ധർ, ശാസ്ത്രജ്ഞർ, ക്ഷീര സഹകാരികൾ, ക്ഷീരസംരംഭകർ തുടങ്ങി മൂന്ന് ലക്ഷത്തോളം പ്രതിനിധികൾ ചടങ്ങുകളിൽ പങ്കാളികളാകും.    

ലഭ്യമായ 48 എൻട്രികളിൽ നിന്ന് "പടവ് 2023"ന്റെ തെരഞ്ഞെടുക്കപ്പെട്ട ലോഗോ കോഴിക്കോട് സ്വദേശിയായ ടൈപ്പോഗ്രാഫിക് ഡിസൈനർ കെ മുഹമ്മദ് ഹാരിസ് ആണ് തയ്യാറാക്കിയത്. 

സെക്രട്ടറിയേറ്റിലെ ക്ഷീര വികസന വകുപ്പ് മന്ത്രിയുടെ ചേമ്പറിൽ നടന്ന ചടങ്ങിൽ  ജോയിന്റ് ഡയറക്ടർമാരായ പി എ ബീന, ടി എസ് മിനി ഡെപ്യൂട്ടി ഡയറക്ടർമാരായ ആർ രാംഗോപാൽ, ശാലിനി ഗോപിനാഥ് , രജിത ആർ, കോശി കെ അലക്സ്,  സീനിയർ ഡിഇഒ ശ്രീലേഖ പി കെ എന്നിവർ സംബന്ധിച്ചു.