എന്റെ കേരളം 2023 മെഗാ പ്രദർശനം: ഒരുക്കങ്ങൾ പുരോഗമിക്കുന്നു സംസ്ഥാനതല ഉദ്ഘാടനം ഏപ്രിൽ 1 ന് മറൈൻഡ്രൈവിൽ

 സംസ്ഥാന സർക്കാരിന്റെ വികസന  നേട്ടങ്ങളും ക്ഷേമ പദ്ധതികളും പ്രചരിപ്പിക്കുന്ന എന്റെ കേരളം മെഗാ പ്രദർശനത്തിന്റെ സംസ്ഥാന തല ഉദ്ഘാടനത്തിന്റെ ഒരുക്കങ്ങൾ പുരോഗമിക്കുന്നു. മുന്നൊരുക്ക പ്രവർത്തനങ്ങൾ അഡീഷണൽ ജില്ലാ മജിസ്‌ട്രേറ്റ്  എസ്. ഷാജഹാന്റെ നേതൃത്വത്തിൽ കളക്ടറേറ്റ് കോൺഫറൻസ് ഹാളിൽ  അവലോകന യോഗം ചേർന്നു.

ഏപ്രിൽ ഒന്നിന് വൈകിട്ട് ഏഴിന് എറണാകുളം മറൈൻഡ്രൈവിൽ മുഖ്യമന്ത്രി പിണറായി വിജയൻ ഉദ്ഘാടനം നിർവഹിക്കും.. മന്ത്രിമാർ, എംപിമാർ, എംഎൽഎമാർ, മേയർ, മറ്റ് ജനപ്രതിനിധികൾ തുടങ്ങിയവർ പങ്കെടുക്കും.

ഏപ്രിൽ ഒന്നു മുതൽ ഏഴ് വരെ മറൈൻഡ്രൈവിൽ  നടക്കുന്ന വിപണന - പ്രദർശന മേളയിൽ വിവിധ വകുപ്പുകളിൽ നിന്നുള്ള സ്റ്റാളുകൾ പങ്കെടുക്കുമെന്ന് അഡീഷണൽ ജില്ലാ മജിസ്‌ട്രേറ്റ് പറഞ്ഞു. കേരളം ഒന്നാമതെത്തിയ നേട്ടങ്ങളുടെ പ്രദര്‍ശനം, ടൂറിസം നേട്ടങ്ങൾ, സര്‍ക്കാരിന്റെ സേവനങ്ങളും പദ്ധതികളും അവതരിപ്പിക്കുന്ന സ്റ്റാളുകള്‍, യുവാക്കള്‍ക്ക് സേവനം നല്‍കുന്ന യൂത്ത് സെഗ്‌മെന്റ്, വിദ്യാഭ്യാസ, തൊഴില്‍, കിഫ്ബി ബ്ലോക്കുകളും വിപണന മേളയും പ്രദർശനത്തിൽ ഉണ്ടാകും.  പ്രത്യേക ഫുഡ് കോർട്ടും ഏഴു ദിവസവും കലാ പരിപാടികളും ഉണ്ടാകും. കുട്ടികൾക്കായി പ്രത്യേക സ്പോർട്സ് ആക്ടിവിറ്റി ഏരിയയും ഉണ്ടാകും.

യോഗത്തിൽ  ജില്ലാ ഇൻഫർമേഷൻ ഓഫീസർ നിജാസ് ജുവൽ, ഹുസൂർ ശിരസ്തദാർ അനിൽകുമാർ മേനോൻ, വിവിധ വകുപ്പ് ജില്ലാതല മേധാവികൾ, തഹസിൽദാർമാർ തുടങ്ങിയവർ പങ്കെടുത്തു.